သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် စစ်ကော်မရှင်က ဦးဆောင်ကျင်းပသည့် ရွေးကောက်ပွဲ အပြီး စစ်မှုထမ်းများ ပြန်လည်ခေါ်ယူနေကြောင်း သတင်းရရှိသည်။
စစ်ကော်မရှင်၏ ရွေးကောက်ပွဲကာလအတွင်း စစ်မှုထမ်းခေါ်ယူမှု ရပ်နားထားသော်လည်း ပြီးခဲ့သည့် ဇန်နဝါရီလအတွင်း ရွေးကောက်ပွဲ ပြီးနောက် ယခုလ ဖေဖော်ဝါရီလ ပထမပတ်မှ စပြီး စစ်မှုထမ်း အမှတ်စဉ် (၂၀)ကို အင်းလေးဒေသတွင် ထပ်မံခေါ်ယူနေသည်။
အဆိုပါ စစ်မှုထမ်းအတွက် လူစားထိုးရန် လူငှားရှာသော်လည်း ယခင် စစ်မှုထမ်း အမှတ်စဉ် (၁)မှ လူငယ်များ ပြန်မရောက်လာကြ သေးသဖြင့် လူစားထိုး သွားမည့်သူ မရှိတော့ကာ ငွေကျပ် သိန်း၁၀၀ ပေးပြီး ငှားရမ်းလျှင်လည်း သွားမည့်သူ နည်းပါးကြောင်း ဒေသခံများက ပြောသည်။
“စစ်မှုထမ်းက စခေါ်နေပြီ အရင်လို လူငှားဖို့ လူရှားသွားပြီ၊ အရင်ကဆို ပိုက်ဆံ သိန်း ၅၀ လောက်နဲ့ လူစားထိုး ခေါ်လို့ရ၊အခု သိန်း ၁၀၀ ပေးရင်တောင် လိုက်မဲ့သူ မရှိတော့ဘူး၊ မဲပါတဲ့သူလည်း သွားချင်တဲ့သူ မရှိဘူး။”ဟု အင်းလေး ဒေသခံ အမျိုးသမီး တစ်ဦးက ပြောသည်။
ထို့အပြင် ယခင် အမှတ်စဉ် (၁၉)မှ စစ်မှုထမ်းကြေးများကို ယနေ့အထိ တစ်အိမ်လျှင် ငွေကျပ် နှစ်သောင်းစီ လစဉ်လတိုင်း ထည့်နေရသေးသောကြောင့် စစ်မှုထမ်း နောက်တစ်သုတ်အတွက် ငွေကြေး မတတ်နိုင်ကြကြောင်း ၎င်းက ဆက်ပြောသည်။
စစ်မှုထမ်းကြေးများကို အချို့သော ကျေးရွာများတွင် ရပ်ကွက်အုပ်ချုပ်ရေးမှူးမှ ဦးဆောင်ကောက်ပေးပြီး ထည့်ပေးသော်လည်း စစ်မှုထမ်း သွားရောက်သူထံ အပြည့်ဝ မရကြောင်း သိရှိရသည်။
လက်ရှိတွင် အမျိုးသားအပြင် အမျိုးသမီးများကိုပါ စစ်မှုထမ်းခေါ်ဆိုမည်ဟု သတင်းထွက်ပေါ်လာသဖြင့် ဒေသခံများ စိုးရိမ်နေကြသည်။
“စစ်မှုထမ်းက ခဏခဏခေါ်နေတော့ ဘယ်အချိန် အမျိုးသမီးတွေ ထခေါ်မှာလဲ စိတ်ပူနေရတာ၊ နိုင်ငံရေးအခြေအနေက မကောင်းတော့ ပေါ်တာဆွဲတာတို့ အတင်းစစ်သားစုဆောင်းတာ တို့ လုပ်ခံရမှာကြောက်တယ်။ အာမခံ ရှိပြီး သူတို့ သတ်မှတ်ထားတဲ့ နှစ်ကာလပြီးရင် ပြန်ခိုင်းရင်တော့ ဝင်မဲ့သူ ရှိကြမှာ အခုက သူတို့က ဘာအာမခံချက်မှ မရှိဘူး။”ဟု အင်းလေး ဒေသခံ အမျိုးသမီး တစ်ဦးက ပြောသည်။
စစ်မှုထမ်းအတွက် လူစားထိုးဝင်ကြသူ အများစုသည် ငွေကြေးခက်ခဲပြီး ဝေးလံသည့် အခြားသော ဒေသမှ လူငယ်များက အခကြေးငွေဖြင့် စစ်မှုထမ်း အငှားလိုက်ကြသူများ ဖြစ်သည်။
အလားတူ တောင်ကြီးမြို့၊ ရတနာသီရိ ရပ်ကွက်တွင်လည်း စစ်ကော်မရှင်ခန့် အုပ်ချုပ်ရေးမှူးက စစ်မှုထမ်း အကြောင်းပြ၍ ရပ်ကွက်နေ ပြည်သူများထံမှ တစ်အိမ်လျှင် ငွေကျပ် တစ်သိန်း လစဉ် ကောက်ခံနေကြောင်း သိရသည်။
ပြီးခဲ့သည့် ၂၀၂၅ ခုနှစ် ဩဂုတ်လတွင်လည်း ပအိုဝ်းပြည်သူ့စစ် (PNA/PNO)တို့က အင်းလေးဒေသ စစ်မှုထမ်းကြေးအတွက် တစ်အိမ်လျှင် ငွေကျပ် ငါးသိန်းတောင်းခံပြီး မပေးနိုင်ပါက စစ်မှုထမ်းခိုင်း၍ ရှေ့တန်း ပို့ဆောင်ခဲ့သည်။
Leave a Comments