သျှမ်းပြည် မိုးမိတ်မြို့နယ်တွင် စက်သုံးဆီကို အကန့်အသတ်ဖြင့်သာ ရောင်းချပေးနေပြီး ခရီးသည်တင်ကားနှင့် ကုန်တင်ကားများ မြို့အဝင်အထွက် ပြုလုပ်ရန် စစ်တပ်ထံ စာရင်းပေးနေရကြောင်း စုံစမ်းသိရသည်။

စစ်ကော်မရှင်တပ် ပြန်လည်ထိန်းချုပ်ထားသည့် မိုးမိတ်မြို့တွင် စက်သုံးဆီရောင်းချသည့် မိဘရိပ် ပန့်ဆီဆိုင် တစ်ဆိုင်တည်းသာ ရှိခြင်းကြောင့် မတ်လ ဒုတိယပတ်မှ စတင်၍ အကန့်အသတ်ဖြင့်သာ ရောင်းချပေးနေပြီး စက်သုံးဆီ တစ်လီတာလျှင် ကျပ်ငွေ တစ်သောင်းမှ တစ်သောင်းခွဲအထိ ပေါက်ဈေးရှိကြောင်း ဒေသခံများက ပြောသည်။

“နမ့်မောင်းတံတားထိပ်က မိဘရိပ် တစ်ဆိုင်ပဲ ဖွင့်သေးတော့ စက်သုံးဆီက အကန့်အသတ်နဲ့ ဝယ်နေရတယ်။ ရှေ့ရက်ကတော့ မနက်ပိုင်းကို ဓာတ်ဆီရောင်းပေးပြီး ညနေပိုင်းမှ ဒီဇယ်ရောင်းပေးတာ၊ အဲ့တာကြောင့် မနက်ပိုင်း ဓာတ်ဆီထည့်ဖို့ လူအများနဲ့ တန်းစီရတာ။ အရင်က မိုင်တယ်လ်ဖုန်းလိုင်း ပြန်ဖွင့်ပေမယ့် အခု ဆီမရှိတော့ ဖုန်းလိုင်းလည်း ပြတ်နေတာ လေးငါးရက် ရှိပြီ” ဟု မိုးမိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုးမိတ်မြို့နယ်တွင် အသုံးပြုနေသည့် စက်သုံးဆီများကို မန္တလေးနှင့် ပြင်ဦးလွင်ဘက်မှ သယ်ဆောင်လာပါက လမ်းပိုင်းတလျှောက်ရှိ စစ်ကော်မရှင်တပ်နှင့် PDF စစ်ဆေးရေးဂိတ် အများအပြားကို အခွန်ပေးဆောင်ရခြင်းကြောင့် ကုန်သည်များမှာ တွက်ချေမကိုက်ကြောင်း သိရသည်။

ယခင်က တရုတ်နယ်စပ်မှ ဝင်ရောက်လာသည့် စက်သုံးဆီများကို လားရှိုးမြို့မှတဆင့် ဝယ်ယူအသုံးပြုခဲ့သော်လည်း လက်ရှိတွင် TNLA ထိန်းချုပ်နယ်မြေထဲ စက်သုံးဆီ သယ်ဆောင်ဖြတ်သန်းခွင့် ကန့်သတ်ထားခြင်းကြောင့် မိုးမိတ်မြို့နယ်အတွင်း စက်သုံးဆီ အခက်အခဲဖြစ်နေကြောင်း ဒေသခံများက ပြောသည်။

“အခုကျတော့ တရုတ်ဘက်က လာတဲ့ ဆီတွေကို TNLA က သူ့နယ်မြေဖြတ်ပြီး ပေးမသယ်တော့ လားရှိုးကနေလည်း ဝယ်မရတော့ဘူး။ တချို့လည်း ဝယ်လို့ရသေးပေမယ့် ဆီအညံ့တွေ ရောလို့ သုံးလို့သိပ်မကောင်းဘူး၊ ဆီသွားဖြည့်တဲ့လူလည်း နည်းသွားတယ်။ ရွှေမျောရှိတဲ့ဘက်တော့ တရုတ်က ဆီတွေ ရသေးတယ် ပြောတယ်။ သျှမ်းတပ်ဂိတ်လည်း အခွန်များလို့ ကုန်သည်တွေ တွက်ချေမကိုက်ဘူး” ဟု အဆိုပါ မိုးမိတ်ဒေသခံ အမျိုးသားက ဆက်ပြောသည်။

အလားတူ မိုးမိတ်မြို့ထဲ ပြန်လည်တပ်စွဲထားသည့် စစ်ကော်မရှင်တပ်ကလည်း မိုးမိတ်မြို့သို့ ခရီးစဉ် ပြေးဆွဲနေသည့် ခရီးသည်တင်ကားများနှင့် ကုန်တင်ကားများကို နေ့စဉ် နံနက်တိုင်း စာရင်းပို့ခိုင်းပြီး ငွေကြေးကောက်ခံပြီးမှ သွားလာခွင့်ပြုကြောင်း ကားသမားများထံမှ သိရသည်။

“လိုင်းကားနဲ့ ကုန်ကားတွေကို ဗျူဟာမှူး ရုံးထိုင်တဲ့ မြို့ထဲမှာ ထောက်ခံစာသွားယူခိုင်းတယ်။ မြို့အဝင်အထွက်လုပ်ဖို့ မနက်တိုင်း ကားတန်းစီ စာရင်းပေးရတယ်။ ထောက်ခံစာရဖို့ ပိုက်ဆံကလည်း ပေးရသေးတယ်၊ အဲ့တာမရရင်လည်း ကားမထွက်ရဘူး” ဟု မိုးမိတ်-မိုးကုတ်-ကျောက်မဲ ခရီးစဉ် ပြေးဆွဲနေသည့် ကားသမားတစ်ဦးက ပြောသည်။

မိုးမိတ်မြို့မှ တအာင်း(ပလောင်) အမျိုးသားလွတ်မြောက်ရေးတပ်မတော် TNLA တပ်ဆုတ်ပေးပြီးနောက် စစ်ကော်မရှင်လက်အောက်ခံ တပ်မ(၁၁) ပြန်လည်ဝင်ရောက် တပ်စွဲထားသည်မှာ လေးလနီးပါး ရှိလာသော်လည်း ကချင်လွတ်လပ်ရေးတပ် KIA ၊ PDF ပူးပေါင်းတပ်ဖွဲ့များနှင့် တိုက်ပွဲဆက်လက် ဖြစ်ပွားနေပြီး အုပ်ချုပ်ရေးယန္တရား မလည်ပတ်နိုင်သေးကြောင်း ဒေသခံများက ပြောသည်။