သျှမ်းပြည်အရှေ့ပိုင်း တာချီလိတ်မြို့တွင် စစ်တပ်လက်အောက်ခံ ရဲများထံ အခွန်ဆောင်ကာ ဘိန်းစာရွက်ရည် (ကရထွမ့်)ကို ပေါ်တင်ရောင်းချမှု မြင့်တက်လာကြောင်း သတင်းရရှိသည်။
လက်ရှိ တာချီလိတ်မြို့အတွင်း ရပ်ကွက်တိုင်းတွင် ဘိန်းစာရွက်ရည် (နမ့်ကရထွမ့်)များကို အလွယ်တကူ ဝယ်ယူနိုင်သည့်အပြင် ထိုအရည်များကို အချိုရည်၊ ဘီယာ၊ အရက်တို့နှင့် ရောနှော သောက်သုံးကြကြောင်း ဒေသခံများက ပြောသည်။
စစ်အာဏာသိမ်းပြီးနောက် တာချီလိတ်မြို့တွင် ဘိန်းစာရွက်ရည် (ကရထွမ့်) ရောင်းချမှု များပြားလာပြီး စစ်တပ်လက်အောက်ခံ ရဲများထံ အခွန်ဆောင်ပြီး ရပ်ကွက်တိုင်းတွင် ပေါ်တင်ရောင်းချနေကြောင်း တာချီလိတ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီမှာက နေရာတိုင်း ရောင်းနေတာပဲ။ ပေါ်တင်ပဲ ပိုက်ဆံပေးနိုင်ရင် ဖွင့်လို့ရတယ်။ မပေးနိုင်ရင် ပိတ်ခိုင်းတယ်၊ ဖမ်းတယ် ဆိုတဲ့ ပုံစံမျိုးပေါ့။ သူတို့ကို အခွန်မဆောင်တဲ့ လူတွေကတော့ သူတို့က စုံစမ်းပြီး ဖမ်းကိုဖမ်းတယ်”ဟု တာချီလိတ်မြို့ ဒေသခံအမျိုးသားတစ်ဦးက ပြောသည်။
အဆိုပါ တာချီလိတ်မြို့တွင် ဘိန်းစာရွက်ရည် (ကရထွမ့်) ရောင်းချသည့် ဆိုင်များကို ရဲတပ်ဖွဲ့ လက်အောက်ခံများက အခွန်ကောက်ပေးပြီး ဆိုင်ကြီး၊ ဆိုင်သေးအလိုက် အခွန်အခကို ဘတ် ၃ ထောင်မှ စတင်ပြီး ဘတ် ၁ သောင်းအထိ ဈေးနှုန်းအမျိုးမျိုး ပေးဆောင်ရကြောင်း တာချီလိတ်မြို့ ဒေသခံ အမျိုးသားတစ်ဦးက ထပ်လောင်းပြောသည်။
“ပိုက်ဆံတွေကိုတော့ သူတို့ ကိုယ်တိုင် လာမကောက်ဘူး။ သူတို့ လက်အောက်ခံ တစ်ယောက်ယောက်က အခွန်လာကောက်ပေးခိုင်းတာ။ တစ်ဆိုင်နဲ့ တစ်ဆိုင် ဈေးနှုန်းတွေကတော့ မတူဘူး”ဟု တာချီလိတ်မြို့ ဒေသခံ ၎င်းအမျိုးသားက ပြောသည်။
ထိုဘိန်းစာရွက်ရည် (ကရထွမ့်) များသည် ပြီးခဲ့သည့် ၂၀၂၁ နောက်ပိုင်းမှ စပြီး ထိုင်း – မြန်မာ နယ်စပ်တကြောဖြစ်သည့် တာချီလိတ်၊ မိုင်းဆတ်၊ မိုင်းတုံ၊ နားကောင်းမူး စသည့် နယ်မြေများတွင် ဆိုင်များဖွင့်ကာ သက်ဆိုင်ရာ တာဝန်ရှိသူများထံ အခွန်ဆောင်ပြီး လွတ်လွတ်လပ်လပ် ရောင်းချနေကြကြောင်း သိရသည်။
ပြီးခဲ့သည့် ဖေဖော်ဝါရီလ ၁၁ ရက်တွင် တာချီလိတ်မြို့ ရန်အောင်မြေရပ်ကွက်၊ ပါလျှံ(၁)တွင် နေအိမ်တစ်လုံးကို စစ်တပ်လက်အောက်ခံ ရဲတပ်ဖွဲ့ဝင်များက ဝင်ရောက်စစ်ဆေးခဲ့ရာ ဘိန်းစာရွက်များနှင့် ဘိန်းစာရွက်ရည် ပြုလုပ်ရောင်းချသူဟု ယူဆရသည့် အမျိုးသားတစ်ဦးကို ဖမ်းဆီးခဲ့ကြောင်း သိရသည်။
Leave a Comments