သျှမ်းပြည်မြောက်ပိုင်း TNLA ထိန်းချုပ်ထားသော နမ့်ခမ်းမြို့တွင် လျှပ်စစ်မီတာခ ပုံမှန်ထက် သုံးဆနီးပါးခန့် ကုန်ကျနေခြင်းကြောင့် ဒေသခံများ အခက်အခဲ ကြုံတွေ့နေရကြောင်း စုံစမ်းသိရသည်။

တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့ပေါ် ရပ်ကွက်များတွင် ယခုနှစ် ဇန်နဝါရီလအတွက် လျှပ်စစ်မီတာခ နှုန်းထားများကို အမှန်တကယ် ကုန်ကျသင့်သည်ထက် သုံးဆနီးပါးခန့် ပိုမိုပေးဆောင်နေရခြင်းကြောင့် အခက်အခဲ ကြုံတွေ့နေရကြောင်း နမ့်ခမ်းဒေသခံများက ပြောသည်။

“အိမ်မှာ အရင်က မီတာခ တစ်သောင်းကျော်လောက်ပဲ ကျတာကနေ ရှေ့လက သုံးသောင်းလောက် တက်လာတယ်။ ဒီလကျတော့ ၇ သောင်းကျော် ဖြစ်သွားတော့ ဘာလို့ တက်သွားမှန်း နားမလည်ဘူး။ မီတာ ဖတ်တဲ့လူကလည်း အရင်လူဟောင်းပဲ၊ ဘာအကြောင်းပြချက်မှ မရှိဘဲနဲ့ မီးလခ တက်တော့ ပြည်သူက ဘာပြောရမှန်းတောင် မသိတော့ဘူး” ဟု နမ့်ခမ်းဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

TNLA လက်အောက်ရှိ မြို့နယ်လျှပ်စစ်မီးဌာနမှ နမ့်ခမ်းမြို့တွင် ကောက်ခံသည့် လျှပ်စစ်မီတာခ နှုန်းထားများသည် လျှပ်စစ်မီတာ ၁ ယူနစ်မှ ၅၀ ယူနစ်အထိ ၅၀ ကျပ်၊ ၅၁ ယူနစ်မှ ၁၀၀ ယူနစ်အထိ ၁၀၀ ကျပ်၊ ၁၀၁ ယူနစ်မှ ၂၀၀ ယူနစ်အထိ ၂၀၀ ကျပ် ကျသင့်သော်လည်း လက်ရှိတွင် လျှပ်စစ်မီတာ ယူနစ်များကို ၂၀၁ ယူနစ် အထက်ဖြစ်အောင် တိုးရေးပြီး ၁ ယူနစ်လျှင် ၃၀၀ ကျပ် ပေးဆောင်နေရသူ များပြားကြောင်း သိရသည်။

“ပုံမှန် ထမင်းချက် ရေနွေးတည် အဲ့လောက်ပဲသုံးတာ တစ်လကို ၂ သောင်းကျော်လောက် ပေးရတယ်။ ဒီလကျတော့ နှစ်ဆကျော် တက်သွားပြီး ငါးသောင်းကျော် ဖြစ်သွားတာ။ အခုက ကုမ္ပဏီဘက် ဖြစ်တာလား TNLA ဘက်က ဖြစ်တာလား နားမလည်ဘူး၊ လျှပ်စစ်ရုံး သွားပြောရင်လည်း မီးသုံးလို့ ဒီလောက်ကုန်တာလို့ ပြန်ပြောတာ။ အိမ်တိုင်းလိုလို မီတာခ ပိုကုန်လို့ သံသယဝင်နေတယ်” ဟု နမ့်ခမ်းမြို့မှ အဆိုပါဒေသခံ အမျိုးသမီးက ဆက်ပြောသည်။

လက်ရှိ နမ့်ခမ်းမြို့တွင် TNLA ဖြန့်ဖြူးပေးနေသည့် လျှပ်စစ်မီးကို ရပ်ကွက်/ ကျေးရွာတိုင်းနီးပါး မီတာခ ဈေးနှုန်းအဆမတန် ပေးဆောင်နေရခြင်းကြောင့် လျှပ်စစ်မီတာဘောက်စ်များကို နည်းပညာပိုင်း ပြန်လည်စစ်ဆေးရန် ဒေသခံများက တောင်းဆိုနေကြသည်။

ယမန်နှစ် ၂၀၂၅ ဇူလိုင်လတွင်လည်း နမ့်ခမ်းမြို့ပေါ် ရပ်ကွက်များရှိ နေအိမ်များထံ TNLA လက်အောက်ခံ ဝန်ထမ်းများမှ လျှပ်စစ်မီတာ ယူနစ်များကို အမှန်တကယ် ကုန်ကျသည်ထက် တိုးရေးခဲ့ပြီး ငွေကြေးပိုမိုကောက်ခံခဲ့ခြင်းကြောင့် အခက်အခဲ ကြုံတွေ့ခဲ့ရကြောင်း ဒေသခံများက ပြောသည်။