သျှမ်းပြည် လားရှိုးမြို့နှင့် မိုင်းရယ်မြို့ကြားရှိ ဈေးဆိုင်များကို ၂၀၂၆ နှစ်ဆန်းပိုင်းမှ စတင်ပြီး တစ်လချင်း အခွန်ပေးဆောင်ရန် ကိုးကန့်တပ်ဖွဲ့ MNDAA မှ ကောက်ခံနေကြောင်း စုံစမ်းသိရသည်။

ဇန်နဝါရီလ ၁၂ ရက်မှ စတင်ပြီး လားရှိုးမြို့နှင့် မိုင်းရယ်မြို့ကြား လမ်းမကြီးတစ်လျှောက် နမ့်ပေါင်၊ ဟိုယ ကျေးရွာအုပ်စုများရှိ ဈေးဆိုင်များနှင့် စီးပွားရေးလုပ်ငန်းများကို ၂၀၂၆ ခုနှစ်အတွင်း တစ်လချင်း အခွန်ပေးဆောင်ရန် ကိုးကန့်တပ်ဖွဲ့ MNDAA လက်အောက်ခံ အခွန်ဌာန တာဝန်ရှိသူများမှ လာရောက်ပြောဆိုခဲ့ကြောင်း ဒေသခံများက ပြောသည်။

MNDAA အခွန်ကောက်ခံမည့် လားရှိုး-မိုင်းရယ်ကြားရှိ ကျေးရွာများသည့် စစ်ကော်မရှင် ကျင်းပပြုလုပ်ခဲ့သည့် ရွေးကောက်ပွဲ အပိုင်း(၁) နှင့် အပိုင်း(၂)တွင်လည်း မဲထည့်ပေးခဲ့ရသည်။

“တစ်ဆိုင်ကို တရုတ်ယွမ်နဲ့ ၅၀ ကောက်တယ်၊ မြန်မာငွေနဲ့ဆိုရင် ၃ သောင်းကျတယ်။ တစ်လချင်းစီ အဲ့လိုကောက်ပြီး လတိုင်းကောက်သွားမယ်လို့ ပြောတယ်။ မနေ့ကစပြီး ၁ လပိုင်းအတွက် ကောက်တယ်၊ နောက်လလည်း အခွန်သွားထည့်ဖို့ ထပ်ခေါ်မယ်လို့ ပြောထားတယ်။ ဒီနယ်မြေက လူတွေက စစ်တပ်လုပ်တဲ့ ရွေးကောက်ပွဲမှာလည်း မဲထည့်ပေးခဲ့ရတယ်” ဟု နမ့်ပေါင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယခုနှစ် ၂၀၂၆ ဇန်နဝါရီလမှ စတင်ပြီး ကိုးကန့်တပ်ဖွဲ့မှ ဈေးသည်များထံ အခွန်ကောက်ခံမည့် ပုံစံမှာ ဆိုင်ခန်းနေရာ အကျယ်အဝန်းနှင့် ရောင်းချသည့် ကုန်အမျိုးအစားအလိုက် တစ်လလျှင် တရုတ်ယွမ်ငွေ ၅၀ မှ ၁၀၀ (မြန်မာကျပ်ငွေ ကာလပေါက်ဈေး သုံးသောင်းမှ ခြောက်သောင်းခန့်) ဖြစ်ပြီး အခွန်ဆောင်လက်မှတ် စာအုပ်များလည်း ထုတ်ပေးထားကြောင်း သိရသည်။

ထိုသို့ MNDAA ဘက်မှ တစ်လချင်းစီ ကောက်ခံမည့် အခွန်နှုန်းထားမှာ များပြားနေခြင်းကြောင့် လားရှိုး-မိုင်းရယ်ကြားရှိ တပိုင်တနိုင် ဈေးဆိုင်ပိုင်ရှင်များနှင့် စီးပွားရေးလုပ်ငန်းရှင်များမှာ အခက်အခဲများ ကြုံတွေ့နေရပြီး အချို့မှာ ဆိုင်ပိတ်သိမ်းရမည့် အခြေအနေ ရောက်နေကြောင်း ဒေသခံများက ပြောဆိုသည်။

“အဲ့လိုသွားထည့်ရတာ မကြည်ဖြူပေမယ့် မလွန်ဆန်နိုင်ဘူးလေ။ ကိုးကန့်ကောက်တဲ့ နှုန်းထားက တော်တော်များတယ်၊ နောက်ပြီး တစ်ခါတည်း မဟုတ်ဘူး။ အခုက လတိုင်း ထည့်ရမှာဆိုတော့ တော်တော်နာတယ်။ သူတို့သေနတ်ကိုင်ထားတော့လည်း ကြောက်ကြောက်နဲ့ ထည့်ရတာပဲ။ ဒီအလုပ်မှ မလုပ်ရင်လည်း တခြားလုပ်စရာ မရှိဘူးလေ” ဟု နမ့်ပေါင်ဒေသမှ ဆိုင်ပိုင်ရှင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယမန်နှစ် ၂၀၂၅ ဒီဇင်ဘာအတွင်း MNDAA လက်အောက်ခံ ဘဏ္ဍာရေးဌာန အခွန်ရုံးမှ အခွန်ဆောင်လက်မှတ် စာအုပ်များ ထုတ်ပေးခဲ့ပြီး ၎င်းအခွန်စာအုပ်အတွက် ဈေးသည်များမှ ကျပ်ငွေ ၅ သောင်းခန့် ပေးဆောင်ရကြောင်း ဒေသခံများထံမှ သိရသည်။

ပြီးခဲ့သည့် ဇန်နဝါရီလ (၁) ရက်မှ စတင်ပြီး လားရှိုးမြို့နှင့် မိုင်းရယ်မြို့ကြားတွင် ကိုးကန့်တပ်များ ဖွင့်လှစ်ထားသည့် စစ်ဆေးရေးဂိတ်များကို ပိတ်သိမ်းခဲ့သော်လည်း တပ်ပြောင်းရွှေ့ ဆုတ်ခွာခြင်း မရှိသည့်ဘဲ MNDAA တပ်သားများ မူလအတိုင်း သွားလာလှုပ်ရှားနေကြောင်း ဒေသခံများက ပြောဆိုသည်။

အလားတူ တန့်ယန်း-မိုင်းရယ်လမ်းခွဲ ဟိုယကျေးရွာအုပ်စုအနီး စစ်ကော်မရှင်လက်အောက်ခံ ခြေလျင်တပ်ရင်း ခလရ-၆၇ တပ်ရှိ စစ်ဆေးရေးဂိတ်လည်း ပိတ်သိမ်းသွားခဲ့ကြောင်း မိုင်းရယ်ဒေသခံများထံမှ သိရသည်။