မိမိတို့ ထိန်းချုပ်ဒေသအတွင်းတွင် ရှိသော သျှမ်း၊ တအာင်း၊ ကချင်၊ ဗမာ၊ ဂေါ်ရခါး၊ ခိုလှုံလီရှော၊ လီဆူ၊ ကိုးကန့် နှင့် အခြားတိုင်းရင်းသားများစွာ စုပေါင်းနေထိုင်ကြခြင်းဖြစ်သောကြောင့် လူမျိုးတမျိုးနှင့်တမျိုး မေတ္တာတရားဖြင့် အတူနေထိုင်သွားရမှာဖြစ်သည်ဟု တအာင်းတပ် (TNLA)မှ ဥက္ကဋ္ဌ ဗိုလ်ချုပ်ကြီး တားအိုက်ဘုန်းက ပြောသည်။
ယနေ့ ဇန်နဝါရီ ၁၂ ရက်နေ့တွင် ကျရောက်သော တအာင်းအမျိုးသားတော်လှန်ရေးနေ့ (၆၃) နှစ်ပြည့် ဂုဏ်ပြုမိန့်ခွန်း ပြောကြားရာ ထည့်သွင်းပြောကြားခဲ့ခြင်းဖြစ်သည်။
နှစ်ပေါင်း (၇၀) နီးပါး စစ်အစိုးရအဆက်ဆက်၏ အုပ်ချုပ်ရေးယန္တယားဖြင့် လည်ပတ်ခဲ့ခြင်းဖြစ်သည့်အတွက် မြေပြင်ပကတိမှာ စုပေါင်းနေထိုင်ကြသော မိမိတို့ နယ်မြေခံ ဒေသခံတိုင်းရင်းသားအချင်းချင်း ချစ်ခင်ရင်းနှီးစွာ နှင့် အတူယှဉ်တွဲနေထိုင်တတ်ရန် မေ့လျော့နေခဲ့ကြောင်းလည်း တားအိုက်ဘုန်းက ပြောသည်။
TNLA ဥက္ကဋ္ဌက လူမျိုးစုအချင်းချင်း မေတ္တာတရားဖြင့် နေထိုင်ကြရမည်ဟု ပြောသော်လည်း TNLA ထိန်းချုပ်ဒေသများတွင် တအာင်းမဟုတ်သော တိုင်းရင်းသားများအပေါ် ခွဲခြားဆက်ဆံမှုများ ရှိနေကြောင်း နမ့်ခမ်းဒေသခံတစ်ဦးက ပြောသည်။
“မတူတာတော့ အမှန်ပဲ၊ ဘာကြောင့်သိလည်းဆိုတော့ လွန်ခဲ့တဲ့ကျောင်းတက်ချိန်တုန်းက သူတို့ရဲ့ ရိုးရာဝတ်စုံဝတ်ရမှာပေါ့နော်၊ တခြားတိုင်းရင်းသားဝတ်စုံတွေ ကိုယ့်ရိုးရာဝတ်စုံတွေ မဝတ်ရဘူး၊ အဲဒီလိုမျိုး ခွဲခြားတာတို့ အဲဒီလိုမျိုးတွေ ရှိတယ်” ဟု နမ့်ခမ်းဒေသခံက ပြောသည်။
အလားတူ TNLA မှ ဆက်ကြေးကောက်ခံရာတွင်လည်း ၎င်းတို့ တအာင်းလူမျိုးများကို အနည်းငယ်သာ ကောက်ခံပြီး၊ အခြားသော တိုင်းရင်းသားများကို အများအပြားကောက်ခံကြောင်း စသဖြင့် မတူညီသော ပုံစံမျိုးဖြင့် ကောက်ခံနေကြောင်း ဒေသခံများက ပြောသည်။
ဒေသတွင်းတွင်ရှိသော တိုင်းရင်းသားညီအကိုများလည်း မတူကွဲပြားသည့် ကိုးကွယ်ရာဘာသာ၊ ရိုးရာဓလေ့၊ နောက်ခံသမိုင်းကြောင်းများကို အပြန်အလှန်လေးစားမှုထားရှိပြီး လက်တွဲနေထိုင်သွားကြရမှာဖြစ်ကြောင်း ဗိုလ်ချုပ်ကြီး တားအိုက်ဘုန်းက ပြောသည်။
အလားတူ ပြောင်းလဲလာသော ဒေသအခြေအနေ နှင့် တိုးတက်မှုများကို နားလည်လက်ခံပြီး အတူရင်ဆိုင်ကျော်လွှားနိုင်ရန်လည်း လိုအပ်ကြောင်း ၎င်းက ဆက်ပြောသည်။
ပြီးခဲ့သည့် ၂၀၂၅ ခုနှစ်၊ ဖေဖော်ဝါရီလအတွင်း သျှမ်းပြည်မြောက်ပိုင်း သီပေါမြို့ကို TNLA ထိန်းချုပ်ထားချိန် သီပေါမြို့အဝင်မုခ်ဦး ဆိုင်းဘုတ်ပေါ်က သျှမ်းအလံ နှင့် သျှမ်းစာကို ဖြုတ်ချခဲ့ခြင်းအပေါ် ဝေဖန်မှုမြင့်တက်လာခြင်းကြောင်း နဂိုမူလအတိုင်း ပြန်လည်ရေးသားခဲ့ရသည့် ဖြစ်စဉ်များလည်း ရှိခဲ့သည်။
လူမျိုးတမျိုးနှင့်တမျိုး မေတ္တာတရားဖြင့် အတူနေထိုင်သွားရမယ်ဟု TNLA ၏ ဥက္ကဋ္ဌ ပြောဆိုချက်သည် အပြောသက်သက်မဟုတ်ဘဲ လက်တွေ့ဖြစ်ရန် လိုအပ်ကြောင်း၊ ၎င်းပြောဆိုချက်ကိုလည်း စောင့်ကြည့်ရန် လိုအပ်သေးဟု သျှမ်းမြောက်ဒေသခံတစ်ဦးက ပြောသည်။
လက်ရှိတွင် TNLA သည် စစ်အုပ်စု နှင့် အပစ်အခတ်ရပ်စဲထားပြီး သျှမ်းပြည်မြောက်ပိုင်းရှိ နမ့်ဆန်၊ မန်တုံ၊ နမ့်ခမ်း၊ နမ္မတူ၊ ကွတ်ခိုင်၊ မိုင်းလုံ နှင့် မိုင်းငေါ့မြို့များကို ထိန်းချုပ်ထားသည်။
Leave a Comments