သျှမ်းပြည် နမ့်ခမ်းမြို့တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထံ အခွန်မဆောင်သည့် ဈေးဆိုင်ခန်းများကို ပိတ်သိမ်းပြီး လေလံတင်ရောင်းချမည်ဟု ခြိမ်းခြောက်ခံနေရကြောင်း စုံစမ်းသိရသည်။

ပြီးခဲ့သည့် စက်တင်ဘာလမှ စတင်ပြီး TNLA ထိန်းချုပ်ထားသည့် နမ့်ခမ်းမြို့ပေါ်တွင် ကုန်စုံဆိုင်၊ ခေါက်ဆွဲဆိုင်၊ လက်ဖက်ရည်ဆိုင်၊ အထည်ဆိုင်၊ လျှပ်စစ်ပစ္စည်း အရောင်းဆိုင် စသည့် လုပ်ငန်းအမျိုးမျိုးကို တစ်ဆိုင်လျှင် ကျပ်ငါးသိန်းမှ သိန်း ၅၀ အထိ TNLA လက်အောက်ခံ အခွန်ဌာနမှ ၂၀၂၆ ခုနှစ်အတွက် တစ်နှစ်စာ အခွန်ကြိုတင် ကောက်ခံခဲ့ကြောင်း ဒေသခံများက ပြောသည်။

၎င်းနောက်တွင် TNLA ထံ အခွန်မပေးဆောင်နိုင်သည့် ဈေးသည်များ လအတန်ကြာ ဆိုင်ခန်းပိတ်သိမ်းထားခဲ့ရာ ဒီဇင်ဘာလလယ်ခန့်မှ စတင်၍ နမ့်ခမ်းမြို့မစျးနှင့် အနီးအနား တိုက်ခန်းများရှိ ဈေးပြန်မရောင်းသည့် ဆိုင်ခန်းများကို သိမ်းယူပြီး အခြားသူထံ လေလံတင်ရောင်းချမည်ဟု TNLA လက်အောက်ခံ တာဝန်ရှိသူများက ခြိမ်းခြောက်ပြောဆိုခဲ့ကြောင်း ဈေးသည်တစ်ဦးက သျှမ်းသံတော်ဆင့်ကို ပြောသည်။

“ဈေးထဲနဲ့ တိုက်တန်းမှာ ရောင်းတဲ့လူတွေ ဆိုင်လာမဖွင့်ရင် TNLA ဘက်က သိမ်းပြီးတော့မှ တခြားလူကို လေလံတင်ရောင်းမယ်လို့ ခြိမ်းခြောက်နေတယ်။ တချို့လည်း ဆိုင်တော့ဖွင့်ပေမယ့် သူတို့ TNLA ဆီမှာ အခွန်သွားမဆောင်ရင် အဲ့တာလည်း သိမ်းပြီး လေလံတင်မယ်ပြောလို့ ဈေးသည်တွေ ဒုက္ခရောက်နေတယ်။ အများစုက အခွန်ကောက်တာများလို့ ဆိုင်မဖွင့်ဘဲ နားထားကြတာ” ဟု နမ့်ခမ်းမြို့မဈေးမှ ဈေးသည်တစ်ဦးက ပြောသည်။

နမ့်ခမ်းမြို့ပေါ်တွင် TNLA ထံ အခွန်မပေးဆောင်နိုင်သည့် ဈေးဆိုင်ခန်းများကို သိမ်းယူပြီး လေလံတင်ရောင်းချမည်ဟု ခြိမ်းခြောက်ခဲ့ခြင်းနှင့် ပတ်သက်၍ TNLA ပြောရေးဆိုခွင့်ရှိသူ လွေးယေဦး ထံ မေးမြန်းရန် သျှမ်းသံတော်ဆင့်မှ ဆက်သွယ်ခဲ့သော်လည်း ယခင်ဖြေကြားသည့် ဖုန်းနံပါတ်မှာ တပ်ဆင်ထားခြင်း မရှိပါ။

အလားတူ နမ့်ခမ်းမြို့နှင့် မူဆယ်မြို့အကြား စယ်လန့်ကျေးရွာအနီးရှိ TNLA စစ်ဆေးရေးဂိတ်တွင် စစ်ဆေးမှု တင်းကြပ်နေပြီး ဂိတ်ပိတ်ချိန်ထက် နောက်ကျမှ ရောက်သည့် ကားနှင့် ဆိုင်ကယ်များ ဖြတ်သန်းခွင့်ရရန် ငွေပေးဆောင်ရကြောင်း ဒေသခံများက ပြောသည်။

“ဗမာစစ်တပ်နဲ့ ပလောင်တပ်နဲ့ ဆိုင်ထားတဲ့ စယ်လန့်အဝင် ဆိုင်းခေါင်ဘက်မှာ ဂိတ်တွေ ပိတ်တာ စောတယ်။ ည ၆ နာရီပိတ်တယ်၊ မနက် ၇ နာရီမှ ဖွင့်တယ်။ နောက်ကျမှ ရောက်သွားလို့ ဖြတ်ချင်ရင် ကားတစ်စီးကို ၂ သောင်း၊ ဆိုင်ကယ်တစ်စီးကို ၁ သောင်း အဲ့လိုကောက်တယ်။ သွားလာရတာခက်လို့ ရှာဖွေစားသောက်ရတာ မလွယ်ဘူး၊ ပြည်သူတွေလည်း ဂိတ်စောပိတ်လို့ ငြီးနေကြတယ်” ဟု နမ့်ခမ်းဒေသခံ ၎င်းအမျိုးသားက ထပ်လောင်းပြောသည်။

လက်ရှိ နမ့်ခမ်းမြို့ပေါ်တွင် TNLA လက်အောက်ခံ လူဝင်မှုကြီးကြပ်ရေးဌာနမှ ရပ်ကွက်အလိုက် မှတ်ပုံတင်နှင့် အိမ်ထောင်စုစာရင်းများ အလှည့်ကျ လိုက်လံပြုလုပ်ပေးနေပြီး TNLA ပြုလုပ်ပေးသည့် မှတ်ပုံတင် မရှိဘဲ မူဆယ်မြို့ဘက် သွားရောက်လိုပါက ဂိတ်ဖြတ်သန်းခွင့် မပြု ဟု ခြိမ်းခြောက်ပြောဆိုမှုများကြောင့် ဒေသခံများ မဖြစ်မနေ လုပ်ဆောင်နေရကြောင်း သိရသည်။