သျှမ်းပြည် မိုင်းရှူးမြို့နယ်တွင် စစ်ကော်မရှင် ကျင်းပမည့် ရွေးကောက်ပွဲကို လူထုစိတ်မဝင်စားဘဲ မဲတုံကင်ကတ်များကို အိမ်တိုင်ရာရောက် လိုက်ဝေပေးနေရကြောင်း စုံစမ်းသိရသည်။
လာမည့် (ဇန်နဝါရီလ ၂၅ ရက်)တွင် ပြုလုပ်ကျင်းပမည့် ရွေးကောက်ပွဲ တတိယပိုင်းတွင် သျှမ်းပြည်တောင်ပိုင်း မိုင်းရှူးမြို့နယ်လည်း ပါဝင်ပါသည်။
မိုင်းရှူးမြို့နယ်တွင် စစ်ကော်မရှင် ကျင်းပမည့် ရွေးကောက်ပွဲ တတိယပိုင်းကို လူထု စိတ်ဝင်စားမှု မရှိသည့်အတွက် သက်ဆိုင်ရာ အုပ်ချုပ်ရေးမှူးများက အိမ်တိုင်ရာရောက် မဲနံပါတ် (တုံကင်ကတ်) များကို လိုက်ဝေပေးနေကြောင်း မိုင်းရှူးမြို့ဒေသခံ အသက် ၃၀ ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မြို့ထဲမှာတော့ ရွေးကောက်ပွဲအတွက် လူထုစိတ်ဝင်စားမှု နည်းကြတယ်။ မဲတုံကင်ကတ် ယူဖို့တောင် လူတွေကလည်း စိတ်မဝင်စားကြတော့ အုပ်ချုပ်ရေးမှူးက အိမ်ထိ မဲတုံကင်ကတ် လိုက်ပေးနေတယ်။ လာပေးရင်းနဲ့ ဇန်နဝါရီလ ၂၅ ရက်မှာ မဲသွားထည့်ဖို့အတွက် ပြောတာပေါ့”ဟု မိုင်းရှူးမြို့ဒေသခံ အသက် ၃၀ ဝန်းကျင် အမျိုးသမီးတစ်ဦးက ပြောသည်။
ယမန်နေ့ (ဇန်နဝါရီလ ၂၀ ရက်) နံနက် ၁၀ နာရီဝန်းကျင်တွင် မိုင်းရှူးမြို့ရှိ စစ်ကော်မရှင်လက်အောက်ခံ ခရိုင်/မြို့နယ် အထွေထွေအုပ်ချုပ်ရေးဦးစီးဌာနနှင့် အခြားဌာနဆိုင်ရာ တာဝန်ရှိသူများက ရွေးကောက်ပွဲတွင် မဲထည့်ကြရန် ရပ်ကွက်ထဲ လိုက်လံဆော်ဩနေကြောင်း မိုင်းရှူးမြို့နယ် ဒေသခံအမျိုးသမီးတစ်ဦးက ထပ်လောင်းပြောသည်။
“ခရိုင်ထွေအုပ်နှင့် မြို့နယ်ထွေအုပ်တွေက မနက် ၁၀ နာရီ အိမ်တိုင်းကို အစည်းအဝေး ခေါ်တာ။ ပါတီဝင်တွေကိုယ်စား လိုက်စည်းရုံးပေးတာတော့ မဟုတ်ဘူးတဲ့၊ ဒါပေမဲ့ သူတို့က အိမ်တိုင်း မဲလာထည့်ရမယ် လို့တော့ ပြောသွားတယ်။ အရင် ရွေးကောက်ပွဲတွေတုန်းက အဲ့လိုတွေ လိုက်စည်းရုံးတာမျိုး မရှိခဲ့ဖူးဘူး”ဟု ၎င်းဒေသခံ အမျိုးသမီးက ဆက်ပြောသည်။
မိုင်းရှူးမြို့ပေါ်နှင့် အနီးပတ်ဝန်းကျင် ကျေးရွာများတွင် မဲရုံစောင့် တာဝန်ကျမည့် စစ်ကော်မရှင်လက်အောက်ခံ ဌာနဆိုင်ရာ ဝန်ထမ်းများကို ဇန်နဝါရီလ ၁၈ ရက်မှ စပြီး ရွေးကောက်ပွဲအတွက် ကြိုတင်မဲများ ထည့်ခိုင်းနေကြောင်း ဒေသခံများထံမှ သိရသည်။
“မြို့ထဲမှာလည်း အစိုးရဝန်ထမ်းတွေက စာသင်ကျောင်းတွေမှာ မဲသွားပေးနေကြတယ်။ ရွာမှာ တာဝန်ကျတဲ့ ဝန်ထမ်းတွေကလည်း ရွာမှာပဲ ထည့်ရတယ်၊ ဝန်ထမ်းတွေကို အကုန် မဲပေးခိုင်းနေတာပေါ့”ဟု မိုင်းရှူးမြို့ဒေသခံ အမျိုးသမီးတစ်ဦးက ပြောသည်။
မိုင်းရှူးမြို့နယ် မဲဆန္ဒနယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၊ ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) နှစ်ပါတီသာ ဝင်ရောက်ယှဉ်ပြိုင်ကြောင်း သိရသည်။
စစ်ကော်မရှင် ကျင်းပပြုလုပ်မည့် ရွေးကောက်ပွဲ အပိုင်း ၃ တွင် သျှမ်းပြည်အတွင်း မြို့နယ် ၉ မြို့နယ် ပါဝင်ပြီး မက်မန်း၊ ပင်လောင်း၊ ညောင်ရွှေ၊ ဖယ်ခုံ၊ မိုးနဲ၊ ကျေးသီး၊ မိုင်းရှူး၊ သီပေါနှင့် ကျောက်မဲမြို့နယ်တို့ ဖြစ်သည်။
Leave a Comments