သျှမ်းပြည်တောင်ပိုင်း မောက်မယ်မြို့နယ် နားဟီးကျေးရွာဘက်တွင် စစ်ကော်မရှင်တပ်နှင့် ပအိုဝ်းပြည်သူ့စစ် (PNO/PNA) တို့ ရမ်းသမ်းပစ်ခတ်သည့် လက်နက်ကြီးကြောင့် ကလေးငယ်တစ်ဉီးနှင့် အမျိုးသမီးတစ်ဉီး ထိခိုက်ဒဏ်ရာ ရရှိခဲ့ကြောင်း သတင်းရရှိသည်။

ဖြစ်စဉ်မှာ ဖေဖော်ဝါရီလ (၁၄)ရက်တွင် စစ်ကော်မရှင်တပ်နှင့် ၎င်းလက်အောက်ခံ ပအိုဝ်းပြည်သူ့စစ် PNA တပ်တို့က မောက်မယ်မြို့နယ်ရှိ စစ်ဘေးရှောင်များ ခိုလှုံနေကြသည့် နားဟီးကျေးရွာအတွင်းသို့ လက်နက်ကြီးဖြင့် ပစ်ခတ်ခဲ့ရာ အသက် (၄၀) နှစ်ဝန်းကျင် အမျိုးသမီးတစ်ဦးနှင့် အသက် ၁၀ နှစ်ဝန်းကျင် ကလေးတစ်ဦး ထိခိုက်ဒဏ်ရာ ရရှိခဲ့သည်။

အဆိုပါ လက်နက်ကြီးကျည် ကျရောက်ပေါက်ကွဲခြင်းကြောင့် ထိခိုက်ဒဏ်ရာ ရရှိသူများကို ဆေးကုပေးရန် နားဟီးကျေးရွာတွင် ဆေးပေးခန်းလည်း မရှိကြောင်း၊ နီးစပ်ရာ ကျေးရွာများသို့ သွားရောက် အကူအညီ တောင်းခံကာ ကုသနေရကြောင်း ဖြစ်စဉ်သိရှိသည့် အမျိုးသားတစ်ဉီးက သျှမ်းသံတော်ဆင့်ကို ပြောသည်။

“စစ်ဖြစ်တဲ့ ရွာလည်း မဟုတ်ဘူး၊ အဲ့တာကို လက်နက်ကြီးနဲ့ ပစ်တော့ စစ်ရှောင်တွေ ထိတာပေါ့။ ဆေးကုဖို့ဆိုလည်း ရွာအဆင့်ဆင့် ဖြတ်ပြီးမှ ဆေးခန်းရောက်တာ။ အဲ့နေ့ကဆို အကုန် လန့်သွားကြတာ၊ နှစ်ဦးက ဒဏ်ရာတော်တော်ပြင်းတယ်”ဟု မောက်မယ်ဒေသခံ ၎င်းအမျိုးသားက ပြောသည်။

မောက်မယ်မြို့နယ်ရှိ နားဟီးကျေးရွာအတွင်း စစ်ဘေးရှောင် တစ်ထောင်ဝန်းကျင် ခိုလှုံနေပြီး လက်ရှိတွင် စားနပ်ရိက္ခာနှင့် ဆေးဝါး ခက်ခဲနေကြောင်း သိရသည်။

“နားဟီးရွာက နည်းနည်း ခေါင်တဲ့ထဲမှာ ပါတယ်။ ရေလည်း ရှား၊ လမ်းကလည်း မကောင်းဘူး၊ စစ်ဖြစ်တော့ သူတို့ ဘာမှ မပါဘဲ အမြန်ပြေးရတယ်။ အိပ်ဖို့လည်း မပါဘူး၊ သူတို့အတွက် စားနပ်ရိက္ခာတွေ လိုအပ်နေတယ်”ဟု ပအိုဝ်းလူငယ်အရေး တက်ကြွလှုပ်ရှားသူ အမျိုးသားတစ်ဦးက ပြောသည်။

ပြီးခဲ့သည့် ဖေဖော်ဝါရီလ (၁) ရက်နေ့မှ စတင်ပြီး စစ်ကော်မရှင်တပ်၊ PNA ပူးပေါင်းတပ်တို့က ပအိုဝ်းအမျိုးသား လွတ်မြောက်ရေးတပ်တော် (PNLA) ဌာနချုပ်ရှိသည့် မောက်မယ်မြို့နယ်၊ ကဒူးကြီးဒေသ ဟံးဗွာကျေးရွာဘက်သို့ အင်အားအလုံးအရင်းဖြင့် ထိုးစစ်ဆင်ခဲ့သောကြောင့် တိုက်ပွဲပြင်းထန်စွာ ဖြစ်ပွားခဲ့ကြသည်။

ထိုတိုက်ပွဲကြောင့် မောက်မယ်မြို့နယ်ရှိ ဟံးဗွာရွာ၊ နောင်ထောဝ်ရွာ၊ ဗန်းမက်ကျေးရွာမှ ပြည်သူ တစ်ထောင်ခန့် နားဟီးကျေးရွာနှင့် နီးစပ်ရာ ကျေးရွာများသို့ စစ်ဘေးတိမ်းရှောင်နေကြရသည်။

စစ်ကော်မရှင်တပ်နှင့် ပအိုဝ်းပြည်သူ့စစ် (PNA) ပူးပေါင်းတပ်နှင့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) တပ်တို့ ယနေ့အထိ ထိတွေ့မှု ဆက်ရှိနေသေးကြောင်း ဒေသခံများထံမှ သိရှိရသည်။