သျှမ်းပြည်မြောက်ပိုင်း သိန္နီမြို့တွင် ယနေ့ညမှ စတင်ကာ ည ၈ နာရီနောက်ပိုင်း အပြင်မထွက်ရန် ညမထွက်ရအမိန့်ကို ကိုးကန့်တပ်ဖွဲ့ (MNDAA) က ရုတ်တရက် ထုတ်ပြန်လိုက်ကြောင်း ဒေသခံများထံမှ သိရသည်။

အဆိုပါအမိန့်သည် ကွတ်ခိုင်မြို့နယ်အတွင်း ကိုးကန့်တပ်ဖွဲ့ (MNDAA) နှင့် တအာင်းတပ်ဖွဲ့ (TNLA) တို့ကြား တိုက်ပွဲများ ဖြစ်ပွားလာပြီးနောက် ထွက်ပေါ်လာခြင်းဖြစ်သည်။

ယနေ့ (မတ်၁၄)ရက် ညပိုင်းတွင် ထုတ်ပြန်လာသည့် အဆိုပါအမိန့်အရ သိန္နီမြို့၏ အဓိကလမ်းမကြီးများပေါ်တွင် ည ၈ နာရီနောက်ပိုင်း သွားလာသူများကို ဖမ်းဆီးကာ ရဲစခန်းသို့ ပို့ဆောင်မည်ဟု သတင်းများ ထွက်ပေါ်နေကြောင်း သိန္နီမြို့ခံတစ်ဦးက ပြောသည်။

“ဒီညပဲ ထုတ်လိုက်တာ၊ တော်တော်များများက မသိကြသေးဘူး။ အပြင်ထွက်လို့မိရင် ရဲစခန်းခေါ်သွားမယ်လို့ သိရတယ်။ အဓိကကတော့ လမ်းမကြီးပေါ်မှာပေါ့။ ဒီည ရွာမှာလည်း ရှင်ပြုပွဲရှိတော့ ပွဲလာလည်တဲ့ ရွာသားတွေ ရှိတယ်” ဟု လုံခြုံရေးအရ အမည်မဖော်လိုသည့် သိန္နီမြို့ခံတစ်ဦးက သျှမ်းသံတော်ဆင့်သို့ ပြောသည်။

ယနေ့ (မတ်လ ၁၄ ရက်) နံနက် ၁၀ နာရီခန့်မှ စတင်၍ ကွတ်ခိုင်မြို့နယ် မုံးစီး၊ နမ့်ဖတ်ကာ၊ လွိုင်ဆမ်ဆစ်၊ မန်ပြိန်းနှင့် မြို့အနီးတစ်ဝိုက်ရှိ TNLA တပ်စခန်းတည်ရှိရာ နေရာများကို MNDAA ဘက်မှ တိုက်ခိုက်ခဲ့ကြောင်း ဒေသခံများ၏ ပြောပြချက်အရ သိရသည်။

ကိုးကန့်တပ်ဖွဲ့ (MNDAA) ၏ ယနေ့ ထုတ်ပြန်ချက်အရ ပြီးခဲ့သည့် ဖေဖော်ဝါရီ ၁၃ ရက်နေ့တွင် TNLA တပ်ဖွဲ့ဝင်များက ကွတ်ခိုင်ခရိုင်ရှိ ၎င်းတို့၏ အုပ်ချုပ်ရေးဌာနများကို အကြမ်းဖက်စီးနင်းခဲ့ပြီး ဝန်ထမ်းများကို ရိုက်နှက်မောင်းထုတ်ခဲ့ခြင်းကြောင့် တင်းမာမှုများ စတင်ခဲ့ခြင်းဖြစ်သည်ဟု ဆိုသည်။

MNDAA ဘက်က ပြဿနာများကို ငြိမ်းချမ်းစွာဖြေရှင်းရန် ငါးကြိမ်တိုင်တိုင် အကြောင်းကြားခဲ့သော်လည်း TNLA ဘက်က လျစ်လျူရှုခဲ့သည့်အပြင် ဖေဖော်ဝါရီ ၁၇ ရက်တွင် သိန္နီခရိုင်အတွင်းရှိ MNDAA ထိန်းချုပ်နယ်မြေများကို လုယူရန် ကြိုးပမ်းခဲ့ကြောင်း ထုတ်ပြန်ချက်တွင် ဖော်ပြထားသည်။

ထို့အပြင် ယနေ့ (မတ်လ ၁၄ ရက်) နံနက် ၉ နာရီခွဲခန့်တွင်လည်း သိန္နီမြို့နယ်အတွင်း ကင်းလှည့်နေသည့် MNDAA တပ်ဖွဲ့ဝင်များကို TNLA ဘက်က ကြားဖြတ်တိုက်ခိုက်ခဲ့သဖြင့် တန်ပြန်ခုခံတိုက်ခိုက်မှုများ ဖြစ်ပွားခဲ့ကြောင်း သိရသည်။

လက်ရှိတွင် သိန္နီနှင့် ကွတ်ခိုင်ဒေသအတွင်း TNLA ၏ အတင်းအဓမ္မ တပ်သားသစ်စုဆောင်းမှုများနှင့် လူမျိုးရေးပဋိပက္ခဖြစ်စေရန် လှုံ့ဆော်မှုများရှိနေကြောင်း MNDAA က စွပ်စွဲထားသည်။

အဆိုပါစွပ်စွဲချက်များနှင့် ပတ်သက်၍ TNLA ဘက်က တစ်စုံတစ်ရာ သတင်းထုတ်ပြန်ထားခြင်း မရှိသေးပေ။

MNDAA က ၎င်းတို့အနေဖြင့် မဟာမိတ်ချစ်ကြည်ရေးကို အလေးထားသော်လည်း “ဂုဏ်သိက္ခာ နင်းချေခံရခြင်းနှင့် လူမှုဘဝရှင်သန်ရေးကို ခြိမ်းခြောက်ခံရပါက အစွမ်းကုန် ခုခံကာကွယ်သွားမည်” ဟု သတိပေးထားသည်။