သျှမ်းပြည်တောင်ပိုင်း ရွာငံမြို့နယ်တွင် ကျေးရွာဘက်ရှိ မဲရုံများ၌ လုံခြုံရေးယူရန် စစ်ကော်မရှင်တပ်မှ စစ်အင်အား ဖြည့်ထားကြောင်း စုံစမ်းသိရသည်။
ပြီးခဲ့သည့် ဇန်နဝါရီလ ၇ ရက်မှ စတင်ပြီး ရွာငံမြို့နယ်နှင့် အနီးတစ်ဝိုက် ရွေးကောက်ပွဲကျင်းပမည့် ကျေးရွာများတွင် စစ်ကော်မရှင်တပ်နှင့် ၎င်း၏လက်အောက်ခံ ပအိုဝ်းပြည်သူ့စစ် (PNO) တို့က လုံခြုံရေး တင်းကြပ်နေပြီး စစ်အင်အားဖြည့်လာကြောင်း ရွာငံမြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“စစ်တပ်နဲ့ ပအိုဝ်းပြည်သူ့စစ်တွေက လုံခြုံရေး တင်းကြပ်ထားတယ်။ ရွာတွေဘက်ကိုလည်း အင်အားဖြည့်ထားတယ်။ ရွာငံမှာလည်း အင်အားဖြည့်တာရှိတယ်။ မဲပေးရမယ့် ရက်နီးလို့ သူတို့ အင်အားဖြည့်တာလားတော့ မသိဘူး”ဟု ရွာငံမြို့နယ် ဒေသခံအမျိုးသားတစ်ဦးက ပြောသည်။
ရွာငံမြို့နယ် နွားဘန်းကြီးကျေးရွာရှိ မဲရုံ လုံခြုံရေးအတွက် စစ်အင်အား ဖြည့်ထားသည့် စစ်ကော်မရှင်တပ်သားများသည် စာသင်ကျောင်းများတွင် နေထိုင်နေကြကြောင်း ရွာငံမြို့နယ် ဒေသခံအမျိုးသမီးတစ်ဦးက ထပ်မံလောင်းပြောသည်။
“မနက်ဖြန် ရွေးကောက်ပွဲအတွက် စစ်သားအယောက် ၂၀ ကျော်လောက်က ကျေးရွာတွေမှာ နေရာယူ စောင့်နေတာရှိတယ်။ စာသင်ကျောင်းမှာ ကျောင်းသားတွေကို ကျောင်းမလာဖို့ ဆရာမတွေကလည်း ပြောထားတယ်” ဟု ရွာငံမြို့နယ် ဒေသခံ အမျိုးသမီးတစ်ဦးက ပြောသည်။
ယနေ့ (ဇန်နဝါရီလ ၁၀ ရက်) တွင် ရွာငံမြို့နယ်ရှိ စစ်ကော်မရှင်တပ်သားနှင့် ဆယ်အိမ်မှူးတို့က ရွေးကောက်ပွဲတွင် မဲထည့်ရန် အိမ်တိုင်းသို့ လိုက်လံသတိပေး ပြောဆိုနေကြောင်း ၎င်းက ဆက်ပြောသည်။
ရွာငံမြို့နယ် မဲဆန္ဒနယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ ပြည်သူ့ရှေ့ဆောင်ပါတီ (PPP)၊ တိုင်းရင်းသား စည်းလုံးညီညွတ်ရေးပါတီ (NUP) နှင့် ဓနုတိုင်းရင်းသားလူမျိုးများ ဒီမိုကရေစီပါတီ(DNDP)တို့ ဝင်ရောက်ယှဉ်ပြိုင်ပြီး ရပ်ကွက်နှင့် ကျေးရွာများတွင် စုစုပေါင်း မဲရုံ(၄၀)ရုံ ရှိကြောင်း သိရသည်။
Leave a Comments