သျှမ်းပြည်တောင်ပိုင်း ပင်းတယ၊ ရွာငံ၊ ဟဲဟိုးနှင့် အောင်ပန်းမြို့များတွင် ရာသီပေါ် မုန်ညှင်းထုပ်များ ဈေးအဆမတန် ကျဆင်းနေသောကြောင့် လွှင့်ပစ်နေရပြီး တောင်သူများ အရှုံးပေါ်နေကြောင်း စုံစမ်းသိရသည်။

ဖေဖော်ဝါရီလ ဒုတိယပတ်မှ စတင်ပြီး သျှမ်းပြည်တောင်ပိုင်းတွင် ရာသီအလိုက် စိုက်ပျိုးထွက်ရှိသည့် မုန်ညှင်းထုပ် တစ်ပိဿာလျှင် ငွေကျပ် (၂၀၀) မှ (၃၀၀) အထိသာ ပွဲစားများက ဈေးနှိမ် ဝယ်ယူနေပြီး တောင်သူများအတွက် အရင်း မကျန်သည်အထိ အရှုံးပေါ်နေခြင်းကြောင့် မုန်ညှင်းထုပ်များကို လွှင့်ပစ်နေရသည်။

ထို့ကြောင့် မုန်ညှင်းထုပ် စိုက်ပျိုးသူများသည် ငွေကျပ်သိန်း (၅၀) ရင်းလျှင် သိန်း(၂၀) ဝန်းကျင်ခန့်သာ ပြန်ရသောကြောင့် တောင်သူများ အရှုံးပေါ်နေကြသည်။

“အောင်ပန်းမှာတောင် တစ်ပိဿာ (၃၀၀)ပဲ ရှိတယ်၊ အိမ်အထိ လာဝယ်ရင် (၂၀၀)တဲ့။ အမြတ်မဆိုထားနဲ့ အရင်းတောင် ပြန်မရဘူး၊ ပွဲစားတွေလည်း ဈေးရမ်းဆ နှိမ်တာ။ တောင်သူတွေပဲ မွဲပြီး ပွဲစားတွေပဲ ချမ်းသာသွားကြတာ။ ဈေးကောင်းတဲ့ အခါကျရင်လည်း တစ်ပိဿာ တစ်သောင်း ဝန်းကျင်အထိရတာ၊ စျေးကျရင်လည်း ကုန်းကောက်စရာ မရှိဘူး”ဟု ပင်းတယဒေသခံ စိုက်ပျိုးရေး လုပ်ကိုင်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုကဲ့သို့ ရာသီပေါ် စိုက်ပျိုးသီးနှံများ ဈေးကျဆင်းနေခြင်းမှာ ကုန်သွယ်ရေးလမ်းကြောင်း ခက်ခဲမှုရှိနေခြင်းကြောင့် သော်လည်းကောင်း၊ နွေဦးရာသီ ရောက်လာသောကြောင့် ကုန်စိမ်းများ ကြာရှည်မခံခြင်း စသည်တို့ကြောင့်လည်း ဖြစ်နိုင်သည်ဟု အဆိုပါ အမျိုးသားက ပြောသည်။

သျှမ်းပြည်တောင်ပိုင်းတွင် မုန်ညှင်းဖြူ၊ မုန်ညှင်းထုပ်နှင့် တခြားကုန်စိမ်းများ ဈေးကောင်းမရ၍ လွှင့်ပစ်နေချိန် ရန်ကုန်၊ မန္တလေးနှင့် အခြားသော မြို့ကြီးများတွင် ဈေးကြီးပေး၍ ဝယ်စားနေရကြောင်း သိရသည်။

“ကျနော့်အမေဆို မုန်ညှင်းစိုက်ပြီး ကျနော့်ကို ကျောင်းထားတာ၊ အခုဆို ကျောင်းပါ ထွက်ရတော့မယ်။ ကျောင်းထွက်ရင်လည်း အလုပ်က ရှာရခက်တယ်၊ ပွဲစားတွေက ဈေးအရမ်းနှိမ်တော့ တောင်သူတွေပဲ အဆင်မပြေ ဖြစ်ကြရတယ်။ ပင်ပန်းသမျှ မောသမျှ ဘာမှ အဖတ်မတင်ဘူး”ဟု ရွာငံဒေသခံ လူငယ်အမျိုးသား တစ်ဦးက ပြောသည်။

ဈေးကောင်းရရှိနိုင်သည့် မြို့ကြီးများသို့ ကိုယ်တိုင်သွားရောက် ရောင်းချရန် အဆက်အသွယ် မရှိကြသောကြောင့် ပွဲစားများထံ တစ်ဆင့်ခံ ရောင်းချနေကြရပြီး မုန်ညှင်းထုပ်များကို လိုအပ်သူများ မိမိစရိတ်နှင့် လာရောက်ယူနိုင်ကြောင်း ၎င်းအမျိုးသားက ထပ်လောင်းပြောသည်။
ထို့အပြင် မုန်ညှင်းထုပ် ပေါများလွန်းသောကြောင့် နွားပင် မစားတော့ကြောင်းနှင့် မုန်ညှင်းထုပ်များကို အခြားနည်းလမ်းဖြင့် ကုန်ချောထုတ်လုပ်ကာ ရောင်းချနိုင်ရန် အဆင့်မြှင့်ထုတ်ကုန် နည်းလမ်းကောင်းများ ကျေးရွာဘက်တွင် လိုအပ်နေကြောင်း သိရသည်။

အလားတူ ဖေဖော်ဝါရီလ ၂၃ ရက်နေ့မှ စပြီး သျှမ်းပြည်တောင်ပိုင်းမှ ထွက်သည့် စတော်ဘယ်ရီဈေးနှုန်းများ တစ်ပုံးလျှင် ငွေကျပ် (၅၀၀၀) မှ (၃၀၀၀) အထိ ကျဆင်းနေပြီး တောင်သူများ အမြတ်ပင် မရရှိတော့ကြောင်း သိရသည်။

သျှမ်းပြည်တောင်ပိုင်းမှ ဒေသခံ အများစုသည် စိုက်ပျိုးရေးဖြင့် အသက်မွေးဝမ်းကျောင်း ပြုနေကြရပြီး ပညာရေး၊ ကျန်းမာရေး၊ စီးပွားရေး စသည်တို့ကို စိုက်ပျိုးရေးလုပ်ငန်းမှ ရသည့် ဝင်ငွေဖြင့်သာ အထောက်အကူပြု မှီခိုနေကြရသည်။