မြန်မာနိုင်ငံတွင် စက်သုံးဆီ ပြတ်လပ်မည်ကို စိုးရိမ်၍ ပြည်သူများအကြား ထိတ်လန့်ဝယ်ယူမှုများ ရှိနေသော်လည်း လက်ရှိတွင် ရက်ပေါင်း (၄၀) စာ အရန်စက်သုံးဆီ ရှိနေကြောင်းနှင့် စက်သုံးဆီတင်သင်္ဘောများ ထပ်မံရောက်ရှိရန်ရှိကြောင်း စစ်ကော်မရှင်၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ယမန်နေ့ (မတ်လ ၄ ရက်) တွင် ပြောကြားလိုက်သည်။

ပြီးခဲ့သည့် ရက်ပိုင်းအတွင်း စက်သုံးဆီချွေတာရန် စစ်ကော်မရှင်က ထုတ်ပြန်လိုက်ပြီးနောက်ပိုင်း ရန်ကုန်အပါအဝင် မြို့ကြီးအချို့ရှိ စက်သုံးဆီဆိုင်များတွင် မော်တော်ယာဉ်များ တန်းစီဝယ်ယူမှုများ ဖြစ်ပေါ်ခြင်းအပေါ် တုံ့ပြန်ရာတွင် ၎င်းက ယခုကဲ့သို့ ထည့်သွင်းပြောဆိုခဲ့ခြင်း ဖြစ်သည်။

“ကျနော်တို့နိုင်ငံမှာ အရန်စက်သုံးဆီမရှိလို့ မဟုတ်ပါဘူး။ ရေရှည်ဖြစ်လာနိုင်မယ့် ကိစ္စတွေကို တွက်ဆပြီး ခြိုးခြံချွေတာဖို့အတွက်ပဲ ထုတ်ပြန်ခဲ့တာပါ” ဟု ဗိုလ်ချုပ်ဇော်မင်းထွန်းက ပြောကြားခဲ့သည်။

လက်ရှိ မြန်မာနိုင်ငံတွင် ဓာတ်ဆီဂါလန် သန်း ၆၀ နှင့် ဒီဇယ်ဆီဂါလန် သန်း ၇၀ ခန့် ရှိပြီး ပုံမှန်သုံးစွဲမှုနှုန်းဖြင့် ရက်ပေါင်း (၄၀) စာ ရှိနေကြောင်း ၎င်း၏ ပြောကြားချက်အရ သိရသည်။

မြန်မာနိုင်ငံ၏ နေ့စဉ်စက်သုံးဆီသုံးစွဲမှုမှာ ဓာတ်ဆီ ၁ ဒသမ ၅ သန်းဂါလန်နှင့် ဒီဇယ် ၁ ဒသမ ၇ သန်းဂါလန်၊ စုစုပေါင်း ၃ ဒသမ ၂ သန်းဂါလန်ခန့် ရှိကြောင်း သိရသည်။

လက်ရှိတွင် ဆိပ်ကမ်း၌ စက်သုံးဆီချရန် သင်္ဘော ၂ စင်း ရောက်ရှိနေပြီး လာမည့်ရက်ပိုင်းအတွင်း ဆိုက်ကပ်ရန် ဝယ်ယူထားပြီးသား သင်္ဘော ၁၄ စင်း လမ်းခရီးတွင် ရှိနေသောကြောင့် ပြတ်လပ်စရာအကြောင်းမရှိကြောင်း ၎င်းက ဆိုသည်။

အိမ်နီးချင်း ထိုင်းနိုင်ငံမှ စက်သုံးဆီတင်ပို့မှု ရပ်ဆိုင်းလိုက်သည်ဆိုသော ကောလာဟလများနှင့် ပတ်သက်၍လည်း မြန်မာနိုင်ငံသည် စက်သုံးဆီကို စင်ကာပူနှင့် မလေးရှားနိုင်ငံတို့မှ အဓိက တင်သွင်းနေခြင်းဖြစ်သောကြောင့် အဆိုပါသတင်းများမှာ အခြေအမြစ်မရှိကြောင်း ဗိုလ်ချုပ်ဇော်မင်းထွန်းက ပြောကြားခဲ့သည်။

သို့သော် ကမ္ဘာ့ဈေးကွက်အခြေအနေအရ စက်သုံးဆီဈေးနှုန်းများ အပြောင်းအလဲ ရှိနိုင်ကြောင်း ဗိုလ်ချုပ်ဇော်မင်းထွန်းက ဝန်ခံပြောကြားခဲ့ပြီး စက်သုံးဆီရှိလျက်နှင့် ရောင်းချခြင်းမပြုသည့် ဆိုင်များကိုလည်း စွမ်းအင်ဝန်ကြီးဌာနသို့ တိုင်ကြားနိုင်ကြောင်းနှင့် အရေးယူမှုများ ပြုလုပ်သွားမည်ဖြစ်ကြောင်း သတိပေးထားသည်။

စွမ်းအင်ဝန်ကြီးဌာနအနေဖြင့် စက်သုံးဆီ ပြတ်လပ်မှုမရှိစေရေးနှင့် ထောက်ပံ့ရေးကွင်းဆက် မပြတ်တောက်စေရေးအတွက် အများပြည်သူသို့ ထပ်မံအသိပေးချက်များ ထုတ်ပြန်သွားရန် ရှိနေကြောင်းလည်း သိရသည်။