သျှမ်းပြည် အရှေ့ပိုင်း တာချီလိတ်မြို့နယ်တွင် မိုးရွာသွန်းမှုကြောင့် ရပ်ကွက်အချို့ ရေကြီးရေလျှံမှုများ ကြုံတွေ့ခဲ့ရကြောင်း သိရသည်။
ယနေ့ (မတ်လ ၁၀ ရက်) မနက်ပိုင်း တာချီလိတ်မြို့နယ်တွင် မိုးရွာသွန်းမှုကြောင့် အမှတ် (၁) တံတားအနီးရှိ ပုန်းထွန်ရပ်ကွက်တွင် ရေကြီးရေလျှံမှုများ ဖြစ်ပွားခဲ့ကြောင်း တာချီလိတ်မြို့ ဒေသခံအမျိုးသမီးတစ်ဦးကပြောသည်။
“တာချီလိတ်ကတော့ မိုးခဏရွာတာနဲ့တင် ရေလျှံတာပဲ။ ချောင်းကာနံရံကလည်း မပြီးသေးဘူး။ လာမယ့် မိုးတွင်းဆိုရင် ဘယ်လိုလုပ်ကြမလဲ စိုးရိမ်ရတယ်” ဟု တာချီလိတ်မြို့၊ ပုန်းထွန်ရပ်ကွက်နေ အမျိုးသမီးတစ်ဦးက ပြောသည်။
“မနက်ပိုင်းက မိုးတအားသည်းလို့ ရပ်ကွက်ထဲရေတက်သွားတာ။နေ့လည်ပိုင်းထိ မိုးအုံ့နေတုန်းပါပဲ။ ရေမြောင်းတွေမရှိတာကြောင့် ရေကြီးတာလည်းပါတယ်။”ဟု တာချီလိတ်မြို့ဒေသခံ အမျိုးသမီးတစ်ဦးက ပြောသည်။
အလားတူ ယနေ့(မတ်လ ၁၀ ရက်)မနက်ပိုင်းတွင် တာချီလိတ်မြို့အပြင် ကျိုင်းတုံ၊ မိုင်းဖြတ်၊ တာချီလိတ်၊ မိုင်းလား၊ မိုင်းဆတ်၊ တာလေ နှင့် မိုင်းယုမြို့များ၌ မိုးရွာသွန်းခဲ့ကြောင်းသိရသည်။
သျှမ်းပြည် အရှေ့ပိုင်း တွင် ရွှေ၊သတ္တုတူးဖော်မှုအလွန်အကျွံတူးဖော်မှုကြောင့် မိုးရွာသွန်းလျှင် တာချီလိတ်မြို့အနိမ့်ပိုင်းရပ်ကွက်၌ ရေကြီးရေလျှံမှု တစ်နှစ်ထက် တစ်နှစ်ပိုဆိုးရွားလာသည်။
Leave a Comments