သျှမ်းပြည်မြောက်ပိုင်း မိုင်းရယ်မြို့နယ်တွင် အွန်လိုင်းငွေလိမ် ကျားဖြန့်လုပ်ငန်း လုပ်ကိုင်သည့် တရုတ်နိုင်ငံသား (၃၃၀) ဦးကို ဆက်စပ်ပစ္စည်းများနှင့် ထပ်မံဖမ်းဆီးခဲ့ကြောင်း စစ်ကော်မရှင်ဘက်က သတင်းထုတ်ပြန်သည်။

ယမန်နေ့ (ဖေဖော်ဝါရီလ ၃ ရက်) နံနက်ပိုင်းတွင် မိုင်းရယ်မြို့ အရှေ့တောင်ဘက် ဟိုက်ပုကျေးရွာအနီးရှိ အွန်လိုင်းငွေလိမ် ကျားဖြန့်လုပ်ငန်း လုပ်ကိုင်နေသည့် မိုးကာတဲများတွင် တရုတ်နိုင်ငံသား အမျိုးသား ၃၂၁ ဦး နှင့် အမျိုးသမီး ၉ ဦး စုစုပေါင်း (၃၃၀) ဦးတို့ကို စစ်ကော်မရှင်တပ်နှင့် ပူးပေါင်းအဖွဲ့များက ဝင်ရောက် ဖမ်းဆီးရမိခဲ့ကြောင်း သတင်းထုတ်ပြန်ချက်အရ သိရသည်။

“ဟိုက်ပုရွာအနီးမှာ စစ်တပ်က ကျားဖြန့် ၃၀၀ ကျော်ကို ဝင်ဖမ်းသွားတာ ဟုတ်တယ်။ တန့်ယန်း ဗျူဟာက တပ်ဖွဲ့တွေနဲ့ တခြားလက်နက်ကိုင်တပ် ပူးပေါင်းအဖွဲ့က ဝင်ဖမ်းတာပါ။ တရုတ်တွေရဲ့ အကူအညီနဲ့ လေကြောင်းကနေတဆင့် ဒရုန်းနဲ့ ကင်းထောက်ပြီး ဝင်ဖမ်းတာ။ ဖမ်းမိထားတဲ့ တရုတ်နိုင်ငံသားတွေကို မိုင်းရယ်မှာ ဖမ်းဆီးထိန်းသိမ်းထားတယ်”ဟု စစ်ရေးသတင်းရင်းမြစ် တစ်ဦးက သျှမ်းသံတော်ဆင့်ကို အတည်ပြု ပြောဆိုသည်။

အဆိုပါ ဝင်ရောက်ဖမ်းဆီးမှုအတွင်း မီးစက် ၂ လုံး၊ ဖုန်းမျိုးစုံ ၂၀၈ လုံး၊ ALL-IN-ONE ကွန်ပျူတာ ၈၆ လုံး၊ Laptop ၇ လုံး၊ Star Link ၂၃ လုံး နှင့် မော်တော်ယာဉ်မျိုးစုံ ၁၀ စီးတို့ကို တွေ့ရှိ ဖမ်းဆီးထိန်းသိမ်းနိုင်ခဲ့ကြောင်း စစ်ကော်မရှင် ထုတ်ပြန်ချက်တွင် ဖော်ပြထားသည်။

ထိုသို့ ဖမ်းဆီးရမိသည့် ဆက်စပ်ပစ္စည်းနှင့် ဖမ်းဆီးရမိသူများကို ဉပဒေနှင့် အညီ အရေးယူဆောင်ရွက်ပြီး နောက်ကွယ်တွင် ပါဝင်ပတ်သတ်သူများကိုလည်း စီစစ်ဖော်ထုတ်သွားမည်ဖြစ်ကြောင်း ထုတ်ပြန်ချက်တွင် ရေးသားထားသည်။

မိုင်းရယ်မြို့ကို စစ်ကော်မရှင်တပ်က ထိန်းချုပ်ထားပြီး မြို့နှင့် အနီးတဝိုက်တွင် ရှမ်းပြည် တိုးတက်ရေးပါတီ/ ရှမ်းပြည်တပ်မတော်(SSPP/SSA) ၊ ကိုးကန့်တပ်ဖွဲ့ (MNDAA) တို့ သွားလာလှုပ်ရှားမှုရှိကြောင်း သိရသည်။

အလားတူ ဇန်နဝါရီလ နောက်ဆုံးပတ်တွင်လည်း ကွန်ဟိန်းမြို့နယ် ကာလိမြို့ ကျိုင်းလွန်း ကျေးရွာအုပ်စုရှိ အွန်လိုင်းငွေလိမ် ကျားဖြန့်လုပ်ငန်း လုပ်ကိုင်သည့် နေရာများကို စစ်ကော်မရှင်တပ်က ဝင်ရောက် စစ်ဆေးခဲ့ရာ ဝမ်နမ့်မန်းကျေးရွာအနီး (၄) နေရာတွင် တရုတ်နိုင်ငံသား အမျိုးသား (၂၃၃) ဦးတို့ကို ဖမ်းဆီးရမိခဲ့ကြောင်း စစ်ကော်မရှင်က ထုတ်ပြန်ခဲ့သည်။