“ရွှေတြိဂံ ဒေသ” သျှမ်းပြည်အရှေ့ပိုင်း တာချီလိတ်မြို့ပေါ်သို့ ခိုးဝင်လာပြီး ကျားဖြန့် အွန်လိုင်းလုပ်ငန်း လာရောက်လုပ်ကိုင်သည့် နိုင်ငံခြားသား ၄၀၀ နီးပါးနှင့် ဆက်စပ်ပစ္စည်းများကို ဖမ်းဆီးရမိကြောင်း သတင်းရရှိသည်။
ယမန့်နေ့ (မတ်လ ၃ ရက်) ညနေပိုင်းတွင် တာချီလိတ်မြို့ မယ်ခေါင်ရပ်ကွက် (၂)၊ မယ်ခေါင်(၂)လမ်းတွင် ဖွင့်လှစ်ထားသည့် “ အပြည်ပြည်ဆိုင်ရာ ဟိုတယ်”တွင် နေထိုင်ပြီး ကျားဖြန့် အွန်လိုင်းငွေလိမ်လုပ်ငန်း လုပ်ကိုင်သော နိုင်ငံခြားသား (၃၉၃)ဉီးကို စစ်ကော်မရှင်ဘက်က ဝင်ရောက်စီးနင်း ဖမ်းဆီးခဲ့ကြောင်း သတင်းထုတ်ပြန်ခဲ့သည်။
အဆိုပါ ဖမ်းဆီးခံရသည့် နိုင်ငံခြားသား (၃၉၃)ဉီးထဲတွင် တရုတ်နိုင်ငံသား အမျိုးသား (၂၈၉)ဉီး၊ အမျိုးသမီး (၈)ဉီး၊ မလေးရှားနိုင်ငံသား အမျိုးသား (၃၁)ဉီး၊ အမျိုးသမီး (၇)ဉီး၊ ဗီယက်နမ်နိုင်ငံသား အမျိုးသား(၄၆)ဉီး၊ အမျိုးသမီး (၁၁)ဉီး၊ ဖိလစ်ပိုင်နိုင်ငံသား အမျိုးသမီး (၁)ဉီး တို့ ပါဝင်ကြောင်း ထုတ်ပြန်ချက်တွင် ရေးသားထားသည်။
“အခုဖမ်းမိတာက နိုင်ငံခြားသားတွေပဲ။ ဒီလူတွေက ဘယ်ကနေဝင်လာလဲ၊ ဒီလူတွေက ဒီဟိုတယ်မှာ နေတာ ဘယ်လောက်ကြာပြီလဲ ဆိုတာ တာချီလိတ်က ရဲတွေ မသိဘူးဆိုတာ မဖြစ်နိုင်ဘူး။ လဝကတွေလည်း ငွေရတုန်း လွတ်ထားတာ၊ အခုက ဘာနဲ့ညှိလို့ ဖမ်းလဲမသိဘူး” ဟု တာချီလိတ်ဒေသခံ အမျိုးသားတစ်ဉီးက သျှမ်းသံတော်ဆင့် ကို ပြောသည်။
ထို “အပြည်ပြည်ဆိုင်ရာ ဟိုတယ်”သည် စစ်အာဏာသိမ်းပြီးနောက် ၂၀၂၂ ခုနှစ်နောက်ပိုင်း ဖွင့်လှစ်လာသည့် ဟိုတယ်ဖြစ်ပြီး၊ ထိုဟိုတယ်သည် ကျားဖြန့်လုပ်ကိုင်သော နိုင်ငံခြားသားများသာ အဓိက နေထိုင်သည့်နေရာဖြစ်ပြီး ခရီးသွား ဧည့်သည် လာရောက် တည်းခိုသူ မရှိကြောင်းလည်း ၎င်းဟိုတယ်သို့ ပစ္စည်းသွားရောက်ပို့ပေးဖူးသည့် အမျိုးသမီးတစ်ဉီးက ပြောသည်။
