သျှမ်းပြည်တောင်ပိုင်း ကျေးသီးနှင့် မိုင်းရှူးမြို့နယ်တွင် ရွေးကောက်ပွဲအတွက် ဆန္ဒမဲပေးသူ နည်းပါးခဲ့ကြောင်း စုံစမ်းသိရသည်။
ယနေ့ (ဇန်နဝါရီလ ၂၅ ရက်) တွင် စစ်ကော်မရှင် ကျင်းပပြုလုပ်သည့် ရွေးကောက်ပွဲ၌ ကျေးသီးမြို့နယ်မှ ဆန္ဒမဲပေးသူ နည်းပါးခြင်းကြောင့် ရပ်ကွက်အတွင်း သက်ဆိုင်ရာ အုပ်ချုပ်ရေး တာဝန်ရှိသူများက ဆန္ဒမဲထည့်ရန် လိုက်လံဆော်သြခဲ့ရကြောင်း ကျေးသီးမြို့နယ် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မဲသွားထည့်တာကတော့ ထည့်ကြတယ် နည်းတယ်။ ထည့်တဲ့လူ သိပ်မရှိလို့ ရပ်ကွက်ထဲကို မဲသွားပေးဖို လိုက်ဆော်နေကြရတာ။ တချို့ကလည်း အလုပ်တွေရှိတော့ မသွားဖြစ်ကြတာလည်း ပါမယ်ထင်တယ်။ လုံခြုံရေးတွေလည်း ရဲတွေ စစ်သားတွေကတော့ ချထားတယ်”ဟု ကျေးသီးမြို့နယ် ဒေသခံအမျိုးသမီးတစ်ဦးက ပြောသည်။
ထို့အပြင် ဆန္ဒမဲသွားပေးသည့် သက်ကြီးပိုင်းပုဂ္ဂိုလ်များမှာ ပထမဆုံးအကြိမ် အီလက်ထရောနစ် မဲပေးစက်ဖြင့် မဲပေးချိန်တွင် အခက်အခဲများ ကြုံတွေ့ခဲ့ကြောင်း ၎င်းက ဆက်ပြောသည်။
“လူကြီးတွေ သက်ကြီးပိုင်းတွေ တစ်ခါမှ စက်နဲ့ မဲမထည့်ဖူးတော့ အခက်အခဲလေးတော့ ရှိတာပေါ့။ မဲသွားပေးတဲ့ အချိန်မှာ မဲရုံစောင့်တွေက သူတို့ကို အော်ပြောတာမျိုးတွေ ရှိတယ်။ သက်ကြီးပိုင်းတွေကလည်း သိပ်ပြီး နားမလည်ကြဘူးလေ”ဟု ကျေးသီးမြို့နယ် ဒေသခံ ၎င်းအမျိုးသမီးက ဆက်ပြောသည်။
အလားတူ မိုင်းရှူးမြို့နယ်တွင်လည်း မဲရုံသို့ ဆန္ဒမဲလာပေးသူ နည်းပါးပြီး မဲရုံပတ်ဝန်းကျင်များတွင်လည်း စစ်ကော်မရှင်တပ်သားနှင့် လက်အောက်ခံ ရဲတပ်ဖွဲ့များက လုံခြုံရေး တင်းကြပ်ထားကြောင်း မိုင်းရှူးမြို့နယ် ဒေသခံအမျိုးသမီးတစ်ဦးက ပြောသည်။
“မဲသွားပေးတဲ့ လူကတော့ နည်းတယ်၊ သိပ်လည်းမရှိဘူး။ သူတို့က မဲရုံထဲတော့ မစောင့်ဘူး၊ အပြင်မှာ စောင့်တာ အများကြီးပဲ။ ရဲနဲ့ စစ်သား စုစုပေါင်း ၃၀ ဝန်းကျင်လောက် ရှိတယ်။ ရဲကားနဲ့ စစ်ကား ၄ စီးတောင်မှ လုံခြုံရေးယူထားတာ။ မဲရုံတစ်နေရာပဲကို အဲ့လောက်စောင့်တယ်”ဟု မိုင်းရှူးမြို့နယ် ဒေသခံအမျိုးသမီးတစ်ဦးက ပြောသည်။
စစ်ကော်မရှင် ကျင်းပပြုလုပ်သည့် ရွေးကောက်ပွဲ အပိုင်း ၃ တွင် သျှမ်းပြည်အတွင်း မြို့နယ် ၉ မြို့နယ် ပါဝင်ပြီး မက်မန်း၊ ပင်လောင်း၊ ညောင်ရွှေ၊ ဖယ်ခုံ၊ မိုးနဲ၊ ကျေးသီး၊ မိုင်းရှူး၊ သီပေါနှင့် ကျောက်မဲမြို့နယ်တို့ ဖြစ်သည်။
ကျေးသီးမြို့နယ်တွင် မြို့ပေါ်ရပ်ကွက်၌ မဲရုံ (၁၁) ရုံ၊ ကျေးရွာအုပ်စု (၃၂) အုပ်စုတွင် မဲရုံပေါင်း (၆၀) ရုံ နှင့် မိုင်းရှူးမြို့နယ်တွင် မြို့ပေါ်ရပ်ကွက်၌ မဲရုံ (၇) ရုံ၊ ကျေးရွာအုပ်စု (၁၇) စုတွင် မဲရုံပေါင်း (၃၂) ရုံ ရှိကြောင်း သိရသည်။
ကျေးသီးနှင့် မိုင်းရှူးမြို့နယ် မဲဆန္ဒနယ်တို့တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၊ ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) နှစ်ပါတီသာ ဝင်ရောက်ယှဉ်ပြိုင်လျက်ရှိသည်။
Leave a Comments