သျှမ်းပြည်တောင်ပိုင်း ကွန်ဟိန်းမြို့နယ် ကာလိမြို့အနီးတွင် အွန်လိုင်းငွေလိမ် ကျားဖြန့်လုပ်ငန်း လုပ်ကိုင်သည့် တရုတ်နိုင်ငံသား (၂၃၃) ဦးကို ဆက်စပ်ပစ္စည်းများနှင့် ဖမ်းဆီးရမိခဲ့ကြောင်း စစ်ကော်မရှင်ဘက်မှ သတင်းထုတ်ပြန်သည်။
ဇန်နဝါရီလ (၂၉) ရက်မှ (၃၁) ရက်အတွင်း ကွန်ဟိန်းမြို့နယ် ကာလိမြို့ ကျိုင်းလွန်းကျေးရွာအုပ်စုရှိ အွန်လိုင်းငွေလိမ် ကျားဖြန့်လုပ်ငန်း လုပ်ကိုင်သည့် နေရာများကို စစ်ကော်မရှင်တပ်က ဝင်ရောက်စစ်ဆေးခဲ့ရာ ဝမ်နမ့်မန်းကျေးရွာအနီး (၄) နေရာတွင် တရုတ်နိုင်ငံသား အမျိုးသား (၂၃၃) ဦးတို့ကို ဖမ်းဆီးရမိခဲ့ကြောင်း ယနေ့ (ဖေဖော်ဝါရီ ၁ ) ရက်စွဲဖြင့် စစ်ကော်မရှင်ဘက်မှ သတင်းထုတ်ပြန်သည်။
အဆိုပါ ဖမ်းဆီးမှုကို ဒေသခံပြည်သူများ၏ သတင်းပေးမှုကြောင့် လေကြောင်း ကင်းထောက်ခြင်း၊ နယ်မြေရှင်းလင်းခြင်းတို့ကို ပြုလုပ်ခဲ့ရာ အွန်လိုင်းငွေလိမ် ကျားဖြန့်အလုပ်ရုံများ၊ သွပ်မိုး သက်ကယ်ကာ ယာယီတဲများ၊ အထပ်သားကာ ထမင်းစားဆောင်၊ စားချက်ဆောင်များနှင့် ကွန်ပျူတာ အလုံး (၁၀၀) ကျော်၊ စတားလင့် (၁၃) လုံး၊ မီးစက်ကြီး (၂) လုံး စသည်ဖြင့် ဆက်စပ်ပစ္စည်းများနှင့်တကွ ဖမ်းဆီးရမိခဲ့ကြောင်း ထုတ်ပြန်ချက်တွင် ရေးသားထားသည်။
ထိုသို့ ဖမ်းဆီးရမိခဲ့သူများကို ဥပဒေနှင့်အညီ အရေးယူ ဆောင်ရွက်ပြီး နောက်ကွယ်မှ ပါဝင်ပတ်သက်သူများကိုလည်း စိစစ်ဖော်ထုတ်မည်ဖြစ်ကြောင်း ထုတ်ပြန်ချက်တွင် ရေးသားထားသော်လည်း လက်ခံခွင့်ပြုထားသည့် အဖွဲ့အစည်း အမည်ကို ဖော်ပြထားခြင်း မရှိပါ။
ကွန်ဟိန်းမြို့နယ် ကာလိဒေသသည် ကာလိပြည်သူ့စစ် တပ်မဟာ အမှတ်(၇) ထိန်းချုပ်ရာ ဒေသဖြစ်ပြီး စစ်ကော်မရှင်လက်အောက်ခံ ခြေလျင်တပ်ရင်း ခလရ-၁၅၁ အခြေစိုက်ထားသည်။
အလားတူ ဇန်နဝါရီလအတွင်း စစ်ကော်မရှင်ဘက်မှ သီပေါနှင့် မိုင်းရယ်မြို့နယ် အစပ်တွင် အွန်လိုင်းငွေလိမ် ကျားဖြန့်လုပ်ငန်းများ၊ မူးယစ်ဆေးဝါး ချက်လုပ်သည့်နေရာ (၄) ခုထက်မနည်း တွေ့ရှိခဲ့ပြီး မူးယစ်ဆေးဝါး ချက်လုပ်ရာတွင် အသုံးပြုသည့် ဆက်စပ်ပစ္စည်းများ သိမ်းဆီးရမိကြောင်း ထုတ်ပြန်ထားသော်လည်း လက်ရှိအချိန်ထိ တရားခံ မပေါ်သေးပေ။
စစ်ကော်မရှင် ကျင်းပပြုလုပ်ခဲ့သည့် ရွေးကောက်ပွဲ ဒုတိယပိုင်းတွင် ကွန်ဟိန်းမြို့နယ် မဲဆန္ဒနယ်၌ ရှမ်းနှင့်တိုင်းရင်းသားများ ဒီမိုကရက်တစ်ပါတီ (ကျားဖြူပါတီ SNDP) မှ လွှတ်တော်သုံးရပ်စလုံး၌ အနိုင်ရရှိခဲ့သည်။
Leave a Comments