သျှမ်းပြည်တောင်ပိုင်း၊ ပင်းတယမြို့တွင် စစ်တပ်လက်အောက်ခံ အုပ်ချုပ်ရေးမှူးတို့က တက္ကသိုလ်ကျောင်းသားများ မဲမထည့်လျှင် စစ်မှုထမ်းရမည်ဟု ခြိမ်းခြောက်ပြီး ကြိုတင်မဲ ထည့်ခိုင်းနေကြောင်း သတင်းရရှိသည်။
ယမန်နေ့ (ဒီဇင်ဘာလ ၂၆) ရက်တွင် တက္ကသိုလ်ကျောင်းတက်နေသူများ၊ မသန်စွမ်းများ၊ ကျန်းမာရေးမကောင်းသူများ နှင့် သက်ကြီးရွယ်အိုများကို စစ်တပ်လက်အောက်ခံ အုပ်ချုပ်ရေးမှူး နှင့် ဌာနဆိုင်ရာများက မဖြစ်မနေမဲထည့်ကြရန် သွယ်ဝိုက်နည်းဖြင့် ဖိအားပေးနေကြောင်း သိရသည်။
“မနေ့ကနဲ့ ဒီနေ့ ကြိုတင်မဲထည့်ရတယ်။ တိုက်ရိုက်ဖိအားပေးတာမျိုး မရှိပေမဲ့ မဲစာရင်းကြည့်ပြီးရင် ရပ်ကွက်ရုံးမှာ လက်မှတ်ထိုးခိုင်းတယ်၊ ကျောင်းသားတွေဆိုရင်လည်း မဲမထည့်ရင် စစ်မှုထမ်းရမယ်လို့ ပြောတော့ ကြောက်ကြောက်နဲ့ ကြိုတင်မဲထည့်ရတယ်၊ သူတို့က သွယ်ဝိုက်တဲ့ နည်းနဲ့ ဖိအားပေးတော့ မထည့်ချင်လည်း နောက်ဆက်တွဲတွေ ရှိလာနိုင်လို့ သွားထည့်ကြတယ်။”ဟု ပင်းတယမြို့ ဒေသခံ အမျိုးသားတစ်ဦးက ပြောသည်။
ထို့ပြင် ပင်းတယမြို့တွင် ကြံ့ခိုင်ရေးပါတီ (USDP)၊ ပြည့်သူ့ရှေ့ဆောင် ပါတီ နှင့် ဓနုတိုင်းရင်းသားလူမျိုးများ ဒီမိုကရေစီပါတီ (DNDP) တို့ရှိပြီး မဲဆွယ်စည်းရုံးမှုများကို လက်ကမ်းစာစောင်များ ဝေခြင်း၊ ဆိုင်းဘုတ်ထောင်ခြင်းများဖြင့် စည်းရုံးမှုရှိကြောင်း ၎င်းက ဆက်ပြောသည်။
ဆက်လက်ပြီး ပင်းတယမြို့နယ်တွင် ရွေးကောက်ပွဲနှင့်ပတ်သက်ပြီး စိတ်ဝင်စားသူနည်းပါးပြီး မဲမပေးလျှင် အာဏာပိုင် အဖွဲ့စည်းများက အန္တရာယ်ပြုလာမည် စိုးရိမ်သောကြောင့် မဲထည့်ကြရမည် ဖြစ်ကြောင်း သိရသည်။
“မဲဘယ်လို ပေးရမလဲဆိုတောင် မသိကြဘူး။ ဘယ်သူတွေဝင်ပြိုင်ကြမှန်းလည်း မသိကြဘူး။ မဲစာရင်းကလည်း ရပ်ကွက်ရုံးက ခေါ်လို့ သွားကြည့်တာ ဒေသခံတွေတော့ စိတ်မဝင်စားကြဘူး။ တချို့ကြတော့လည်း ရွေးကောက်ပွဲပြီးရင် အပြောင်းလဲ ဖြစ်လာနိုင်မလား မျှော်လင့်နေတဲ့သူ ရှိတယ်။ မဲမပေးရင် အန္တရာယ်ပြုခံရမှာကို ကြောက်ကြတယ်။”ဟု ပင်းတယ မြို့ခံ အသက် ၃၀ ကျော်အမျိုးသားတစ်ဦးက ပြောသည်။
ကြိုတင်မဲ ထည့်မည့်သူများနှင့် လာမည့် ဒီဇင်ဘာလ ၂၈ ရက်နေ့တွင် မဲထည့်မည့် သူများကို မှတ်ပုံတင်ယူလာခိုင်း၍ စာသင်ကျောင်းများတွင် မဲသွားထည့်ရမည် ဖြစ်ပြီး ပညာရေးဝန်ထမ်းများက မဲရုံစောင့်ရမည်ဟု အဆိုပါ အမျိုးသားက ထပ်လောင်းပြောသည်။
စစ်ကော်မရှင်ပြုလုပ်မည့် ရွေးကောက်ပွဲပြီးလျှင် မည်သည့် အပြောင်းလဲကိုမျှ မမျှော်လင့်ထားကြောင်းနှင့် စစ်ကော်မရှင်တပ်မှ အလိုအလျောက် မဲနိုင်နေပြီဖြစ်၍ ဒေသတွင်း လောင်းကစားများ၊ ခိုးဆိုးလုယက်မှုများအပြင် ဒုစရိုက်မှုများလာနိုင်ကြောင်း ဒေသခံများက ၎င်းတို့၏ ထင်မြင်ချက်ကို ပြောသည်။
ယခုလက်ရှိ ပင်းတယမြို့နယ်တွင် မဲရုံ ၄၉ ရုံ၊ ရပ်ကွက် ၁၃ ရပ်ကွက်၊ ကျေးရွာအုပ်စု ၂၇ အုပ်စု၊ တို့ရှိပြီး မဲစာရင်းအရ ၆၅၅၃၅ ဦးရေရှိ၍ ကြိုတင်မဲပေးသူ ၁၁၀၀ ဦးရေရှိကြောင်း ပင်းတယမြို့နယ် အုပ်ချုပ်ရေးမှူး ရုံးထံမှသိရသည်။
မနက်ဖန် ဒီဇင်ဘာလ (၂၈)ရက်တွင် စစ်ကော်မရှင်က ဦးဆောင်ကျင်းပမည့် ရွေးကောက်ပွဲ ပထမသုတ်တွင် သျှမ်းပြည်နယ်မှ တောင်ကြီး၊ ပင်းတယမြို့နယ်၊ ဟိုပုံးမြို့နယ်၊ နောင်ချိုမြို့နယ်၊ ကျိုင်းတုံမြို့နယ်၊ တာချီလိတ်မြို့၊ နမ့်စန်မြို့နယ်၊ မူဆယ်မြို့၊ မိုင်းဆတ်၊ လားရှိုး၊ လင်းခေး စသည့် (၁၂)မြို့နယ်တွင် ကျင်းပသွားမည်ဖြစ်သည်။
Leave a Comments