သျှမ်းပြည် လားရှိုးမြို့ပေါ်ရှိ ဆင်နှစ်ကောင်ဟိုတယ်တွင် စစ်ကော်မရှင်တပ်နှင့် ကိုးကန့်တပ်ဖွဲ့ MNDAA ကိုယ်စားလှယ်များ ထပ်မံတွေ့ဆုံ ဆွေးနွေးခဲ့ကြောင်း စုံစမ်းသိရသည်။

ယနေ့ (ဇန်နဝါရီလ ၃၀ ရက်) နံနက်ပိုင်းတွင် စစ်ကော်မရှင်တပ် ပြန်လည်ထိန်းချုပ်ထားသည့် လားရှိုးမြို့ပေါ်ရှိ ဆင်နှစ်ကောင်ဟိုတယ်တွင် စစ်ကော်မရှင်တပ်နှင့် MNDAA ကိုယ်စားလှယ်များ ထပ်မံတွေ့ဆုံ ဆွေးနွေးခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“၁၀ နာရီလောက်က စပြီး စစ်တပ်နဲ့ ကိုးကန့်ဘက်က ဆင်နှစ်ကောင်မှာ ထပ်တွေ့ကြတယ်လို့ ကြားတယ်။ ဒီမနက်လည်း လားရှိုး-သီပေါကြားက လမ်းမကြီးပေါ်မှာ ကိုးကန့်ဘက်က ဂိတ်ပြန်ထိုင်တယ်၊ မယ်ဟန်နဲ့ စဉ့်အင်တံတားလို နေရာတွေမှာ ကိုးကန့်စစ်သား ပြန်တွေ့လို့ ထူးခြားတယ်။ ရွေးကောက်ပွဲ မတိုင်ခင်ကတော့ အဲ့ဘက်မှာ ဆုတ်ထားတာ” ဟု လားရှိုးမြို့နယ်မှ စစ်ရေးသတင်းရင်းမြစ်တစ်ဦးက ပြောသည်။

ရွေးကောက်ပွဲ ပထမပိုင်း ကျင်းပပြီးနောက် ယမန်နှစ် ၂၀၂၅ ဒီဇင်ဘာလ (၂၉) ရက်တွင် စစ်ကော်မရှင်တပ်နှင့် MNDAA ကိုယ်စားလှယ်များ လားရှိုးမြို့၌ တွေ့ဆုံဆွေးနွေးခဲ့စဉ် ကိုးကန့်တပ်ဘက်မှ သီပေါ-လားရှိုးကြား ပြည်ထောင်စုလမ်းမကြီးတစ်လျှောက် ဖွင့်လှစ်ထားသည့် စစ်ဆေးရေးဂိတ်များကို ပိတ်သိမ်းရန် သဘောတူခဲ့သည်ဟု ဆိုသည်။

ဇန်နဝါရီလ ၁ ရက်နေ့မှ စတင်ပြီး သီပေါတံတားနှင့် သီပေါ-နမ့်လန်မြို့ကြား တပ်စွဲထားသည့် MNDAA တပ်များသည် ကိုးမိုင်လမ်းခွဲမှတဆင့် ဆောင်ကြဲ၊ ဆင်ကျော့ကျေးရွာအုပ်စုနှင့် မိုင်းရယ်မြို့နယ် ဟိုယကျေးရွာအုပ်စုဘက်သို့ တပ်ဆုတ်ခွာသွားခဲ့ကြောင်း ဒေသခံများထံမှ သိရသည်။

သီပေါ-လားရှိုးကြား ပြည်ထောင်စုလမ်းမကြီးပေါ်ရှိ MNDAA စစ်ဆေးရေးဂိတ်များမှာ တစ်လခန့်သာ ပိတ်သိမ်းခဲ့ပြီး ယနေ့ (ဇန်နဝါရီလ ၃၀ ရက်) နံနက်ပိုင်းမှ စတင်ကာ ၎င်းနေရာများတွင် ကိုးကန့်တပ်သားများ ပြန်လည်နေရာယူထားကြောင်း ဒေသခံများက ပြောသည်။

“အရင်က ကိုးကန့်တွေ ဂိတ်ဖွင့်တဲ့နေရာမှာ အခု သူတို့ ပြန်လာစောင့်နေတယ်။ နှစ်သစ်ကူးတုန်းကတော့ စစ်ဆေးရေးဂိတ်တွေ မရှိတော့ဘူးဆိုလို့ ဝမ်းသာလိုက်သေးတယ်။ ဒီမနက်တော့ နဂိုအတိုင်းပဲ ကိုးကန့်ဝတ်စုံနဲ့ စစ်သားတွေ လမ်းမပေါ် ပြန်စောင့်နေတယ်” ဟု လားရှိုး-မန္တလေး ခရီးစဉ်ပြေးဆွဲနေသည့် ယာဉ်မောင်းအမျိုးသားတစ်ဦးက သျှမ်းသံတော်ဆင့်ကို ပြောသည်။

ယခုနှစ်ဆန်းပိုင်းတွင် သီပေါတံတားကြီးမှ ကိုးကန့်တပ်ဖွဲ့ MNDAA ဆုတ်ခွာသွားခဲ့သော်လည်း စစ်ကော်မရှင်ဘက်မှ ယာဉ်ဖြတ်သန်းခွင့် မပြုသေးဘဲ ဆက်လက်ပိတ်ထားပြီး မြန်မာ-တရုတ်နယ်စပ်ရှိ ညီနောင်မဟာမိတ်ထိန်းချုပ် နယ်စပ်ဂိတ်များမှ တင်သွင်းလာသည့် တရုတ်ကုန်ပစ္စည်းများကိုလည်း ဖမ်းဆီးပိတ်ပင်မှုများ အပြင်းအထန် ပြုလုပ်နေကြောင်း ကုန်သည်များထံမှ သိရသည်။

တရုတ်ဖိအားကြောင့် လားရှိုးမြို့ကို စစ်ကော်မရှင်ထံ ယမန်နှစ် ၂၀၂၅ ဧပြီလတွင် ပြန်လည်လွှဲပြောင်းခဲ့ပြီးနောက် MNDAA နှင့် စစ်ကော်မရှင်တပ်အကြား လားရှိုးမြို့ပေါ်တွင် ပုံမှန်တွေ့ဆုံဆွေးနွေးမှု မကြာခဏ ပြုလုပ်လေ့ရှိသော်လည်း နှစ်ဘက်စလုံးမှ တစုံတရာ သတင်းထုတ်ပြန်ခြင်း မရှိပေ။

လက်ရှိတွင် စစ်ကော်မရှင်ထိန်းချုပ်ထားသည့် လားရှိုးမြို့ပေါ် ရပ်ကွက်များတွင် စစ်မှုထမ်းတပ်သားသစ် ခေါ်ယူရန် ရပ်ကွက်အတွင်း လူဦးရေစာရင်း ပြန်လည်ကောက်ယူနေပြီး MNDAA ထိန်းချုပ်ထားသည့် လားရှိုး-မိုင်းရယ်ကြား ကျေးရွာများတွင်လည်း MNDAA ဘက်မှ တပ်သားသစ် အတင်းအကြပ် စုဆောင်းနေကြောင်း ဒေသခံများက ပြောသည်။