သျှမ်းပြည် ရပ်စောက်မြို့နယ်နှင့် ရွာငံမြို့နယ်တွင် စစ်ကော်မရှင်တပ်မှ စစ်အင်အား ဖြည့်တင်းထားပြီး မဲရုံပရဝုဏ်အနီး လက်နက်အပြည့်အစုံဖြင့် စောင့်ဆိုင်းနေခြင်းကြောင့် ဒေသခံများ လုံခြုံရေးစိုးရိမ်မှုဖြင့် မဲသွားပေးနေရကြောင်း စုံစမ်းသိရသည်။

ယနေ့ (ဇန်နဝါရီလ ၁၁ ရက်) တွင် စစ်ကော်မရှင် ကျင်းပနေသည့် ရွေးကောက်ပွဲ ဒုတိယပိုင်းတွင် သျှမ်းပြည်တောင်ပိုင်းမှ ရပ်စောက်၊ ရွာငံ၊ ဆီဆိုင်၊ ကလော၊ ကွန်ဟိန်၊ မိုင်းပန်၊ မောက်မယ်၊ မိုင်းကိုင်နှင့် လဲချားမြို့နယ်တို့ ပါဝင်သည်။

ယင်းမတိုင်မီ ရွာငံမြို့နယ်တွင် ဇန်နဝါရီလ (၇) ရက်မှ စတင်ပြီး ရွာငံမြို့နှင့် အနီးတစ်ဝိုက် ရွေးကောက်ပွဲကျင်းပမည့် ကျေးရွာများတွင် စစ်ကော်မရှင်တပ်နှင့် ၎င်း၏လက်အောက်ခံ ပအိုဝ်းပြည်သူ့စစ် (PNO) တို့က စစ်အင်အား ဖြည့်ထားပြီး မဲရုံပရဝုဏ်အနီး
လက်နက်အပြည့်အစုံဖြင့် စောင့်ဆိုင်းနေခြင်းကြောင့် ဒေသခံများမှာ စိုးရိမ်စိတ်ဖြင့် မဲသွားထည့်နေရကြောင်း ရွာငံဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“မဲသွားပေးရင် စောစောသွားဖို့ ပြောထားရတာ၊ ဗုံးတွေပေါက်မှာ စိုးရိမ်လို့။ ရွာမှာလည်း မဲရုံရှိတော့ စစ်သားတွေလည်း အပြည့်ပဲ၊ မဲရုံတစ်ရုံကို စစ်သား ၂၀ စီလောက် စောင့်နေတာ။ မဲပေးတဲ့လူတွေ များတယ်၊ ကြောက်လို့ သွားပေးတဲ့ လူတွေချည်းပဲ။ မဲစာရင်းကို ကိုယ့်နံပါတ်အလိုက် ၃ ခါ လက်မှတ်ထိုးရတယ်” ဟု ရွာငံဒေသခံ အဆိုပါ အမျိုးသမီးက ပြောသည်။

ရွာငံမြို့နယ် မဲဆန္ဒနယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ ပြည်သူ့ရှေ့ဆောင်ပါတီ (PPP)၊ တိုင်းရင်းသား စည်းလုံးညီညွတ်ရေးပါတီ (NUP) နှင့် ဓနုတိုင်းရင်းသားလူမျိုးများ ဒီမိုကရေစီပါတီ(DNDP)တို့ ဝင်ရောက်ယှဉ်ပြိုင်ပြီး ရပ်ကွက်နှင့် ကျေးရွာများတွင် စုစုပေါင်း မဲရုံ(၄၀)ရုံ ရှိကြောင်း သိရသည်။

အလားတူ ရပ်စောက်မြို့နယ်တွင်လည်း ရပ်စောက်နှင့် အင်တော မြို့ပေါ်ရပ်ကွက်များ၊ ကျေးရွာအုပ်စုများတွင် မဲရုံစုစုပေါင်း (၈၅) ရုံရှိပြီး ပြည်သူအများစုမှာ နောက်ဆက်တွဲ ပြဿနာများ စိုးရိမ်မှုကြောင့် မဲသွားပေးကြကြောင်း ရပ်စောက်ဒေသခံများက ပြောသည်။

“နောက်ဆက်တွဲကိစ္စ ကြောက်လို့ သွားကြတာပဲ။ စာရွက်လက်မှတ်ထိုးတဲ့ နေရာတောင် တော်တော်ပြည့်နေပြီ လက်မှတ်တွေ၊ မဲရုံနားလေး ဖုန်းပေးမယူဘူး။ ဈေးကတော့ မပိတ်ပေမယ့် ဈေးဝယ်ပါးတယ်၊ တချို့လည်း နေ့လယ်အလုပ်သွားချင်လို့ မနက်အစောကြီး သွားထည့်ကြတယ်” ဟု ရပ်စောက်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် ရပ်စောက်မြို့နယ်ရှိ မဲရုံအချို့တွင် စစ်ကော်မရှင်လက်အောက်ခံ အထွေထွေအုပ်ချုပ်ရေးဦးစီးဌာန ဝန်ထမ်းများမှ မဲလာပေးသူများကို ရေသန့်နှင့် မုန့်ပဲသရေစာများ ဝေငှခဲ့ကြောင်း စစ်တပ်ဝါဒဖြန့် တယ်လီဂရမ်ချန်နယ်များတွင် ပုံနှင့်တကွ ဝေမျှထားသည်။

မဲလာထည့်သည့် ပြည်သူများကို နိုင်ငံရေးပါတီများမှ တိုက်ရိုက်ဝေငှ စည်းရုံးခဲ့ခြင်း မဟုတ်သော်လည်း ရွေးကောက်ပွဲနေ့တွင် စစ်ကော်မရှင်ဘက်မှ တစ်ဘက်လှည့် သွယ်ဝိုက်သောနည်းဖြင့် မဲဆန္ဒရှင်များကို လာဘ်ပေးလာဘ်ယူပုံစံ ဖြားယောင်း သွေးဆောင်ခြင်းဖြစ်ကြောင်း ရွေးကောက်ပွဲ စောင့်ကြည့်လေ့လာသူများက သုံးသပ်ပြောဆိုသည်။

ရပ်စောက်မြို့နယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ ဓနုတိုင်းရင်းသားလူမျိုးများ ဒီမိုကရေစီပါတီ(DNDP) နှင့် ပအိုဝ်းအမျိုးသားအဖွဲ့ချုပ်ပါတီ (PNO) တို့ ဝင်ရောက်ယှဉ်ပြိုင်နေကြောင်း သိရသည်။