သျှမ်းပြည်အရှေ့ပိုင်း ကျိုင်းတုံမြို့နှင့် တာချီလိတ်မြို့သို့ အိန္ဒိယနိုင်ငံ သံအမတ်ကြီး လာရောက်ပြီး မြန်မာ-ထိုင်း-လာအို နယ်စပ်ကုန်သွယ်ရေးဂိတ်များကို လေ့လာခဲ့ကြောင်း သတင်းသိရသည်။

ဇန်နဝါရီလ (၃၁) ရက်တွင် ကျိုင်းတုံမြို့ရှိ ဗုဒ္ဓဂါယာ ပုံစံတူ ဆောက်လုပ်ထားသည့် ဗုဒ္ဓဥယျာဉ်တွင် စစ်ခေါင်းဆောင် မင်းအောင်လှိုင် ကိုးကွယ်သည့် ဝစီပိတ်ဆရာတော်ကို အိန္ဒိယသံအမတ်ကြီး Mr. Abhay Thakur နှင့် အဖွဲ့ဝင်များမှ သွားရောက်ဖူးမျှော်ခဲ့ပြီး အိန္ဒိယနွယ်ဖွားများနှင့်လည်း တွေ့ဆုံခဲ့ကြောင်း မြန်မာနိုင်ငံဆိုင်ရာ အိန္ဒိယသံရုံးမှ ဓာတ်ပုံနှင့်တကွ ဖော်ပြထားသည်။

ထို့အပြင် တောင်ပေါ်ကျေးရွာ တစ်ရွာသို့ သွားရောက်လည်ပတ်ခဲ့ပြီး အာခါ၊ လားဟူ၊ သျှမ်းနှင့် ဗမာ တိုင်းရင်းသားများ အတူတကွ သဟဇာတဖြစ်စွာ နေထိုင်ကြသည်ကို တွေ့ရှိခဲ့ရကြောင်း အိန္ဒိယသံရုံး ထုတ်ပြန်ချက်တွင် ရေးသားထားသည်။

ဖေဖော်ဝါရီလ (၁) ရက်တွင် တာချီလိတ်မြို့ရှိ မြန်မာ-ထိုင်း နှစ်နိုင်ငံ နယ်စပ်ကုန်သွယ်ရေး ဂိတ်နှစ်ခုသို့ သွားရောက်လည်ပတ်ခဲ့ပြီး လာအိုနိုင်ငံအပါအဝင် နိုင်ငံတကာ ကုန်သွယ်မှုများ ပြုလုပ်ရာ မဲခေါင်မြစ် ဝမ်ပုံဆိပ်ကမ်းသို့လည်း သွားရောက်ခဲ့ကြောင်း သိရသည်။

ထို့နောက် အိန္ဒိယသံအမတ်ကြီးသည် တာချီလိတ်မြို့ရှိ နယ်စပ်ကုန်သွယ်ရေး အသင်းအဖွဲ့များမှ စီးပွားရေးလုပ်ငန်းရှင်များ၊ ကုန်သွယ်ရေး တာဝန်ရှိသူများနှင့်လည်း တွေ့ဆုံခဲ့ကြောင်း ထုတ်ပြန်ထားသည်။

ယမန်နှစ် ၂၀၂၅ ဩဂုတ်လ ၁၄ ရက်နှင့် ၁၅ ရက်တွင် တာချီလိတ်မြို့ရှိ လန်ချန်း-မဲခေါင် ပူးပေါင်းဆောင်ရွက်မှု အထူးရန်ပုံငွေဖြင့် တည်ဆောက်ထားသော ဝမ်ပုံ ရေကြောင်းရဲတပ်ဖွဲ့စခန်းသို့ တရုတ်သံအမတ်ကြီး Ms. Ma Jia လည်း သွားရောက်စစ်ဆေးခဲ့ဖူးသည်။