သျှမ်းပြည်တောင်ပိုင်း မောက်မယ်မြို့နယ် ဗန်းမက်ကျေးရွာအနီး ပအိုဝ်းအမျိုးသား လွတ်မြောက်ရေးတပ်တော် (PNLA) ဌာနချုပ် နေရာဟောင်းကို စစ်တပ်လက်အောက်ခံ ပအိုဝ်းပြည်သူ့စစ် (PNO) က ထိန်းချုပ်နိုင်ပြီဟု ထုတ်ပြန်လာသည်။

ပြီးခဲ့သည့် ဖေဖော်ဝါရီလ (၁၄) ရက်တွင် မောက်မယ်မြို့နယ် ဗန်းမက်ကျေးရွာအနီး PNLA ဌာနချုပ်ကို ထိန်းချုပ်နိုင်ခဲ့ပြီး ဒေသခံများ ကျေးရွာအတွင်း ပြန်လာနေကြောင်း စစ်တပ်လက်အောက်ခံ PNO တပ်ဖွဲ့က ထုတ်ပြန်သည်။

PNLA ဌာနချုပ် တည်ရှိသည့် ဗန်းမက်ကျေးရွာသည် လွန်ခဲ့သော နှစ်များကတည်းက PNO ထိန်းချုပ်နေရာ ဖြစ်ပြီး PNO ကို ထောက်ခံသူ အများအပြားရှိသည့် ဒေသဖြစ်ကြောင်း PNO တပ်ဖွဲ့မှ အရာရှိတစ်ဦးက သျှမ်းသံတော်ဆင့်က ပြောသည်။

“အဲ့နေရာက အရင်ကတည်းက ကျနော်တို့ ထိန်းထားတဲ့နေရာ PNLAကို ပေးထားတာ။ အခုမှ အချင်းချင်း မတည့်တော့လို့ ပြန်သိမ်းတာ၊ ကျနော်တို့ အဲ့နေရာကို အခုသိမ်းလိုက်ပြီ။ ပြည်သူနေအိမ်တွေကိုတော့ ကျနော်တို့ မီးရှို့တာ မဟုတ်ဘူး။ တိုက်ပွဲဖြစ်တော့ အနည်းနဲ့ အများ အိမ်တွေမီးလောင်မှာပဲ”ဟု ၎င်း PNO အရာရှိက ပြောဆိုသည်။

ယခုလက်ရှိ မောက်မယ်မြို့နယ် ကဒူကြီးဒေသဖြစ်သည့် ဗန်းမက်ကျေးရွာဘက်တွင် တိုက်ပွဲ ငြိမ်သက်နေသော်လည်း ပြီးခဲ့သည် ဇန်နဝါရီလမှ ဖေဖော်ဝါရီလတွင်း တိုက်ပွဲ ဆက်တိုက်ဖြစ်ပွားခဲ့ကြောင်း ၎င်း PNO အရာရှိက ဆက်ပြောသည်။

အဆိုပါ PNO ထိန်းချုပ်ခဲ့သော PNLA ဌာနချုပ်သည် ပြီးခဲ့သည့် ၂၀၂၄ ခုနှစ် ဒီဇင်ဘာလ နောက်ဆုံးပတ်တွင် စစ်ကော်မရှင်တပ်က လေယာဉ်ဖြင့် ဗုံးကြဲခဲ့ပြီး ထိုအချိန်မှစ၍ PNLAက ဌာနချုပ်ကို နေရာ ရွှေ့ပြောင်းခဲ့သည်။

“PNO က PNLA ဌာနချုပ်ဟောင်းကို သိမ်းလိုက်ပြီ၊ PNLA က သူတို့ ဌာနချုပ်ပြောင်းတာ နည်းနည်းကြာပြီ။ ဗန်းမက်တို့ မဲဟဲရွာက ဒေသခံ နေအိမ်တွေဆို အကုန်နီးပါး မီးရှို့ခံရတယ်၊ ဗန်းမက်က စစ်ရှောင်စခန်းတွေလည်း PNO က မီးရှို့သွားတယ်။ သူတို့ပဲရှိတာ သူတို့ရှို့တယ်လို့ပဲ ပြောရတော့မယ်”ဟု ဒေသခံ အမျိုးသားတစ်ဦးက ပြောသည်။

ထိုသို့ စစ်ကော်မရှင်တပ်နှင့် PNO ပူးပေါင်းတပ်များက PNLA ဌာနချုပ် ရှိရာသို့ ထိုးစစ်ဆင်နေခြင်းသည် စစ်ကော်မရှင်ဘက်မှ ပအိုဝ်းအချင်းချင်း သွေးထိုး တိုက်ခိုက်ခိုင်းခြင်းလည်း ဖြစ်နိုင်သည်ဟု ၎င်းအမျိုးသားက သုံးသပ်ပြောဆိုသည်။

မောက်မယ်မြို့နယ်ရှိ PNLA ဌာနချုပ်ဟောင်း ထိန်းချုပ်ခံရသည်နှင့် ပတ်သက်၍ PNLA တပ်ဖွဲ့ကို သျှမ်းသံတော်ဆင့်မှ ဆက်သွယ်မေးမြန်းရာတွင် ပြန်လည်ဖြေကြားခြင်း မရှိပေ။

ပြီးခဲ့သည့် ဖေဖော်ဝါရီလ (၁) ရက်နေ့မှ စတင်ပြီး စစ်ကော်မရှင်တပ်၊ PNA ပူးပေါင်းတပ်တို့က ပအိုဝ်းအမျိုးသား လွတ်မြောက်ရေးတပ်တော် (PNLA) ဌာနချုပ်ရှိသည့် မောက်မယ်မြို့နယ်၊ ကဒူးကြီးဒေသ ဟံးဗွာကျေးရွာဘက်သို့ အင်အားအလုံးအရင်းဖြင့် ထိုးစစ်ဆင်ခဲ့သောကြောင့် တိုက်ပွဲပြင်းထန်စွာ ဖြစ်ပွားခဲ့ကြသည်။

ထိုတိုက်ပွဲကြောင့် မောက်မယ်မြို့နယ်ရှိ ဟံးဗွာရွာ၊ နောင်ထောဝ်ရွာ၊ ဗန်းမက်ကျေးရွာမှ ပြည်သူ တစ်ထောင်ခန့် နားဟီးကျေးရွာနှင့် နီးစပ်ရာ ကျေးရွာများသို့ စစ်ဘေးတိမ်းရှောင်နေကြရသည်။

ထို့အပြင် နားဟီးကျေးရွာသို့ စစ်ဘေးရှောင်နေရသော ဒေသခံ တစ်ထောင်ဝန်းကျင်သည် ဆေးဝါးအကူအညီများ၊ စားနပ်ရိက္ခာများနှင့် သောက်သုံးရေများ လိုအပ်နေပြီး ၎င်းတို့ နေအိမ်အများစုလည်း မီးရှို့ခံထားရသောကြောင့် နေရပ်ပြန်ရန် မဖြစ်နိုင်သေးကြောင်း သိရသည်။