သျှမ်းပြည် ရွာငံမြို့နယ် အလယ်ချောင်ကျေးရွာအုပ်စုအတွင်းရှိ မြေနီကုန်းကျေးရွာတွင် ရာအိမ်မှူးတစ်ဦး အသတ်ခံရကြောင်း သတင်းရရှိသည်။

ဖြစ်စဉ်မှာ ဇန်နဝါရီလ ၂၁ ရက်က ည ၁၀ နာရီခွဲတွင် ရွာငံမြို့နယ် မြေနီကုန်းကျေးရွာ ရာအိမ်မှူး အသက် (၆၅) နှစ် ဦးမြင့်ဌေးကို အမည်မသိ လက်နက်ကိုင်အဖွဲ့မှ ဖမ်းဆီးခေါ်ဆောင်သွားခဲ့ကြောင်း သိရသည်။

ထို့နောက် ၎င်း၏ မိသားစုဝင်များမှ လိုက်လံရှာဖွေခဲ့ရာ ဇန်နဝါရီလ ၂၂ နံနက်ပိုင်းတွင် မြေနီကုန်းကျေးရွာမှ လူးကျေးရွာသို့ သွားသည့်လမ်းပေါ်တွင် ဦးမြင့်ဌေးကို ဓားဒဏ်ရာများဖြင့် သေဆုံးလျက် ပြန်လည်တွေ့ရှိ ခဲ့ကြောင်း ဒေသခံများက ပြောသည်။

အဆိုပါ ရာအိမ်မှူးအသတ်ခံရခြင်းနှင့် ပတ်သက်၍ PDF အဖွဲ့ဝင် ၈ ဦးက လုပ်ဆောင်ခဲ့ခြင်းဖြစ်ကြောင်း စစ်ကော်မရှင်က ယမန်နေ့ ဇန်နဝါရီလ ၂၃ ရက်တွင် သတင်းထုတ်ပြန်သည်။

ရွာငံမြို့နယ်အခြေစိုက် ဓနုပြည်နယ်အမျိုးသားကာကွယ်ရေးတပ်မတော် (DSNDA) ၏ သတင်းနှင့်ပြန်ကြားရေး တာဝန်ခံ ကိုကျားပျံကတော့ “ပြည်သူအပေါ် ထိခိုက်လာတာများလာရင်တော့ တော်လှန်ရေးအဖွဲ့အနေနဲ့ အခုလိုပဲ သတ်ဖြတ်နေကြရအုံးမှာပဲ” ဟု သျှမ်းသံတော်ဆင့်ကို ပြောသည်။

သို့သော် မည့်သည့် လက်နက်ကိုင်အဖွဲ့က လုပ်ဆောင်ခဲ့ခြင်း မသိရှိရသေးကြောင်း ၎င်းက ပြောသည်။

ထိုသို့ ရာအိမ်မှူးတစ်ဦး အသတ်ခံရပြီးနောက် စစ်ကော်မရှင်တပ်ဖွဲ့ဝင်များက မြို့အဝင်၊ အထွက် လမ်းများအားလုံးကို စစ်ဆေးတင်းကြပ်နေလျက်ရှိရာ ယမန်နေ့ ဇန်နဝါရီလ ၂၃ ရက်က မြေနီကုန်းကျေးရွာမှ အလယ်ချောင်ကျေးရွာသို့ သွားသည့်လမ်းပေါ်တွင် ပြည်သူ့ကာကွယ်ရေးတပ် PDF နှင့် တိုက်ပွဲဖြစ်ပွားခဲ့ကြောင်း ရွာငံမြို့နယ် ဒေသခံအမျိုးသမီးတစ်ဦးက ပြောသည်။

“ရာအိမ်မှူးအသတ်ခံရပြီးနောက်ပိုင်း တော်လှန်ရေးတပ်ဖွဲ့နဲ့ တိုက်ပွဲခဏဖြစ်သေးတယ်။ လက်နက်ကြီးတွေနဲ့ရော အပြန်အလှန် ပစ်ခတ်နေကြတယ်။ အခုအချိန်ထိတော့ သူတို့စစ်ဆေးတင်းကြပ်နေတုန်းပဲ။ ကားတွေ၊ ဆိုင်ကယ်တွေ ပေးမဖြတ်သေးဘူး” ဟု ဒေသခံအမျိုးသမီးတစ်ဦးက ပြောသည်။

စစ်တပ်အာဏာသိမ်းပြီးနောက်ပိုင်း ရွာငံမြို့နယ်အတွင်းရှိ ဆယ်အိမ်မှူး၊ ရာအိမ်မှူးနှင့် အုပ်ချုပ်ရေးမှူးများသည် စစ်တပ်သတင်းပေး သို့မဟုတ် ဒဟန်ဟုစွပ်စွဲပြီး မကြာခဏဆိုသလို အသတ်ခံရနေရကြောင်း ဒေသခံများ၏ ပြောပြချက်အရ သိရသည်။

သျှမ်းသံတော်ဆင့်မှ သီခြားကောက်ယူထားသည့် စာရင်းအရ ၂၀၂၄ ခုနှစ်မှ ၂၀၂၅ ခုနှစ် နိုဝင်ဘာလအထိ ရွာငံမြို့နယ်အတွင်းရှိ အရပ်သားနှင့် အုပ်ချုပ်ရေးမှူးများကို ဒလန်ဟုစွပ်စွဲကာ အသတ်ခံရသူ စုစုပေါင်း ၁၃ ဦးအထိ ရှိကြောင်း သိရသည်။

လက်ရှိ ရွာငံမြို့နယ်အတွင်း စစ်ကော်မရှင်တပ်နှင့် ပအိုဝ်းပြည်သူ့စစ် (PNA) အပါအဝင် ဓနုပြည်သူ့လွတ်မြောက်ရေးတပ်မတော် (DPLA)၊ ၎င်းနှင့်ပူးပေါင်း လှုပ်ရှားနေသည့် ချိုးဖြူတော်လှန်ရေးတပ်ဖွဲ့ (JPRF)နှင့် ဓနုပြည်နယ်အမျိုးသားကာကွယ်ရေးတပ်မတော် (DSNDA) တို့ လှုပ်ရှားနေသည်။