သျှမ်းပြည် တာချီလိတ်မြို့တွင် အသက် ၂၁ နှစ် အရွယ်ရှိ အမျိုးသမီးငယ်တစ်ဦး သေဆုံးမှုတွင် အလောင်းဖျောက်ရန် ပူးပေါင်းကြံစည်ခဲ့သူ အမျိုးသားတစ်ဦးကို ဖမ်းဆီးရမိထားကြောင်း စုံစမ်းသိရသည်။

ဖြစ်စဉ်မှာ အသက် ၂၁ နှစ် အရွယ်ရှိ အမျိုးသမီးငယ်သည် ပြီးခဲ့သည့် ဖေဖော်ဝါရီ ၁၃ ရက်တွင် တာချီလိတ်မြို့ရှိ Sky Club မှအပြန် အမျိုးသားတစ်ဦးနှင့် ပျောက်ဆုံးသွားခဲ့ပြီး၊ ဖေဖော်ဝါရီလ ၁၆ ရက်တွင် စောင်ဖြင့်ပတ်ထားသည့် သေဆုံးနေသော ရုပ်အလောင်းကို အရှေ့မြို့ပတ်လမ်း တစ်နေရာတွင် တွေ့ရှိခဲ့သည်။

ထို့နောက် သေဆုံးနေသည့် အမျိုးသမီး အလောင်းကို သွားရောက်သယ်ဆောင်ခဲ့သည့် တာချီလိတ်မြို့ရှိ စစ်တပ်လက်အောက်ခံ သက်ဆိုင်ရာ ရဲတပ်ဖွဲ့များမှ မိသားစုဝင်များထံ အကြောင်းကြားခြင်းမရှိဘဲ မီးသင်္ဂြိုဟ်ခဲ့သည်။

ထိုအမျိုးသမီးအလောင်း ဖျောက်ပစ်ရာတွင် ပူးပေါင်းကြံစည်သူ အဖြစ် ပါဝင်ခဲ့သည့် အမျိုးသားတစ်ဦးကို စစ်ကောင်စီလက်အောက်ခံ ရဲတပ်ဖွဲ့က ဖေဖော်ဝါရီလ ၂၄ ရက်တွင် ဖမ်းဆီးထိန်းသိမ်းခဲ့ကြောင်း သေဆုံးသူနှင့် နီးစပ်သည့် ဆွေမျိုးတစ်ဉီးက သျှမ်းသံတော်ဆင့် ကို ပြောသည်။

“အဲ့ဒီ အမျိုးသမီးသေဆုံးတဲ့ ဖြစ်စဉ်မှာက ၃ ယောက်ရှိတယ်၊ အခုတစ်ယောက်က သူ့ကို ဝိန်းကျောက်ဘက်မှာ ဖမ်းမိတယ်တဲ့။ မိတာက တစ်ယောက်ပဲ မိထားသေးတယ်၊ ဒီတစ်ယောက် ဖမ်းခံရပြီး အဲ့အမျိုးသမီးသေဆုံးတဲ့ ပုံတွေ ထပ်ထွက်လာတာ။ ကားပေါ်တင်တဲ့ ပုံတွေလည်း ထွက်လာတယ်”ဟု သေဆုံးသူနှင့် နီးစပ်သည့် ဆွေမျိုးတစ်ဉီးက ပြောသည်။

ပူးပေါင်းကြံစည်သူအဖြစ် ရဲတပ်ဖွဲ့ဖမ်းဆီးထားသည့် အမျိုးသားသည် အသက် (၂၅) နှစ်ဝန်းကျင် စိုင်းဇော်ပိုင် ဆိုသူ ဖြစ်ပြီး တာချီလိတ်မြို့ ပါလျှံ(၁) ၊ ရန်အောင်မြေ ရပ်ကွက်တွင် နေထိုင်သူဖြစ်ကြောင်း သိရသည်။

