မိုင်းရယ်မြို့နယ်အတွင်း ရွေးကောက်ပွဲကျင်းပရန် ရက်ပိုင်းအလို စစ်ကော်မရှင်တပ်က လေကြောင်း ဗုံးကြဲတိုက်ခိုက်ခဲ့ကြောင်း သတင်းရရှိသည်။
လာမည့် ဇန်နဝါရီလ (၁၁) ရက်တွင် ပြုလုပ်ကျင်းပမည့် စစ်ကော်မရှင်ဦးဆောင်သော ရွေးကောက်ပွဲ ဒုတိယပိုင်းတွင် သျှမ်းပြည် မြောက်ပိုင်း မိုင်းရယ်မြို့နယ်လည်း ပါဝင်သည်။
ယနေ့ (ဇန်နဝါရီလ ၉ ရက်) မနက် ၁၁ နာရီဝန်းကျင်တွင် မိုင်းရယ်မြို့နယ် ရှန်တော်ကျေးရွာ အနီးရှိ ကျားဖြန့်ရုံဟောင်းဟု ထင်ရသည့် နေရာကို စစ်ကော်မရှင်တပ်ဖွဲ့ က ဂျက်ဖိုက်တာ လေယာဉ်နှစ်စီးဖြင့် ဗုံးကြဲတိုက်ခိုက်ခဲ့ကြောင်း စစ်ရေးသတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။
“ဒီမနက်လောက်က လေယာဉ် နှစ်စီးနဲ့ လာကြဲသွားတာ။ နေရာကတော့ တောထဲလောက်ပဲ။ ကျားဖြန့်ရုံဟောင်း လို့တော့ သိထားရတယ်။ ထိခိုက်ဒဏ်ရာရတဲ့ လူတွေ ရှိ မရှိတော့ သေချာ မသိရသေးဘူး။ ဘာကြောင့် ကြဲလဲဆိုတော့ မသိရဘူး။”ဟု ၎င်းကပြောသည်။
လေကြောင်းဗုံးကြဲတိုက်ခိုက်မှုကြောင့် ထိခိုက်ဒဏ်ရာရှိသူ နှင့် သေဆုံးမှုကို သျှမ်းသံတော်ဆင့်မှ ဆက်လက်စုံစမ်းနေသည်။
အဆိုပါ စစ်ကော်မရှင်တပ် ဗုံးကြဲခဲ့သည့်နေရာသည် မိုင်းရယ်မြို့ မှ ၃ နာရီခန့်သာ ကားဖြင့်မောင်းနှင် ရောက်ရှိသည့် နေရာဖြစ်သည်။
ရှန်တော်ရွာသည် မိုင်းရယ်မြို့နယ် နှင့် သီပေါမြို့နယ်ကြားဖြစ်ပြီး စစ်ကော်မရှင်တပ် ၊ ရှမ်းပြည် တိုးတက်ရေးပါတီ/ ရှမ်းပြည်တပ်မတော်(SSPP/SSA) ၊ ကိုးကန့်တပ်ဖွဲ့ (MNDAA) တို့ သွားလာလှုပ်ရှားသည့် နယ်မြေဖြစ်ကြောင်း သိရသည်။
Leave a Comments