ထိုင်း-မြန်မာနယ်စပ် တာချီလိတ်မြို့ပေါ်တွင် ပြန်ပေးဆွဲမှု၊ ဓားပြတိုက်မှုများ ဆက်တိုက်ဖြစ်ပွားနေသဖြင့် လုံခြုံရေးအတွက် စိုးရိမ်နေရကြောင်း မြို့ခံများက ပြောသည်။
ဖြစ်စဉ်မှာ ယမန်နေ့ ဇန်နဝါရီလ ၂၄ ရက် နံနက် ၉ နာရီကျော် အချိန်တွင် ဆန်ဆိုင်း (က) ရပ်ကွက်နေ အသက် (၅၀) အရွယ်ခန့် အမျိုးသမီးတစ်ဦးသည် ၎င်း၏ နေအိမ်ဈေးဆိုင်အတွင်းရှိ ဈေးရောင်းကောင်တာတွင် ထိုင်နေစဉ် အဖြူရောင်ကားပေါ်မှ အမျိုးသား (၄) ဦးဆင်းလာပြီး သေနတ်ဖြင့် ချိန်ရွယ်ကာ ကားပေါ်သို့ တင်ဆောင်၍ မောင်းနှင်ထွက်ပြေးသွားခဲ့ကြောင်း ဒေသခံများက ပြောသည်။
ပြန်ပေးဆွဲခံရသူမှာ အသက် (၅၀) အရွယ် နန်းစံတစ်ဟု အမည်သိရပြီး ယမန်နေ့က ပိုက်ဆံဖြင့် ပြန်ရွေးထုတ်နိုင်ခဲ့သဖြင့် ပြန်လည်လွတ်မြောက်လာခဲ့ကြောင်း တာချီလိတ်မြို့ခံ နန်းအေး (အမည်လွှဲ)က သျှမ်းသံတော်ဆင့်ကို ပြောသည်။
“ပြန်ပေးဆွဲခံရတဲ့ အမျိုးသမီးတော့ မနေ့က ငွေပေးပြီး လွတ်လာပြီလို့ ကြားရတယ်။ ဘယ်လောက်ပေးရလဲ တော့ မသိရသေးဘူး” ဟု နန်းအေးက ပြောသည်။
သို့သော် နန်းစံတစ် ပြန်လည်လွတ်မြောက်လာခြင်းနှင့် ပတ်သက်၍ သျှမ်းသံတော်ဆင့်မှ သီခြားအတည် ပြုနိုင်ခြင်း မရှိသေးပေ။
အဆိုပါပြစ်မှုကျူးလွန်သူ တရားခံများကို ဖမ်းဆီးရမိရေးအတွက် စစ်ကော်မရှင်လက်အောက်ခံ လုံခြုံရေးပူးပေါင်းအဖွဲ့များက လိုက်လံစုံစမ်းနေသော်လည်း ယနေ့အချိန်ထိ ပြစ်မှုကျူးလွန်ခဲ့သူများကို ဖမ်းဆီးရမိခြင်း မရှိသေးကြောင်း သိရသည်။
အလားတူ ဇန်နဝါရီလ ၁၆ ရက်တွင်လည်း တာချီလိတ်မြို့ ဆန်ဆိုင်း (ခ) ရပ်ကွက်နေ ဦးစိုင်းဟန်လျန်းကိုလည်း အမျိုးသား ၄ ဦးက ကားပေါ်သို့တင်ဆောင်၍ ပြန်ပေးဆွဲခေါ်ဆောင်သွားခဲ့ကြောင်း တာချီလိတ်မြို့ခံများက ပြောသည်။
“ပြီးခဲ့တဲ့ အပတ်တုန်းကလည်း ပီဟန်လျန်းကို ပြန်ပေးဆွဲသွားသေးတယ်။ အခုအချိန်ထိ ပြန်လွတ်လာပြီလို့ မကြားမိသေးဘူး။ အဲ့တုန်းကလည်း အခုလိုကားပေါ်တင်ပြီး ဖမ်းသွားတာ၊ ပြီးတော့ ပိုက်ဆံ ဘတ်သိန်း ၁၀၀ တောင်းတယ်လို့ ကြားတယ်” ဟု တာချီလိတ်မြို့ခံ နန်းခမ်း (အမည်လွှဲ)ကလည်း ပြောသည်။
အာဏာသိမ်းပြီးနောက်ပိုင်း တရားဥပဒေစိုးမိုးမှု ကင်းမဲ့လာခြင်းအပါအဝင် အခြားအကြောင်းအရင်များကြောင့် တာချီလိတ်မြို့ပေါ်က စီးပွားရေးလုပ်ငန်းရှင်များ၊ သူဌေးများက ပြန်ပေးဆွဲသမားများ၏ ပစ်မှတ်ဖြစ်လာကြောင်း ဒေသခံများ၏ ပြောပြချက်အရ သိရသည်။
တာချီလိတ်မြို့ခံ အမျိုးသားတစ်ဦးက “အခုကိုယ့်အိမ်မှာနေရင်တောင် မလုံခြုံတော့ဘူး။ သူတို့ အိမ်ထဲဝင်လုပ်ချင်ရင် လွယ်လွယ်နဲ့ ဝင်လို့ရနေတယ်။ သေနတ်ကိုင်ပြီး ဝင်လာရင် ကိုယ်တွေက ဘာမှလုပ်လို့ မရတော့ဘူး” ဟု ပြောသည်။
ပြီးခဲ့သည့် ၂၀၂၄ ဒီဇင်ဘာ ၁၃ ရက်တွင်လည်း တာချီလိတ်မြို့ မယ်ခေါင်ရပ်ကွက် ဗိုလ်ချုပ်လမ်းမနေ OK ငွေလွှဲဆိုင်ဖွင့်ထားသူ အသက် (၇၈) နှစ် ဦးရန်ထင်ချန်းကို အမျိုးသား ၃ က ဖမ်းဆီးခေါ်ဆောင်သွားခဲ့ကြောင်း သိရသည်။
ထို့နောက် ပြစ်မှုကျူးလွန်သူတရားခံများကို လုံခြုံရေးတပ်ဖွဲ့ဝင်များက လိုက်လံစုံစမ်းခဲ့ရာ ၂၀၂၄ ဒီဇင်ဘာလ ၁၈ ရက် ညနေပိုင်တွင် တရားခံအမျိုးသား ၆ ဦးကို မူးယစ်ဆေးဝါးများ၊ ပြစ်မှုကျူးလွန်ရာတွင် အသုံးပြုခဲ့သည့် လက်နက်ခဲယမ်းများ၊ ဆက်စပ်ပစ္စည်းများနှင့်အတူ အသေပစ်ခတ် ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့မှ သိရသည်။
Leave a Comments