သျှမ်းပြည် တောင်ပိုင်း မိုးဗြဲမြို့ အနောက်ဘက်ခြမ်း နှင့် ဖယ်ခုံမြို့ အနောက်ဘက်ခြမ်းတို့တွင် စစ်ကော်မရှင်တပ် နှင့် ကရင်နီတပ်ပေါင်းစုတို့ ထိတွေ့တိုက်ပွဲများ ဖြစ်ပွားနေကြောင်း သိရသည်။
ပြီးခဲ့သည့် (မတ်လ ၇ ရက်မှ ယမန်နေ့ ၁၀ ရက်) မိုးဗြဲမြို့ အနောက်ဘက်ခြမ်း နှင့် ဖယ်ခုံမြို့ အနောက်ဘက်ခြမ်း တို့တွင် စစ်ကော်မရှင်တပ်၊ ပအိုဝ်းပြည်သူ့စစ် (PNO) နှင့် ကရင်နီတော်လှန်ရေး တပ်ပေါင်းစုတို့ ထိတွေ့ တိုက်ပွဲများ ပြင်းထန်နေကြောင်း ရှေ့တန်းရဲဘော်တစ်ဦးက သျှမ်းသံတော်ဆင့်ကို ပြောသည်။
“၇ ရက်နေ့ နဲ့ ၈ ရက်က သူတို့ဘက်( စစ်ကော်မရှင်)က လက်နက်ငယ်ကော လက်နက်ကြီးကော သုံးပြီး တိုက်ပွဲဖြစ်တယ်။၉ ရက် နေ့လယ်ပိုင်းမှာတော့ နှစ်ဘက်တိုင်းပွဲနည်းနည်းပြင်းတယ်။ မိုးဗြဲ အနောက်ဘက်လည်း နှစ်ဘက် အပြန်အလှန်ပစ်နေတာတွေရှိတယ်။မိုးဗြဲဘက်မှာ စစ်တပ်က လက်နက်ကြီးကော ဒရုန်းကော နေ့တိုင်းနီးပါးသုံးတယ်။”ဟု ရှေ့တန်းရဲဘော်တစ်ဦးက ပြောသည်။
ပြီးခဲ့သည့် (မတ်လ ၇ ရက်) မိုးဗြဲမြို့ အနောက်ဘက်ခြမ်းတိုက်ပွဲတွင် စစ်ကော်မရှင်တပ် နှင့် လက်အောက်ခံ ပအိုဝ်းပြည်သူ့စစ်(PNO)တို့ လက်နက်ကြီး၊ဒရုန်များဖြင့် ပတ်ခတ် တိုက်ခိုက်မှုကြောင့် အနီးအနားရှိ ကျေးရွာနေ ဒေသခံများ အရေးပေါ်ပြောင်းရွှေ့ခဲ့ရကြောင်း သိရသည်။
မိုးဗြဲမြို့ အနောက်ဘက်ခြမ်းရှိ လွယ်ယင်းမင်္ဂလာကျေးရွာ နှင့် လာမောက်ရွာ ဖက်ကို စစ်ကောင်စီတပ် နှင့် PNO စစ်ကြောင်းထိုးမှုများရှိနေခြင်းကြောင့် ပြည်သူများအနေဖြင့် ကန့်သတ်ထားသည့် နယ်မြေများအတွင်း ဖြတ်သန်း သွားလာခြင်း လုံးဝ (လုံးဝ) မပြုရန် မိုးဗြဲပြည်သူ့ကာကွယ်ရေးတပ်မှ အသိပေး ထုတ်ပြန်ခဲ့သည်။
ဖယ်ခုံမြို့နယ် အနောက်ဘက်ခြမ်းတွင် စစ်ဘေးရှောင် (၆) ထောင်ကျော်ရှိပြီး ၂၀၂၅ခုနစ် နိုဝင်ဘာလ၌ စစ်ကောင်စီနှင့် ပအိုဝ်းပြည်သူ့စစ် (PNO )တို့ ပူးပေါင်းပြီး ကရင်နီတော်လှန်ရေး တပ်ပေါင်းစုတို့ တိုက်ပွဲဖြစ်ပွားမှုကြောင့် ထွက်ပြေးနေရသည့် စစ်ရှောင်များဖြစ်သည်။
Leave a Comments