ဖမ်းဆီးရမိသူကို ဆက်လက်စစ်ဆေးခဲ့ရာ အလောင်းဖျောက်ဖျက် ကျူးလွန်ရာတွင် ဉာဏ်လင်းထက် (ခ) အားစန်းကော နှင့် မိခင်ဖြစ်သူ ဒေါ်နန်းကိန်ခမ်း ဆိုသူ တရားခံနှစ်ဦး ထပ်မံပါဝင်ပြီး လက်ရှိတွင် ထွက်ပြေးလွတ်မြောက် နေဆဲဖြစ်ကြောင်း သေဆုံးသူနှင့် နီးစပ်သည့် ဆွေမျိုးတစ်ဉီးက ဆက်ပြောသည်။

“သူတို့ထပ်စစ်မေးတော့ ၂ ယောက်ရှိတယ်တဲ့။ နှစ်ယောက်က သူတို့လည်း မဖမ်းမိသေးဘူး။ ထိုင်းဘက်ပြေးသွားတယ် ပြောတယ်။ သူ့ချစ်သူဆိုတဲ့ တစ်ယောက်နဲ့ အဲ့ကောင်လေးရဲ့ အမေနဲ့။ အဲ့ကောင်လေးက သူ့ကို ကားပေါ်ခေါ်တင်တဲ့ CCTV ပုံတွေလည်း ထွက်လာတယ်”ဟု သေဆုံးသူနှင့် နီးစပ်သည့် ဆွေမျိုးတစ်ဉီးက ပြောသည်။

ထိုအမျိုးသမီး သေဆုံးမှုနှင့် ပတ်သက်ပြီး အမှုမှန်ပေါ်ထွက်စေရန်နှင့် အလောင်းဖျောက် ပြစ်မှုကျူးလွန်သည့် တရားခံများကို သက်ဆိုင်ရာ တာဝန်ရှိသူများမှ ထိရောက်စွာ အရေးယူနိုင်မည်ကို မျှော်လင့်မိကြောင်း သေဆုံးသူနှင့် နီးစပ်သည့် ဆွေမျိုးတစ်ဉီးက ပြောသည်။

“သူ့အတွက်လည်း အကောင်းဆုံးတော့ အမှုမှန် ပေါ်ထွက်လာစေချင်တယ်။ သူလည်း အဲ့လို ရက်ရက်စက်စက်နဲ့ ဆုံးသွားရတာဆိုတော့ အမြန်ဆုံး အမှုမှန်နဲ့ သက်ဆိုင်ရာတွေကလည်း တရားခံတွေကို အဘက်ဘက်ကနေ တတ်နိုင်သလို အရေးယူစေချင်တယ်”ဟု ၎င်းက ဆက်ပြောသည်။

အဆိုပါ အမှုအခင်းနှင့် ပတ်သက်ပြီး သေဆုံးသူ၏ မိသားစုကို ဆက်သွယ်သိရှိသည်အထိ မစောင့်ခဲ့ဘဲ ရဲတပ်ဖွဲ့မှ အလောင်းဖျောက် မီးသင်္ဂြိုဟ်လိုက်သည့် ကိစ္စအပေါ် မြို့ခံများမှ အကြီးအကျယ် ဝေဖန်မှုများ ရှိနေသည့်အပြင် လက်ရှိ ပစ်မှုကျူးလွန်ပြီး ထွက်ပြေးလွတ်မြောက်နေသည့် တရားခံ သားအမိ ၂ ဦးသည် သက်ဆိုင်ရာ တာဝန်ရှိသူများနှင့် ဆက်စပ်မှု ရှိနိုင်ကြောင်း ပြောဆိုသုံးသပ်မှုများလည်း ရှိနေသည်။

စစ်အာဏာသိမ်းပြီးနောက်ပိုင်း ထိုင်း-မြန်မာနယ်စပ်ရှိ တာချီလိတ်မြို့တွင် တရားဥပဒေစိုးမိုးမှု ကင်းမဲ့လာသည့်အပြင် အပြစ်မဲ့ ပြည်သူများ ပျောက်ဆုံးခြင်း၊ ပြန်ပေးဆွဲခံရခြင်း စသည့် ပြစ်မှုကျူးလွန်ခြင်း အမျိုးမျိုးကို ခံနေရသည့် အပြင် သက်ဆိုင်ရာ တာဝန်ရှိသူများမှ ထိရောက်စွာ အရေးယူပေးနိုင်ခြင်း မရှိ‌ကြောင်း ဒေသခံများက ပြောသည်။