“စုံ၊ မ ယာဉ်မောင်းနှင်ရက်” ကြောင့် ပြက္ခဒိန် စာရွက်တစ်ရွက်ဖြင့် မသူဇာ(အမည်လွှဲ) တစ်ယောက် ခေါင်းစားနေသည်။

မသူဇာတို့ နေအိမ်တွင် မ အက္ခရာ 3A … နံပါတ်ဖြင့် ကားတစ်စီးသာ ရှိထားသဖြင့် သူ့အနေဖြင့် ကလေးကျောင်းကြို၊ ပို့ရန်နှင့် အလုပ်သွားရန်အတွက် ပြက္ခဒိန်ကို ဟိုလှန်၊ ဒီလှန်ဖြင့် နေ့စဉ်ကြည့်နေရသည်မှာ အလုပ်တစ်ခု ဖြစ်လာသည်။

ထို့အပြင် စုံအက္ခရာ ကားမောင်းရမည့် ရက်တွင်လည်း မသူဇာအတွက် ကလေးကို ကျောင်းကြို၊ ပို့ရန်နှင့် အလုပ်သွားရန် တက္ကစီငှားစီးရသည်မှာလည်း ငွေကုန်ပေါက်တစ်ရပ် ဖြစ်ပြန်လေသည်။

“အခုက အလုပ်ကိုဖြစ်လို့ ကိုယ်ကားမမောင်းရတဲ့ရက်ဆိုရင် တက္ကစီငှားရတယ်လေ။ ပိုက်ဆံပိုကုန်တယ်။ နောက်ပြီး စုံရက်လား၊ မရက်လား မှတ်ရတာလည်း အလုပ်ကိုရှုပ်နေတာပဲ” ဟု မသူဇာတစ်ယောက် စိတ်ပျက်လက်ပျက်ဖြင့် ပြောလာသည်။

စစ်ကော်မရှင်ကတော့ စက်သုံးဆီ ချွေတာရေးဆိုသည့် အသစ်ချမှတ်လိုက်သည့် မူဝါဒသည် အလွန်ပင် စိတ်ပျက်စရာ ဖြစ်နေကြောင်းလည်း သူက ဆိုပြန်သည်။

ထိုစုံရက်၊ မ ရက်အလိုက် ခွဲခြားမောင်းနှင်စေသည့် စနစ်သစ်ကြောင့် ကျောင်းသားမိဘများ၊ အခြေခံလူတန်းစားများနှင့် ဈေးသည်များမှာ စားဝတ်နေရေးအတွက် အကျပ်အတည်းနှင့် သွားလာရေးအတွက် တွက်ချက်ရကာ စိန်ခေါ်မှုများနှင့် ရင်ဆိုင်နေရသည်။

အရှေ့အလယ်ပိုင်းဒေသရှိ စစ်ရေးပဋိပက္ခများကြောင့် ကမ္ဘာ့လောင်စာဆီ တင်သွင်းမှုလမ်းကြောင်းများတွင် အဟန့်အတား ဖြစ်ပေါ်နေခြင်းကို အကြောင်းပြ၍ မြန်မာနိုင်ငံအတွင်းရှိ ကိုယ်ပိုင်ယာဉ်များကို စုံ၊ မ နေ့ရက်အလိုက် ခွဲခြားမောင်းနှင်ရန် စစ်ကော်မရှင်က (မတ်လ ၃ ရက်) တွင် ထုတ်ပြန်လိုက်သည်။

