မန္တလေး-မိုးကုတ် လမ်းပိုင်းရှိ စစ်ကော်မရှင် စစ်ဆေးရေဂိတ်များတွင် စစ်ဆေးတင်းကြပ်ပြီး ခရီးသွားများထံ ငွေညှစ်တောင်းခံနေကြောင်း စုံစမ်းသိရသည်။

ပြီးခဲ့သည့် နိုဝင်ဘာ လဆန်းပိုင်းမှ စတင်ပြီး မန္တလေး- မိုးကုတ် လမ်းပိုင်းရှိ ပြင်ဦးလွင်မြို့နယ် ဝက်ဝံကျေးရွာအနီး စစ်ကော်မရှင် စစ်ဆေးရေးဂိတ်နှင့် မန္တလေးမြို့အဝင် (၁၆) မိုင်ဂိတ်တို့တွင် စစ်ဆေးမှုများ တင်းကြပ်နေကြောင်း မန္တလေး-မိုးကုတ် ခရီးစဉ် ပြေးဆွဲနေသည့် ကားသမားတစ်ဦးက သျှမ်းသံတော်ဆင့်ကို ပြောသည်။

“ခရီးသည်တွေရဲ့ မှတ်ပုံတင်ကို လူမျိုးကြည့်ပြီး တောင်းတာ။ ၅ ထောင်ကျပ်ကနေ ၃ သောင်းအထိ တောင်းတယ်၊ ဝက်ဝံဂိတ်နဲ့ (၁၆) မိုင်ဂိတ်မှာ တောင်းတာ။ ကားသမားတွေကတော့ ဂိတ်တိုင်းကို ပေးရတယ်။ ကားမှာ ပါလာတဲ့ ပစ္စည်းတွေက ဆေး၊ တားမြစ်ထားတဲ့ စားသောက်ကုန်၊ ဆိုလာပြား အဲ့တာတွေကိုလည်း ပေးမတင်ဘူး”ဟု မိုးကုတ်မြို့နယ်မှ ကားသမားတစ်ဦးက ပြောသည်။

ဒီဇင်ဘာလဆန်းပိုင်းတွင် TNLA တပ်ဆုတ်ခွာပြီး စစ်ကော်မရှင် ပြန်လည်ထိန်းချုပ်ထားသည့် မိုးကုတ်မြို့မှ မန္တလေးမြို့ကြား လမ်းခရီးတလျှောက် စစ်ဆေးရေးဂိတ်ပေါင်း ၁၀ ဂိတ် ဝန်းကျင်ရှိပြီး ခရီးတစ်ခေါက်သွားလျှင် လမ်းတလျှောက်ပေးရသည့် ဂိတ်ကြေးမှာ (၈) သောင်းဝန်းကျင်အထိ ကုန်ကျကြောင်း ၎င်းကားသမားက ဆက်ပြောသည်။

“ကားတိုင်းကို ဘယ်သွားမလဲ မေးတယ်၊ မိုးမိတ် မိုးကုတ်လို့ ဖြေမိလိုက်တာနဲ့ တစ်စီးလုံး စစ်တာပဲ။ တစ်လမ်းလုံး ဂိတ်က ၁၀ ဂိတ်လောက်ရှိတယ် တစ်ဂိတ်ကို အနည်းဆုံး ၅ ထောင်လောက် ပေးရတော့ တစ်ခါသွားရင် ဂိတ်ကြေး ပေးရတာက ၈ သောင်းလောက်ထိ ရှိတယ်”ဟု မိုးကုတ်မြို့နယ်မှာ အဆိုပါကားသမားက ထပ်လောင်းပြောသည်။

လက်ရှိတွင် မိုးကုတ်မြို့မှ မန္တလေးမြို့အထိ တစ်ဦးလျှင် ကားခ ကျပ် (၃) သိန်းကျော် ပေးရပြီး ယခင်က တစ်ဦးလျှင် ကျပ် (၁) သိန်းခွဲဝန်းကျင်သာ ရှိခြင်းကြောင့် ကားခ နှစ်ဆ တက်သွားကြောင်း မိုးကုတ်မြို့နယ် ကားသမားတစ်ဦးက ဆက်ပြောသည်။

“အရင်တုန်းက ကားခ အဲ့လောက်ဈေးမကြီးဘူး၊ စစ်ကော်မရှင်တွေ မြို့ထဲမဝင်ခင် တစ်လ အလိုလောက်ကတည်းက ဈေးတဖြေးဖြေး တက်ပြီး အခုထိ ပြန်မကျသေးတာ။ ခုက တစ်ယောက်ကို ၃ သိန်း၊ ၃ သိန်းခွဲထိ ပေးရတယ်။ အဲ့ကြောင့် တချို့ မန္တလေးကို ရောက်နေတဲ့ လူတွေကလည်း ပြန်ဖို့ အခက်အခဲဖြစ်နေတာ၊ ကားခ ဈေးပြန်မကျသေးလို့”ဟု ၎င်းကားသမားက ပြောသည်။

ထို့အပြင် ခရီးသွားများ၏ နိုင်ငံသားမှတ်ပုံတင်တွင် ၁၃ မျဉ်းစောင်း၊ တအာင်း(ပလောင်) လူမျိုးဖြစ်နေလျှင် စစ်ကော်မရှင် စစ်ဆေးရေးဂိတ်များတွင် ငွေ (၃) သောင်းမှ (၃) သိန်းအထိ ငွေညှစ်တောင်းခံပြီး စစ်ဆေးမှု တင်းကြပ်နေကြောင်း သိရသည်။

သျှမ်းပြည်မြောက်ပိုင်းနှင့် မန္တလေးနယ်စပ်ရှိ မိုးကုတ်မြို့မှ TNLA တပ်ဆုတ်ခွာပြီးနောက် စစ်ကော်မရှင်တပ်ဖွဲ့က ပြီးခဲ့သည့် နိုဝင်ဘာလ နောက်ဆုံးပတ်တွင် ပြန်လည် ဝင်ရောက် ထိန်းချုပ်ခဲ့သည်။

မိုးကုတ်မြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA အပြင် ကချင်လွတ်လပ်ရေးတပ် (KIA) ၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) နှင့် ပြည်သူ့ကာကွယ်ရေးတပ်ဖွဲ့ PDF များလည်း သွားလာလှုပ်ရှားနေသည်။