သျှမ်းပြည် နောင်ချိုမြို့၊ လားရှိုးမြို့နှင့် မူဆယ်မြို့များတွင် စစ်ရေးပဋိပက္ခကြား လုံခြုံရေး စိုးရိမ်မှုကြောင့် ဆန္ဒမဲပေးသူ နည်းပါးကြောင်း ဒေသခံပြောပြချက်အရ သိရသည်။
ယနေ့ (ဒီဇင်ဘာလ ၂၈ ရက်) တွင် စတင်ကျင်းပနေသည့် စစ်ကော်မရှင် ရွေးကောက်ပွဲ ပထမပိုင်းတွင် သျှမ်းပြည်မြောက်ပိုင်းမှ နောင်ချိုမြို့၊ လားရှိုးမြို့နှင့် မူဆယ်မြို့ (၃) မြို့နယ်သာ ပါဝင်ပြီး မြို့ပေါ်ရပ်ကွက်များ၌သာ ပြုလုပ်နိုင်သည်။
သို့သော် စစ်ရေးပဋိပက္ခများကြား လုံခြုံရေး စိုးရိမ်မှုကြောင့် မဲရုံများတွင် ဆန္ဒမဲပေးရန် ပြည်သူသွားရောက်မှု နည်းပါးကြောင်း နောင်ချိုဒေသခံတစ်ဦးက သျှမ်းသံတော်ဆင့်ကို ပြောသည်။
“နောင်ချိုမှာတော့ မြို့ပေါ်ရပ်ကွက် (၆) ခု ရှိတဲ့အထဲ ရပ်ကွက် (၄) ခုမှာပဲ စုပြီး မဲရုံလုပ်ထားတယ်။ ရွာဘက်မှာတော့ မဲရုံသိပ်မရှိဘူး နည်းတယ်၊ ဘန့်ဘွေးအုပ်စု နောင်တောအုပ်စုဘက်တော့ ရှိတယ်။ ယာပြင်မှာ မဲရုံစောင့်က မဲလာပေးတဲ့လူထက်တောင် များနေတယ်။ အများစုကတော့ လုံခြုံရေးစိုးရိမ်လို့ မသွားတာ၊ အရင်နေ့လိုပဲ တောင်ယာသွားကြတယ်” ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇူလိုင်လလယ်ပိုင်းတွင် TNLA ထံမှ စစ်ကော်မရှင် ပြန်လည်ထိန်းချုပ်ခဲ့သည့် နောင်ချိုမြို့နယ်တွင် မြို့ပေါ်ရပ်ကွက် (၄) ခုနှင့် ကျေးရွာအုပ်စု (၂၁) အုပ်စုတွင် မဲရုံ (၅၆) ရုံ ဖွင့်လှစ်ထားကြောင်း သိရပြီး ယနေ့ နံနက်ပိုင်းတွင် ပုံမှန်ထက် လူအသွားအလာ နည်းပါးနေကြောင်း ဒေသခံများက ပြောသည်။
အလားတူ မူဆယ်မြို့နှင့် လားရှိုးမြို့တို့တွင် မြို့ပေါ်ရပ်ကွက်များ၌သာ ကွက်၍ မဲပေးခွင့်ရသော်လည်း မဲရုံအနီးတဝိုက် လမ်းကြားများတွင် စစ်ကော်မရှင်လက်အောက်ခံ စစ်သားနှင့် ရဲများမှ လက်နက်အပြည့်အစုံဖြင့် ကင်းစောင့်နေကြောင်း ဒေသခံများထံမှ သိရသည်။
“စစ်ဝတ်စုံကော၊ ရဲကော သေနတ်ကိုင်ပြီး မဲရုံသွားမယ့် လမ်းကြိုလမ်းကြားတွေမှာ အထပ်ထပ် စောင့်နေတာ။ မဲရုံနားမှာ ရှိတဲ့ ကုန်စုံဆိုင်တွေ၊ ခေါက်ဆွဲဆိုင်တွေလည်း အကုန်ပိတ်ထားခိုင်းတယ် ဒီနေ့ ဆိုင်မဖွင့်ခိုင်းဘူး။ မဲသွားပေးမယ့်လူတွေလည်း မဲရုံထဲ ဖုန်းယူသွားလို့ မရဘူး” ဟု မူဆယ်မြို့ဒေသခံ အမျိုးသားတစ်ဦးက ပြောသည်။
မူဆယ်မြို့ပေါ် ရပ်ကွက် (၉) ခုတွင် မဲရုံပေါင်း (၁၈) ရုံသာ ဖွင့်လှစ်နိုင်ပြီး မူဆယ်မြို့နယ်အတွင်းရှိ မန့်ဟျှိုး(မန့်ဟီးရိုး)မြို့၊ ကိုးကန့်တပ်ဖွဲ့ MNDAA ထိန်းချုပ် ပန်ဆိုင်း(ကြူကုတ်)မြို့နှင့် မုန်းကိုးမြို့မှ ရပ်ကွက် ၁၅ ခု၊ ကျေးရွာအုပ်စု ၆၂ အုပ်စုတို့တွင် ရွေးကောက်ပွဲ မကျင်းပနိုင်ပေ။
လားရှိုးမြို့နယ်တွင်လည်း မြို့ပေါ်ရပ်ကွက် (၁၂) ခုနှင့် ကျေးရွာအုပ်စု (၁၁) ခုတွင် မဲရုံ (၆၆) ရုံ ဖွင့်လှစ်ထားပြီး မဲပေးပိုင်ခွင့်ရှိသူ တစ်သိန်းကျော် ရှိကြောင်း စစ်ကော်မရှင်လက်အောက်ခံ ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ သတင်းထုတ်ပြန်ထားသည်။
ရွေးကောက်ပွဲ ပထမပိုင်း ရက်သတ္တပတ်အလို ဒီဇင်ဘာလ (၂၁) ရက်၌ လားရှိုးမြို့ပေါ် (၃) နေရာတွင် ပေါက်ကွဲမှု ဖြစ်ပွားပြီးနောက် မြို့တွင်း စစ်ဆေးရေးဂိတ်များ စစ်ဆေးမှု တင်းကြပ်ပြီး ယမန်နေ့တွင်လည်း စစ်ကော်မရှင်ဘက်မှ စစ်ကားများဖြင့် ကင်းလှည့်ခဲ့ကြောင်း ဒေသခံများထံမှ သိရသည်။
Leave a Comments