“တစ်ခါမှ မကြားဖူးတဲ့ မူဝါဒတွေ ထုတ်လို့ထုတ်၊ လူကို ဘယ်လိုဒုက္ခပေးရမှာလဲဆိုတာ သူတို့ခေါင်းမှာ အမြဲရှိတယ်။ လူတွေ လွယ်ကူအောင် သူတို့မလုပ်ပေးဘူး။ ခက်ခဲအောင်ပဲ လုပ်ပေးကြတယ်” ဟု မသူဇာက ပြောသည်။
အဆိုပါစနစ်ကို မတ်လ ၇ ရက်မှစတင်ကာ အသိပညာပေးကာလအဖြစ် သတ်မှတ်ထားသော်လည်း လာမည့် မတ်လ ၁၄ ရက်နောက်ပိုင်းတွင် အဆိုပါစည်းကမ်းများကို မလိုက်နာပါက ထောင်ဒဏ်အထိ အရေးယူမည့် ပြစ်ဒဏ်များကြောင့် ဒေသခံပြည်သူများအကြား စိုးရိမ်မှုနှင့် ဝေဖန်မှုများ မြင့်တက်နေသည်။

“အလုပ်က နေ့တိုင်းသွားရတာ၊ ဆိုင်ကယ်က တစ်စီးပဲရှိတယ်။ မသွားရတဲ့ရက်က ပိုက်ဆံမရတော့ဘူး။ စားဝတ်နေရေးက ပိုခက်လာတာပေါ့” ဟု တောင်ကြီးမြို့မှ နေ့စားအလုပ်သမားတစ်ဦးက ၎င်း၏ အခက်အခဲကို ပြောပြသည်။

ထို့အပြင် စက်သုံးဆီဝယ်ယူရာတွင်လည်း ယာဉ်မောင်းလိုင်စင်ရှိမှသာ ရောင်းချပေးရန် ညွှန်ကြားထားခြင်းကြောင့် လိုင်စင်မဲ့ယာဉ်များကို အသုံးပြုနေသည့် ဒေသခံဈေးသည်များမှာ ဆီဝယ်ယူရန် ခက်ခဲနေကြောင်း သိရသည်။

သျှမ်းပြည်အရှေ့ပိုင်း တာချီလိတ်မြို့တွင် အဆိုပါစည်းကမ်းကို ချိုးဖောက်ပါက ရာဇသတ်ကြီးပုဒ်မ ၁၈၈ အရ အလုပ်မဲ့ထောင်ဒဏ် (၁) လ သို့မဟုတ် ငွေဒဏ် (၂) သောင်းကျပ် သို့မဟုတ် ဒဏ်နှစ်ရပ်လုံး ချမှတ်သွားမည်ဟု သတိပေးထားသည်။

တောင်ကြီးမြို့တွင် မတ်လ ၁၄ ရက်နေ့မှစ၍ အဆိုပါသတ်မှတ်ချက်များ အကြုံးဝင်မည်ဖြစ်ပြီး တည်ဆဲဥပဒေအရ အရေးယူသွားမည်ဟု ဆိုသည်။

သို့သော်လည်း အများပြည်သူသယ်ယူပို့ဆောင်ရေးယာဉ် (လိုင်းကား)၊ အငှားယာဉ် (Taxi)၊ လျှပ်စစ်ယာဉ် (EV)၊ လူနာတင်ယာဉ်၊ နိဗ္ဗာန်ယာဉ်နှင့် စည်ပင်အမှိုက်သိမ်းယာဉ်များကို နေ့စဉ်မောင်းနှင်ခွင့် ပြုထားသည်။

ကျောင်းကြိုပို့ယာဉ်များနှင့် စက်ရုံဝန်ထမ်း ကြိုပို့ယာဉ်များမှာမူ သက်ဆိုင်ရာဌာနများ၏ ထောက်ခံချက်ပါရှိပါက မောင်းနှင်ခွင့်ရမည်ဟု ထုတ်ပြန်ထားသော်လည်း ကျောင်းကြိုပို့ယာဉ်ဟူသော အဓိပ္ပာယ်ဖွင့်ဆိုချက်အပေါ် မိဘများအကြား ဒွိဟဖြစ်နေဆဲ ဖြစ်သည်။

ကိုယ်ပိုင်ယာဉ်ဖြင့် ကျောင်းပို့ရမည့် မိဘများအတွက် ယာဉ်နံပါတ် စုံ၊ မ ကန့်သတ်ချက်ကြောင့် သွားလာရေး အခက်အခဲ ကြုံတွေ့နေရကြောင်း ကျောင်းသားမိဘတစ်ဦးက ပြောသည်။