“အဲ့ဟိုတယ်က အရမ်းကြီးတယ်၊ အတွင်းထဲလည်း တော်တော်ကျယ်တယ်။ သာမန်လူတွေ တည်းတာ မတွေ့ဖူးဘူး။ ကျမ တစ်ခါ အွန်လိုင်းလုပ်နေသူကို ပစ္စည်းသွားပို့ဖူးတယ်။ အပြင်လူတွေ ဝင်ဖို့က ခက်ခဲတယ်” ဟု ၎င်းအမျိုးသမီးက ဆိုသည်။
အဆိုပါ နိုင်ငံခြားသား (၃၉၃)ဉီးသည် ပြီးခဲ့သည့် ၂၀၂၅ ခုနှစ် နှောင်းပိုင်းကာလ လာအိုနိုင်ငံတွင် ကျားဖြန့် အွန်လိုင်းလိမ်လည်မှုကို လာအိုနိုင်ငံမှ အာဏာပိုင်များက ဝင်ရောက်ဖမ်းဆီးမှုကြောင့် မြန်မာနိုင်ငံဘက်ခြမ်းသို့ ပြောင်းရွှေ့လာသည့် သူများလည်း ဖြစ်နိုင်ကြောင်း အသက် (၄၀)အရွယ်ရှိ တာချီလိတ်ဒေသခံ အမျိုးသမီးက ဆိုသည်။
ထို “ အပြည်ပြည်ဆိုင်ရာ ဟိုတယ်”ကို တာချီလိတ်မြို့ ဒေသခံ အခေါ်အဝေါ်အရ ‘ဝ’ ရုံးဟုလည်း ခေါ်ဝေါ်ကြကြောင်း၊ ဟိုတယ်ခြံသည် အမြဲတမ်းပိတ်ထားပြီး တရုတ်နိုင်ငံသားများ အဝင်အထွက် လုပ်နေသည့် နေရာတစ်ခုလည်း ဖြစ်ကြောင်း ၎င်းအမျိုးသမီးက ပြောပြသည်။
“တာချီလိတ်က ကျားဖြန့်တွေက လာအိုဘက်ဖမ်းရင် ဒီဘက်ပြောင်းလာ၊ ဒီဘက်ခြမ်းဖမ်းရင် လာအိုဘက် ပြောင်းနေပဲ။ အခု ဖမ်းလိုက်ရင် နည်းနည်း ပြန်ငြိမ်သွားမယ်။ ပြီးရင် ပြန်ပေါ်လာတာပဲ” ဟု ၎င်းအမျိုးသမီးက ထပ်လောင်းပြောသည်။
“အပြည်ပြည်ဆိုင်ရာ ဟိုတယ်”တွင် ဖမ်းမိသည့် ကျားဖြန့်အွန်လိုင်း ဆက်စပ်ပစ္စည်းများမှာ ကွန်ပျူတာ ၁၇၄ လုံး၊ CPU ၇၀ လုံး၊ Starlink (စတားလင့်ခ်) အင်တာနက်စက် ၉ လုံး၊ ဖုန်းမျိုးစုံ ၂၃၃ လုံးတို့ကို သိမ်းဆည်းရမိခဲ့ကြောင်း ထုတ်ပြန်ချက်အရ သိရသည်။
ထိုဖမ်းဆီးထိန်းသိမ်းထားသည့် အွန်လိုင်းကျားဖြန့်လုပ်ငန်း လုပ်ကိုင်သူ နိုင်ငံခြားသားများကို လုပ်ထုံးလုပ်နည်းများနှင့် အညီ ၎င်းတို့၏ သက်ဆိုင်ရာနိုင်ငံများသို့ အမြန်ဆုံး လွှဲပြောင်း ဆောင်ရွက်သွားမည်ဖြစ်ပြီး၊ သိမ်းဆည်းရမိသည့် စက်ပစ္စည်းများကိုလည်း ထပ်မံ အသုံးမပြုနိုင်စေရန် စနစ်တကျ ဖျက်ဆီးသွားမည်ဟု ထုတ်ပြန်ချက်တွင် ဖော်ပြထားသည်။
