ထိုင်းနိုင်ငံမြောက်ပိုင်း ချင်းမိုင်ခရိုင် မယ်အိုင်းမြို့နယ်တွင် ထိုင်းတပ်မတော် ဒေသ ၃ လက်အောက်ခံ တပ်ဖွဲ့များက စိတ်ကြွးဆေးပြား ခန့်မှန်းအားဖြင့် ၂.၅ သန်းခန့် ဖမ်းဆီးရမိခဲ့ကြောင်း အာဏာပိုင်များက ဖေဖော်ဝါရီလ ၁၅ ရက်တွင် ထုတ်ပြန်ခဲ့သည်။

အာဏာပိုင်များ၏ ပြောကြားချက်အရ ဖေဖော်ဝါရီ ၁၅ ရက် နံနက် ၃ နာရီခန့်တွင် မယ်အိုင်းမြို့နယ် Tha Ton ၊ Huai Nam Yen ကျေးရွာရှိ တောင်ကြားလမ်းပိုင်းတွင် ယာယီစစ်ဆေးရေးဂိတ်တစ်ခု တည်ဆောက်၍ တရားမဝင်ကုန်ပစ္စည်းများ တားဆီးရန် ဆောင်ရွက်ခဲ့ကြောင်း သိရသည်။

ထို ဖေဖော်ဝါရီ ၁၅ရက် နံနက် ၆ နာရီခန့်တွင် လိုင်စင်နံပတ်ပြား မတပ်ထားသည့် အဖြူရောင် ပစ်ကပ်ကားတစ်စီး စစ်ဆေးရေးဂိတ်သို့ ဝင်ရောက်လာပြီး အရှိန်မြှင့် မောင်းနှင်ကာ စစ်ဆေးရေးဂိတ်ကို ဖောက်ထွက်ပြေးသွားသဖြင့် လုံခြုံရေးတပ်ဖွဲ့များက လိုက်လံရှာဖွေခဲ့ကြောင်း ဆိုသည်။

ထိုနေ့ ညနေ ၅ နာရီ ၃၀ မိနစ်ခန့်တွင် Tha Ton မြို့နယ်အုပ်ချုပ်ရေးအရာရှိများထံမှ လမ်းဘေးတောအတွင်း စွန့်ပစ်ထားသော သံသယရှိ ဆာလာအိတ် အများအပြား တွေ့ရှိထားကြောင်း သတင်းပေးပို့ခဲ့သည်။

ထို့နောက် တပ်မတော်၊ မူးယစ်ဆေးဝါးနှိမ်နင်းရေးရဲတပ်ဖွဲ့၊ နယ်ခြားစောင့်ရဲတပ်ဖွဲ့နှင့် ဒေသခံ အုပ်ချုပ်ရေးအဖွဲ့များ ပူးပေါင်း စစ်ဆေးရာ စုစုပေါင်း လစာအိတ် (၁၉) အိတ်အတွင်း စိတ်ကြွ ဆေးပြား ခန့်မှန်း ၂,၅၀၀,၀၀၀ (၂.၅ သန်းခန့်) တွေ့ရှိခဲ့ကြောင်း ထုတ်ပြန်ထားသည်။

သက်ဆိုင်ရာ အာဏာပိုင်များက ဖမ်းဆီးရမိသည့် မူးယစ်ဆေးဝါးများကို မယ်အိုင်းရဲစခန်းိသို့ လွှဲပြောင်းပေးအပ်ခဲ့ပြီး ဆက်လက်စုံစမ်းစစ်ဆေးကာ ပါဝင်ပတ်သက်သူများကို ဖမ်းဆီးအရေးယူသွားမည်ဟု ဆိုသည်။

ထိုင်းမြောက်ပိုင်း ဒေသသည် မြန်မာနိုင်ငံနှင့် နယ်နိမိတ်နီးကပ်ပြီး မူးယစ်ဆေးဝါးသယ်ဆောင်မှုများ မကြာခဏ ဖြစ်ပွားလေ့ရှိသည့် ဒေသတစ်ခုဖြစ်သည်။