“အခုက ပညာပေးကာလ၊ ၁၄ ရက်နောက်ပိုင်း စုံ၊ မ နေ့ရက်အလိုက် မထွက်ရင် ဖမ်းမယ်လို့ ပြောတာပဲ။ ဘယ်ပုံစံနဲ့ လာမလဲမသိဘူး။ ၁၂ တန်းစာမေးပွဲကလည်း မနက်ဖြန်စမှာ၊ ကျောင်းကြိုပို့တာ ဘယ်လိုလုပ်ကြမယ် မသိပါဘူး။ တက္ကသိုလ်စာမေးပွဲကလည်း ၁၆ ရက်နေ့၊ အတော်ဂွကျတာပဲ” ဟု ကျောင်းသားမိဘတစ်ဦးက သျှမ်းသံတော်ဆင့်ကို ပြောသည်။
ထိုင်းနှင့် တရုတ်နိုင်ငံတို့မှ စက်သုံးဆီများကို အဓိကမှီခိုနေရသည့် မြဝတီ၊ တာချီလိတ်နှင့် မူဆယ်မြို့များတွင် ဆီဝယ်ယူရန် တန်းစီနေရရုံသာမက ဆီဆိုင်များက ရောင်းချပေးသည့် ပမာဏကိုပါ ကန့်သတ်လိုက်ကြောင်း ဒေသခံများက ပြောသည်။

ထိုင်း-မြန်မာနယ်စပ်မြို့ဖြစ်သည့် တာချီလိတ်တွင် စက်သုံးဆီဆိုင်များမှာ နေ့တစ်ဝက်သာ ဖွင့်လှစ်ပေးပြီး ဆိုင်ကယ်တစ်စီးလျှင် ထိုင်းဘတ်ငွေ ၅၀ ဖိုးနှင့် ကားတစ်စီးလျှင် ဘတ်ငွေ ၅၀၀ မှ ၁,၀၀၀ ဖိုးခန့်သာ ရောင်းချပေးတော့ကြောင်း တာချီလိတ်မြို့ခံ အမျိုးသမီးတစ်ဦးက ပြောသည်။

“တာချီလိတ်မှာတော့ တန်းစီရတယ်၊ လိုသလောက်မရပေမဲ့ တစ်ရက်စာ တစ်စီးတော့ ဖူလုံသွားတာပဲ။ ခရီးရှည်ကားသမားတွေအတွက်တော့ ခက်တာပေါ့။ ဆီဆိုင်တွေက နေ့တစ်ဝက်ပဲ ရောင်းတယ်” ဟု တာချီလိတ်မြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

တာချီလိတ်မြို့ရှိ ဆီဆိုင်များမှာ နံနက်ပိုင်း ခဏသာ ဖွင့်လှစ်ပေးသဖြင့် ဒေသခံများမှာ ဆီဝယ်ယူရန်ပင် ခက်ခဲနေကြောင်း သိရသည်။

လတ်တလောတွင် အများပြည်သူသယ်ယူပို့ဆောင်ရေးယာဉ်နှင့် လူနာတင်ယာဉ်များကို ကင်းလွတ်ခွင့် ပေးထားသော်လည်း ကိုယ်ပိုင်ယာဉ်ဖြင့် သွားလာရသည့် ကျောင်းသားမိဘများ၊ နေ့စားအလုပ်သမားများနှင့် ဈေးသည်များမှာ စက်သုံးဆီ ပြတ်လပ်မှုနှင့် စုံ၊ မ စနစ်၏ ကြားတွင် ဘဝရပ်တည်ရေးနှင့် သွားလာရေးအတွက် ကြီးမားသော စိန်ခေါ်မှုများနှင့် ရင်ဆိုင်နေရကြောင်း ပြောသည်။