သျှမ်းပြည် ဖယ်ခုံနှင့် ပင်လောင်း နယ်စပ်တကြောတွင် စစ်ကော်မရှင်တပ်နှင့် ကရင်နီတော်လှန်ရေး တပ်ပေါင်းစုတို့ ၄ လကျော်ကြာ ထိတွေ့တိုက်ပွဲများ ဖြစ်ပွားနေကြောင်း သိရသည်။
ဖယ်ခုံနှင့် ပင်လောင်း နယ်စပ်တကြောရှိ တောင်စလုံးနှင့် မြောက်စလုံးကျေးရွာကြားတွင် စစ်ကော်မရှင်တပ်ဘက်မှ ပြီးခဲ့သည့် ၂၀၂၅ အောက်တိုဘာလတွင် နေရာယူ တပ်စွဲထားပြီး ကျေးရွာအနီးအနားသို့ နေ့စဉ်နီးပါး လက်နက်ကြီးဖြင့် ပစ်ခတ်မှုရှိနေကြောင်း ဒေသခံများက ပြောသည်။
ယမန်နေ့ (ဇန်နဝါရီလ ၄ ရက်) ညနေ ၅ နာရီခွဲ ဝန်းကျင်တွင် မြောက်စလုံးကျေးရွာ အနီးတဝိုက်ကို စစ်ကော်မရှင်တပ်ဘက်မှ လက်နက်ကြီးများဖြင့် ရမ်းသမ်းပစ်ခတ်ခဲ့သည့်အပြင် နေအိမ်အချို့ကိုပါ ထပ်မံမီးရှို့ ဖျက်စီးမှုများ ပြုလုပ်ခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
“မနေ့က မနက်ပိုင်းမှာတော့ သေနတ်တွေနဲ့ ပစ်တယ်။ မြောက်စလုံးရွာနားက နေအိမ် အနည်းစုကိုတော့ ညနေ ၃ နာရီ ဝန်းကျင်လောက်က မီးထပ်ရှို့တယ်။ ပြီးတော့ လက်နက်ကြီးတွေနဲ့ ရမ်းပစ်နေတာမျိုးတွေ လုပ်နေတယ်။ ရွေးကောက်ပွဲပြီးပြီဆိုတော့ သူတို့ဘက်က ပြန်ပြီး ထိုးစစ်ဆင်ဖို့ ရှိမလားတော့ မသိသေးဘူး”ဟု စစ်ရေးသတင်းရင်းမြစ်တစ်ဦးက ပြောသည်။
စစ်ကော်မရှင်တပ်ဘက်မှ နေ့စဉ်နီးပါး လက်နက်ကြီးများဖြင့် ပစ်ခတ်မှု ရှိနေသည့်အပြင် ဒရုန်းများကိုပါ အသုံးပြု ဗုံးကြဲမှုများ ပြုလုပ်ကြောင်း ရှေ့တန်းရောက် ရဲဘော်တစ်ဦးက ပြောသည်။
လက်ရှိ ဖယ်ခုံနှင့် ပင်လောင်း နယ်စပ်တကြောရှိ တောင်စလုံးကျေးရွာ၊ မြောက်စလုံးကျေးရွာနှင့် ဘောရန်းရွာနေ ဒေသခံများသည် ကရင်နီနယ်စပ်တကြောရှိ ဘေးလွတ်ရာ ကျေးရွာနှင့် တောတောင်အတွင်း ရွာလုံးကျွတ် ထွက်ပြေးတိမ်းရှောင် နေကြကြောင်း သိရသည်။
ပြီးခဲ့သည့် ၂၀၂၅ စက်တင်ဘာလ ဒုတိယပတ်မှစပြီး စစ်ကော်မရှင်တပ်နှင့် ပအိုဝ်းပြည်သူ့စစ် PNO တို့ စစ်ကြောင်းထိုးလာခြင်းကြောင့် ဖယ်ခုံ- ပင်လောင်း နယ်စပ်တကြောရှိ ကျေးရွာ (၁၀) ရွာကျော်မှ လူဦးရေ (၆၀၀၀) ဝန်းကျင်သည် နီးစပ်ရာ တောတောင်နှင့် ကျေးရွာများထံ စစ်ဘေးတိမ်းရှောင် ခဲ့ရသည်။
ပြီးခဲ့သည့် အောက်တိုဘာလ (၁၃) ရက်တွင်လည်း ဖယ်ခုံမြို့နယ် ဘောရန်ကျေးရွာကို စစ်ကော်မရှင်တပ်နှင့် ပအိုဝ်းပြည်သူ့စစ် (PNO) တို့ စစ်ကြောင်းထိုးဝင်ရောက်ပြီး နေအိမ်များကို မီးရှို့ဖျက်စီးခဲ့သည်။
အလားတူ ယမန်နှစ် ၂၀၂၅ ဒီဇင်ဘာလတွင် ဖယ်ခုံမြို့နယ် တောင်စလုံးကျေးရွာရှိ နေအိမ်များကို စစ်ကော်မရှင်တပ်ဘက်မှ ၂ ကြိမ် မီးရှို့ဖျက်ဆီးမှုများ ပြုလုပ်ခဲ့ကြောင်း သိရသည်။
Leave a Comments