သျှမ်းပြည်အရှေ့ပိုင်း မိုင်းယောင်းမြို့နယ်တွင် ယနေ့ (ဇန်နဝါရီလ ၁၁ ရက်) တွင် ရွေးကောက်ပွဲ အပိုင်း (၂) ကျင်းပရာ မဲရုံတွင် မဲသွားမထည့်လျှင် ငွေကောက်ခံခြင်း၊ အိမ်ထောင်စုစာရင်းထဲ ပယ်ထုတ်ခြင်း၊ ခရီးသွားလာ ခွင့်မပြုခြင်းတို့ ပြုလုပ်သွားမည်ဟု စစ်ကော်မရှင်လက်အောက်ခံ အုပ်ချုပ်ရေးမှူးများက ခြိမ်းခြောက်ထားကြောင်း ဒေသခံများက ပြောသည်။

မဲရုံတွင် မဲသွားမထည့်ပါက ဒဏ်ငွေအနေဖြင့် ထပ်မံကောက်ခံသွားမည်ဟုလည်း ပြီးခဲ့ရက်ပိုင်းက မိုင်းယောင်းမြို့နယ်ရှိ ရပ်/ကျေးအုပ်ချုပ်ရေးမှူးများက ပြောဆိုခဲ့ခြင်းဖြစ်ကြောင်း မိုင်းယောင်းမြို့ခံတစ်ဦးက သျှမ်းသံတော်ဆင့်ကို ပြောသည်။

“လူတိုင်းမဲသွားထည့်ရတယ်။ မဲထည့်ရင် ငွေကောက်မယ်၊ အိမ်ထောင်စုစာရင်းထဲ ပယ်ထုတ်မယ်၊ ခရီးသွားခွင့်မပြုဘူးလို့ နားမွန်းမိုင်ရွာက အုပ်ချုပ်ရေးမှူးက အမျိုးမျိုး ခြိမ်းခြောက်ထားတယ်။ ပြီးတော့ တစ်အိမ်ကို ၅,၀၀၀ ကျပ် မထည့်မနေရထည့်ရတယ်။ မဲမထည့်ရင်လည်း ဒဏ်ငွေအနေနဲ့ ထပ်ကောက်မှာတဲ့” ဟု မိုင်းယောင်းမြို့ခံတစ်ဦးက ပြောသည်။

ထို့အပြင် အဝေးရောက်နေသည့် ဒေသခံများကိုလည်း နေရပ်ပြန်လာခိုင်းပြီး ပြန်မလာပါက အိမ်ထောင်စာရင်းထဲ ပယ်ထုတ်မည်ဟု အုပ်ချုပ်ရေးမှူးက ခြိမ်းခြောက်ထားကြောင်း ၎င်းက ပြောသည်။

“အဝေးရောက်တဲ့သူကိုရော ပြန်လာခိုင်းတယ်။ ပြန်မလာရင် အိမ်ထောင်စုစာရင်းထဲ ပယ်ထုတ်မယ်လို့ ခြိမ်းခြောက်ထားတယ်။ လူတွေလည်း အလုပ်ရှုပ်တယ်၊ အားလုံးက မဲရလဒ်ကို သိနေပြီးသား။ စိတ်အနှောက်အယှက် ဖြစ်တယ်” ဟု အထက်ပါမြို့ခံတစ်ဦးက ထပ်လောင်းပြောသည်။

မိုင်းဖြတ်မြို့နယ်အတွင်း ရပ်ကွက် ၃ ရပ်ကွက်နှင့် ကျေးရွာအုပ်စု ၂၁ စုတွင် မဲရုံပေါင်း (၄၀) မှ မဲဆန္ဒရှင်ပြည်သူ (၂၁၇၃၆) ဦးရှိကြောင်း မြို့နယ်ရွေးကောက်ပွဲကော်မရှင်အဖွဲ့ခွဲမှ သိရသည်။