လက်ရှိဖြစ်ပွားနေသည့် အမေရိကန်-အစ္စရေးနှင့် အီရန်နိုင်ငံကြား ပဋိပက္ခများကြောင့် စွမ်းအင်သုံးစွဲမှု လျော့ချရန်အတွက် အစိုးရဝန်ထမ်းများ Work from Home အိမ်မှအလုပ်လုပ်ရန် ထိုင်းအစိုးရမှ အမိန့်ထုတ်ပြန်လိုက်သည်။

ကမ္ဘာ့စွမ်းအင် အရင်းအမြစ်ဖြစ်သော အရှေ့အလယ်ပိုင်း နိုင်ငံများတွင် စစ်ရေးပဋိပက္ခ ဖြစ်ပွားနေပြီး ရေနံနှင့် စွမ်းအင်ဈေးနှုန်းများ မတည်ငြိမ်ခြင်းကြောင့် အစိုးရအေဂျင်စီများ၊ နိုင်ငံပိုင်လုပ်ငန်းများအတွက် အိမ်မှအလုပ်လုပ်ရန် Work from Home အစီအမံများကို ထိုင်းအစိုးရမှ ယနေ့ (မတ်လ ၁၀ ရက်) တွင် ထုတ်ပြန်လိုက်ကြောင်း ထိုင်းဝန်ကြီးချုပ်ရုံး၏ ဒုတိယပြောရေးဆိုခွင့်ရှိသူမှ ထုတ်ဖော်ပြောဆိုခဲ့သည်။

အဆိုပါ အိမ်မှအလုပ်လုပ်ရန် စီမံချက်ကို ချက်ချင်း အကောင်အထည်ဖော်ရန်၊ ပြည်ပ လေ့လာရေးခရီးစဉ်များနှင့် လေ့ကျင့်ရေးများကိုလည်း ရပ်ဆိုင်းပြီး စွမ်းအင်သုံးစွဲမှု လျော့ချရာတွင် ပူးပေါင်းဆောင်ရွက်ရန် တိုက်တွန်းထားသည်။

အလားတူ ပုဂ္ဂလိကနှင့် အခြားကဏ္ဍများတွင်လည်း ရုံးအဆောက်အဦးများထဲ လျှပ်စစ်ဓာတ်အား သုံးစွဲမှု လျော့ချခြင်း၊ ဥပမာ – မလိုအပ်သော လျှပ်စစ်ပစ္စည်းများ ပိတ်ခြင်း၊ ဓာတ်လှေကား အသုံးပြုမှု လျှော့ချခြင်း၊ လေအေးပေးစက် Air-con ကို အပူချိန် ၂၆-၂၇ ဒီဂရီခန့်သာ ချိန်ညှိ အသုံးပြုခြင်း စသည့် အစီအမံများ လုပ်ဆောင်ကြရန် ထိုင်းနိုင်ငံ စွမ်းအင်ဝန်ကြီးဌာနမှ အဆိုပြုထားသည်။

ထို့အပြင် လောင်စာဆီ ချွေတာရေး အစီအမံများကိုလည်း မြှင့်တင်ပြီး ပုံမှန်ယာဉ်စစ်ဆေးခြင်း၊ သင့်လျော်သည့် အမြန်နှုန်းဖြင့် မောင်းနှင်ခြင်း၊ ကားအတူစီးနင်းခြင်း၊ အွန်လိုင်းအစည်းအဝေးနှင့် သင့်လျော်သလို အိမ်မှ အလုပ်လုပ်သည့် အစီအစဉ်များကို အားပေးကြောင်း ဆိုထားသည်။

လက်ရှိ ထိုင်းနိုင်ငံတွင် စက်သုံးဆီ (၆၅) ရက်စာ သိုလှောင်ထားပြီး အရှေ့အလယ်ပိုင်း ပြင်ပမှ ထပ်မံရရှိမည့် (၃၀) ရက်စာ လောင်စာဆီများ စုပေါင်းလျှင် (၉၅) ရက်စာအထိ ဖူလုံမှုရှိကြောင်း ထိုင်းနိုင်ငံ စွမ်းအင်ဝန်ကြီးမှ မတ်လ (၆) ရက်တွင် ပြောဆိုထားသည်။

ထိုင်းပြည်တွင်း စက်သုံးဆီ လိုအပ်ချက်ကို ထိန်းသိမ်းထားရန် ပြည်ပသို့ ရေနံတင်ပို့မှုကို ဆိုင်းငံ့ထားသော်လည်း စွမ်းအင်အရ အပြန်အလှန် မှီခိုနေရသည့် မြန်မာနှင့် လာအိုနိုင်ငံသို့ ချွင်းချက်အဖြစ် ဆက်လက်တင်ပို့နေကြောင်း ထိုင်းသတင်းဌာနများတွင် ဖော်ပြသည်။