သျှမ်းပြည်တောင်ပိုင်း တောင်ကြီးမြို့ပေါ်တွင် ညလူအိပ်မောကျအချိန်တွင် သူခိုးများ အုပ်စုဖွဲ့ကာ အမျိုးသမီးအဆောင်များနှင့် လူနေအိမ်များဝင်ဖောက်ပြီး ခိုးယူသောင်းကျန်းနေကြောင်း သတင်ရရှိသည်။

ဖေဖော်ဝါရီ ၁ရက် ညအချိန်တွင် တောင်ကြီးမြို့ ဘုရားဖြူရပ်ကွက်နှင့် ချမ်းမြသာစည်ရပ်ကွက်ရှိ လူနေအိမ်များနှင့် အဆောင်များကို သူခိုးများက ဝင်ဖောက်ပြီး ဖုန်းနှင့် ငွေများကို ခိုးယူသွားကြောင်း ၎င်းရပ်ကွက်တွင်နေထိုင်သည့် ဒေသခံများက သျှမ်းသံတော်ဆင့်ကိုပြောသည်။

“ဘုရားဖြူရပ်ကွက်က အဆောင်နေတဲ့ ကလေးတွေရဲ့ ဖုန်းပါသွားတယ်။ ပိုက်ဆံက သုံးသိန်းလောက်ပါ သွားတယ်။ ညအချိန်မတော် ခွေး ဟောင်လို့ ထကြည့်လိုက်တော့ သူခိုးတွေက သုံးယောက်လောက်ထင်တယ် အုတ်တံ‌တိုင်းကျော်ပြီး ထွက်ပြေးတာ ဖိနပ်ကျန်ခဲ့တယ်”ဟု ဖြစ်စဉ်သိရှိသူ အမျိုးသမီး တစ်ဦးက ပြောသည်။

အဆိုပါ ဖုန်းနှင့် ငွေသား ခိုးယူခံရသော ကျောင်းသူများသည် နယ်ဘက်မှ လာရောက်ပြီး ကျောင်းတက်နေသူများ ဖြစ်ကြောင်း သိရသည်။

စစ်အာဏာသိမ်းပြီး ၅နှစ်တာ ကာလအတွင်း တောင်ကြီးမြို့ပေါ်တွင် ဒုစရိုက်သမားများ ပေါများလာပြီး၊ နည်းမျိုးစုံ လိမ်လည်မှုဖြစ်ပွားခြင်း၊ ကလေး ပြန်ပေးဆွဲခြင်း၊ ဓားပြတိုက်ခြင်း၊ လုယက်ခြင်း တို့ နေ့စဉ်နှင့် အမျှ ကြုံတွေ့လာရသဖြင့် ဒေသခံများလည်း စိုးရိမ်စိတ်ဖြင့် ကောင်းမွန်စွာ မနေထိုင်ရကြောင်း လည်း တောင်ကြီး မြို့ခံများက ဆိုပြန်သည်။

“ခိုးတဲ့သူက ခုတလော ပိုဆိုးလာတာ ဘယ်သူမှလည်း အရေးမယူပေးကြဘူး။ရဲစခန်းတိုင်ရင်လည်း အချိန်နဲ့ငွေပဲ ကုန်မှာ ခိုးတဲ့သူကို ဖမ်းမိမှာ မဟုတ်ဘူး။ ညအချိန်ဆို သူတို့က အုပ်လိုက်မယ် ၁၀ယောက်နီးပါးလောက် ရှိမယ်။ အိပ်ငွေ့ချပြီး ခိုးတာလား မသိဘူး။ညဆို ကောင်းကောင်းတောင် အိပ်မရဘူး။”ဟု တောင်ကြီးဒေသခံ အမျိုးသားတစ်ဦးက ပြောသည်။

ထို့အပြင် ချမ်းမြသာစည် ရပ်ကွက်တွင်လည်း ယမန်နေ့ (ဖေဖော်ဝါရီ ၁)ရက် ညတွင် အုပ်စုဖွဲ့ခိုးသူများကြောင့် တန်ဖိုးကြီး လက်ဝတ်ရတနာများ ပါသွားကြောင်း သိရသည်။

တောင်ကြီးမြို့သည် အေးချမ်းသာယာသည့် မြို့ဟု ‌မှတ်ချက်ပြုကြသော်လည်း စစ်ကောင်စီ အာဏာသိမ်းပြီးနောက်ပိုင်းတွင် ခိုးဆိုးလုယက်မှုများ ၊ပြန်ပေးဆွဲမှုများဖြင့် စိတ်မအေးချမ်းသည့် မြို့ဖြစ်လာခဲ့သည်။

ပြီးခဲ့သည့် ၂၀၂၅ခုနှစ် ဒီဇင်ဘာလ ဒုတိယပတ်တွင်လည်း တောင်ကြီးမြို့တွင်း အုပ်စုဖွဲ့ခိုးသူများကြောင့် ဆိုင်ကယ်နှင့် မီးကြိုးများ ကားမီးသီးများကို ပါခိုးယူရောင်းစားကြပြီး၊ ကလေးပြန်ပေးဆွဲသည့် အမှုများလည်း ကြားလာရသည်။