သျှမ်းပြည်တောင်ပိုင်း တောင်ကြီးမြို့ အရှေ့မြို့ပတ်လမ်းရှိ ဗိုလ်ချုပ်အောင်ဆန်း အားကစားကွင်း ဘေးပတ်ပတ်လည်တွင် ဆောက်လုပ်ထားသည့် တိုက်ခန်းနေပင်စင်စားများကို ဖိအားပေးကာ အေးသာယာဘက်သို့ ပြောင်းရွှေ့ရန် အတင်းလက်မှတ်ထိုးခိုင်းနေကြောင်း သတင်းရရှိသည်။

ယမန်နေ့ (ဖေဖော်ဝါရီလ ၁၉ ရက်)တွင် စစ်တပ်လက်အောက်ခံ သျှမ်းပြည်နယ် အစိုးရအဖွဲ့မှ တိုက်ခန်းများ၊ ဆိုင်ခန်းများတွင် နေထိုင်သူများကို နေရာပြောင်းရွှေ့ပေးရန် ဆွေးနွေးခဲ့ကြပြီး ဆိုင်ခန်းနေသူများကို တောင်ကြီးမြို့ မီးပုံးပျံကွင်း ဘေးရှိ တိုက်ခန်း သို့ ပြောင်းရွှေ့ခိုင်းပြီး ပင်စင်စားများကို အေးသာယာသို့ ပြောင်းရွှေ့ခိုင်းခဲ့သည်။

အဆိုပါ ပင်စင်စားများ ပြောင်းရွှေ့ရမည့် အေးသာယာမှ မင်းကျန်စစ် အိမ်ယာသည် လူသူမနေသည့် အိမ်ယာဖြစ်သည့်အပြင် တစ်လလျှင် ငွေကျပ် သုံးသောင်း ပေးသွင်းရမည် ဖြစ်ပြီး အမည်ပေါက်စာရင်း၊ ငှားရမ်းခွင့်များ မရရှိဟု သိရသည်။

“တရားမျှတမှု ရချင်တယ်၊ ပင်စင်စားတွေကို အရေးမပါတော့လို့ ချောင်ကြားထဲ ပို့လိုက်သလိုပဲ။ ပြောင်းခိုင်းရင် မျှမျှတတ လုပ်ပေးတာ မဟုတ်ဘူး၊ မြို့ပေါ်ဆို အကုန်မြို့ပေါ် ပြောင်းခိုင်းတာ မဟုတ်ဘူး။ ပြောင်းရွှေ့ဖို့ မနေ့က စာရွက်မှာ လက်မှတ်ထိုးခိုင်းတာ မထိုးခဲ့ဘူး”ဟု တောင်ကြီးမြို့ခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

အေးသာယာမြို့ရှိ မင်းကျန်စစ် အိမ်ယာမှ အခန်းတစ်ခန်း သို့မဟုတ် အေးသာယာမှ မြေကွက်ယူမည် ဆိုပါက ငွေကျပ်သိန်း ငါးဆယ် အရင်ပေးသွင်းရမည် ဖြစ်ပြီး တစ်ခုမျှ မယူဘဲ လက်မှတ်မထိုးပါက ကိုယ့်တာဝန် ကိုယ်ယူရမည်ဟု သျှမ်းပြည်နယ် အစိုးရအဖွဲ့မှ တာဝန်ရှိသူများ ပြောသွားကြောင်း သိရသည်။

အဆိုပါ လူနေတိုက်ခန်းများသည် လွန်ခဲ့သည့် နှစ်ပေါင်း (၂၀) ကတည်းက ဆောက်လုပ် နေထိုင်ခဲ့သော နေရာဖြစ်ပြီး တိုက်ခန်းပေါင်း ၁၆၀ ကျော်နှင့် ဆိုင်ခန်းပေါင်း ၁၀၇ ခန်းရှိသည်။

ထိုသို့ တိုက်ခန်းနေသူများကို အေးသာယာဘက်သို့ ပို့ဆောင်သောကြောင့် ပင်စင်စားများအနေဖြင့် အသနားခံစာ တင်လျှင်လည်း ရတော့မည် မဟုတ်သောကြောင့် ရွေးချယ်စရာမရှိသည့် အခြေအနေသို့ ရောက်ရှိနေကြသည်။

“ပင်စင်ယူထားတဲ့သူဆို အပေါ်ကနေ အောက်ကိုတောင် မဆင်းနိုင်တဲ့ သူတွေလည်း ရှိတယ်၊ အဲဒါကို ဘယ်သူမှ မနေတဲ့ နေရာကို ရွှေ့ခိုင်းတယ်ဆိုတော့ မတရားဘူးလေ။ ဆိုင်ခန်းသမားတွေက အဆင်ပြေပေမယ့် ပင်စင်စားတွေဘက်က ဘယ်သူမှ မရှိဘူးလေ၊ မပြောင်းလည်း သူတို့က ကန်ချနေတာ။ သူတို့ခေတ်ဆိုတော့ လုပ်ချင်ရာလုပ်နေတာ”ဟု အဆိုပါတိုက်ခန်းတွင် နေထိုင်သည့် ပင်စင်စားအမျိုးသမီးတစ်ဦးက ပြောသည်။

လာမည့် ဖေဖော်ဝါရီလ ၂၈ ရက်နေ့တွင် တိုက်ခန်းများ၊ ဈေးဆိုင်ခန်းများကို စက်ယန္တရား အသုံးပြုပြီး အင်အားသုံး ဖြိုချတော့မည်ဟု သိရသည်။

ဈေးဆိုင်ခန်း၊ တိုက်ခန်းများနေရာတွင် နိုင်ငံတကာ အဆင့်မီအားကစား ကွင်း၊ အားကစားရုံနှင့် ရေကူးကန်၊ လူငယ်ရေးရာ စင်တာ များ တည်ဆောက်သွားမည်ဟု အကြောင်းပြပြီး ဈေးဆိုင်ခန်းများကို အတင်းအဓမ္မ ဖယ်ရှားခိုင်းခဲ့သည်။

အဆိုပါ ဈေးဆိုင်၊ တိုက်ခန်းများ ဖယ်ရှားပေးရန် အကြောင်းကြားစာကို ပြီးခဲ့သည့် ၂၀၂၅ ခုနှစ် ဒီဇင်ဘာလ ၃ ရက်နေ့တွင် လည်းကောင်း၊ ၂၀၂၆ ခုနှစ် ဇန်နဝါရီလ ၅ ရက်နေ့တွင်လည်းကောင်း၊ ဖေဖော်ဝါရီလ ၂ ရက်နေ့ စသဖြင့် သုံးကြိမ်တိုင်တိုင် အသိပေးထားကြောင်း သိရသည်။