သျှမ်းပြည်တောင်ပိုင်း၊ ရွာငံမြို့နယ်အတွင်း စစ်ကော်မရှင်နှင့် တော်လှန်ရေးတပ်သားများရှိပြီး မကြာခဏ အရပ်သားသေဆုံးမှုရှိမှုကြောင့် ဒေသခံများ လုံခြုံရေး စိုးရိမ်နေရကြောင်း သတင်းရရှိသည်။

စစ်ကော်မရှင်တပ် အာဏာသိမ်းပြီးနောက် ရွာငံမြို့နယ်တွင် စစ်ကော်မရှင်တပ် ၎င်း၏လက်အောက်ခံ ပျူစောထီးတပ်များ ၊ ပအိုဝ်းပြည်သူ့စစ် PNO တပ်များ နှင့် ဓနုပြည်နယ်အမျိုးသား လွတ်မြောက်ရေးတပ်တော် (DSNDA)၊ ဓနုအမျိုးသားလွတ်မြောက်ရေးတပ်မတော်(DPLA) တို့ နေရာယူ ထားကြသည်။

အဆိုပါ လက်နက်ကိုင်များကြားတွင် ဒေသခံများ အုပ်ချုပ်ရေးမှူး များက သဟဇာတ ဖြစ်အောင် နေထိုင်နေရပြီး စစ်ကော်မရှင်ဘက်မှလည်း ဒေသခံများကို မကြာခဏ ဖမ်းဆီးခြင်း ၊ ပေါ်တာဆွဲခြင်း၊ ပိုက်ဆံဖြင့် ပြန်ရွေးခိုင်းခြင်းများ ပြုလုပ်ပြီး အသတ်သေဆုံးသည့်အထိရိုက်နှက်မှုများလည်း ရှိသည်။

“ လက်နက်ကိုင်တွေများလေ ကျမတို့ ပြည်သူတွေမလုံခြုံလေ၊ စစ်တပ်က ဖမ်းလိုက် ၊ပေါ်တာဆွဲလိုက် PDFက စစ်တပ်နဲ့ ပတ်သက်လို့ သတ်လိုက်၊ ကြားထဲက ဘယ်အဖွဲ့မှန်းမသိ လက်နက်ပြပြီး ငွေတောင်းခံရလိုက်နဲ့ အရင်လို လုံခြုံမှု မရှိတော့ဘူး၊ ဖိအားတွေကြားထဲမှာ အသက်ရှင်ဖို့ ရုန်းကန်နေရတာပဲ။”ဟု ရွာငံဒေသခံ အမျိုးသမီး တစ်ဦးက ပြောသည်။

ပြီးခဲ့သည့် ဇန်နဝါရီလ အစတွင် စစ်ကော်မရှင်တပ်က နွားဘန်းကြီးကျေးရွာ၊ ရေချမ်းကျေးရွာ နှင့် ကျောက်ငှက် ကျေးရွာ တို့မှ ဒေသခံများကို ဖမ်းဆီးပြီး ငွေကြေးဖြင့် ပြန်ရွေးခိုင်းခြင်း၊ ၎င်းတို့ တောင်းသည့် ငွေပမာဏ မပေးနိုင်လျှင် ဖမ်းဆီးထားကြောင်း ၎င်းက ဆက်ပြောသည်။

ထို့အပြင် တပ်မှ ဒေသခံများကို ပျူစောထီးများ၊ စစ်ကော်မရှင်တပ်များနှင့် နီးကပ်စွာမနေရန်နှင့် ပြည်သူများ အသွားလာ သတိရှိကြရန်DSNDAတပ် မှ တာဝန်ရှိသူတစ်ဦးက အသိပေးပြောထားသည်။

“အခုတလောက ရွာငံမှာ ငြိမ်တယ်လို့ကို မရှိဘူး။ စစ်တပ်ဘက်မှလည်း ရွာတွေမှာ တပ်စွဲထားတာတို့ရှိတယ်။ တချို့အုပ်ချုပ်ရေးမှူးတို့ ပျူစောထီးတို့က စစ်တပ်ကို သတင်းပေးတာတို့၊ ပြည်သူတွေကို ကျနော်တို့နဲ့ ပတ်သက်တယ်လို့ စွတ်စွဲပြီး ဖမ်းခိုင်းတာ လုပ်တယ်၊ အဲဒါကြောင့် စစ်တပ်နဲ့ ပျူတွေနဲ့ ဝေးဝေးနေကြဖို့ ပြောလိုပါတယ် ”ဟု အဆိုပါ တာဝန်ရှိသူတစ်ဦးက ပြောသည်။

ယခုလက်ရှိ ရွာငံမြို့နယ်တွင် စစ်ကော်မရှင်တပ်မှ တော်လှန်းရေးတပ်ဖွဲ့များ ရှိရာ တောတောင်ဘက်သို့ ဒေသခံ ကားများကို ချောဆွဲသွားခြင်း၊ တောစပ်နှင့် နီးသည့် ကျေးရွာများတွင် တပ်စွဲပြီး လက်နက်ကြီးဖြင့် ရမ်းသမ်း ပစ်ခတ်ခြင်းများ ပြုလုပ်နေကြောင်း သိရသည်။

ဇန်နဝါရီလ နောက်ဆုံးပတ် ည ၁၀ နာရီခန့်တွင် ရွာငံမြို့နယ် လယ်ကိုင်းကျေးရွာနေ အသက် ၄၀ မှ ၆၀ နှစ်ခန့်ရှိ ပြည်သူ (၄)ဦးကို အမည်မသိ လက်နက်ကိုင်အဖွဲ့မှ အရပ်ဝတ်ဖြင့် လာရောက်ဖမ်းဆီးပြီး နှစ်ပတ်ကျော်ကြာပြီးနောက် ရုပ်အလောင်းသာ ပြန်ရတော့ကြောင်း သိရသည်။