အလားတူ ယမန်နေ့ (မတ်လ ၃ ရက်) တွင် အမေရိကန် စုံစမ်းစစ်ဆေးရေးဗျူရို (FBI)မှ အရှေ့တောင်အာရှတွင် လုပ်ရှားနေသည့် အွန်လိုင်းငွေလိမ်ဂိုဏ်းများကို နှိမ်နှင်းရန် အတွက် ထိုင်းနိုင်ငံ ဘန်ကောက်မြို့ရှိ ရုံးခွဲတွင် အခြေစိုက်ပြီး ထိုင်းအာဏာပိုင် အဖွဲ့အစည်းများ၊ ဒေသတွင်း မိတ်ဖက်အဖွဲ့အစည်းများနှင့် ပူးပေါင်းဆောင်ရွက်နေကြောင်း လူမှုမီဒီယာတို့တွင် ထုတ်ပြန်ခဲ့သည်။
ထိုင်းနိုင်ငံဘက်ကလည်း ဒေသတွင်း၌ လည်ပတ်နေသော နယ်စပ်ဖြတ်ကျော်ပြီး အွန်လိုင်း ငွေကြေးလိမ်လည်မှု ကွန်ရက်များကို နှိမ်နင်းရန်အတွက် နိုင်ငံတကာ ပူးပေါင်းဆောင်ရွက်မှုများကို အရှိန်မြှင့်လုပ်ဆောင်နေကြောင်း ထုတ်ဖော်ပြောဆိုထားသည်။
ပြီးခဲ့သည့် (ဖေဖော်ဝါရီ ၄ ရက်)တွင်လည်း တာချီလိတ်မြို့ ဆေးခန်းရပ်ကွက်ရှိ ရောင်နီဦးဝန်း အတွင်း စစ်ကော်မရှင်တပ်နှင့် ၎င်းလက်အောက်ခံ ဌာနဆိုင်ရာ ပူးပေါင်းအဖွဲ့များက ဝင်ရောက် စီးနင်းခဲ့ရာ ကျားဖြန့်အွန်လိုင်းလုပ်ငန်းလုပ်ကိုင်သည့် တရုတ်နိုင်ငံသား ၁၀၀ ကျော် ဖမ်းဆီးရမိခဲ့သည်။
သျှမ်းပြည်အတွင်းလုပ်ရှားနေသည့် ကျားဖြန့် အွန်လိုင်းလုပ်ငန်းရှိသည့်နေရာများကို စစ်ကော်မရှင်တပ်နှင့် ၎င်းလက်အောက်ခံ ဌာနဆိုင်ရာ ပူးပေါင်းအဖွဲ့များက မကြာခဏ ဝင်ရောက်စီးနင်း ဖမ်းဆီးမှုများ ပြုလုပ်နေသော်လည်း လက်ရှိချိန်ထိ ပပျောက်သွားခြင်းမရှိသေးကြောင်း သိရသည်။
လက်ရှိအချိန်တွင် ကျားဖြန့် အွန်လိုင်းလုပ်ငန်းများသည် နိုင်ငံတကာ၏ နှိမ်နင်းမှုများ ရှိနေသော်လည်း မြန်မာနိုင်ငံ၏ ဝေးလံခေါင်ဖျားသော နယ်မြေများ အထူးသဖြင့် သျှမ်းပြည်ရှိ တောတွင်းဒေသများ နှင့် နယ်စပ်ဒေသအချို့တွင် လက်နက်ကိုင်အဖွဲ့အစည်းများနှင့် ပြည်သူ့စစ်များ၏ အကာအကွယ်ဖြင့် ဆက်လက်လည်ပတ်နေဆဲ ဖြစ်သည်။
Leave a Comments