သျှမ်းပြည်မြောက်ပိုင်း မူဆယ်မြို့တွင် မြို့ခံပြည်သူများအနေဖြင့် စစ်အုပ်စုက ဦးဆောင်ကျင်းပမည့် ရွေးကောက်ပွဲတွင် မဲမထည့်ပါက စာအုပ် (အနီ) မလုပ်ပေးဟု ခြိမ်း‌ခြောက်ခံနေရကြောင်း ဒေသခံများ၏ ပြောကြားချက်အရ သိရသည်။

ပြီးခဲ့သည့် ဒီဇင်ဘာလလယ်မှ စ၍ မူဆယ်မြို့‌ပေါ်ရှိ စစ်ကော်မရှင် လက်အောက်ခံ ရပ်ကွက်/ကျေးရွာ ရွေးကောက်ပွဲကော်မရှင် အဖွဲ့ခွဲများ၊ အုပ်ချုပ်ရေးမှူးများနှင့် ရဲတပ်ဖွဲ့ဝင်များက တစ်အိမ်ဝင် တစ်အိမ်ထွက်၍ မဲပေးခွင့်ရှိသူစာရင်းများကို ကောက်ခံထားပြီး ဖြစ်ကြောင်း လိုက်လံပြောဆိုခဲ့သည်ဟု မူဆယ်ဒေသခံများထံမှ သိရသည်။

ရွေးကောက်ပွဲ ကျင်းပမည့်ရက်တွင် ဆန္ဒမဲမထည့်လျှင် ၎င်းတို့၏ စာရင်းရှိထားသည့်အတွက် ပက်စ်ပို့စာအုပ် Passport သို့မဟုတ် ယာယီ နယ်စပ်ဖြတ်သန်းခွင့်လက်မှတ် စာအုပ်အနီတို့ သက်တမ်းကုန်ခြင်း၊ ပျောက်ဆုံးခြင်း ဖြစ်ပေါ်လာပါက အသစ်လုပ်မပေးတော့ကြောင်း ခြိမ်းခြောက်ပြောဆိုမှုများ ရှိနေသည်ဟု မူဆယ်မြို့ခံ အမျိုးသားတစ်ဦးက ပြောသည်။

“ကျနော်တို့ မူဆယ်က လူတွေတောင်မှ သူတို့ ချမှတ်ထားတဲ့ မဲကို ကျနော်တို့က သတ်မှတ်ရက်အတွင်း မဲသွားမပေးဘူးဆိုရင် သူတို့က စာရင်းပြန်ကြည့်မှာပေါ့နော်။ စာရင်းကြည့်လို့ တကယ်လို့ ကိုယ့် Passport သက်တမ်းကုန်ခဲ့ရင် မဲစာရင်း လာမပေးတဲ့သူဆိုရင် သူတို့က စာအုပ်အနီ ထပ်မလုပ်ပေးတော့ဘူးပေါ့၊ အဲဒီလိုမျိုးပေါ့”ဟု မူဆယ်ဒေသခံ ၎င်းအမျိုးသားက ပြောသည်။

မြို့ခံပြည်သူများအနေဖြင့် တရုတ်နိုင်ငံကို မှီခို၍ အလုပ်လုပ်ကြရသည့်အတွက် ဆန္ဒမဲသွားပေးကြရမည်ဖြစ်ကြောင်း၊ ၎င်းတို့က အာဏာပိုင်အဖွဲ့အစည်းဖြစ်သောကြောင့် ဘာမဆို လုပ်မည်ဖြစ်ကြောင်း ၎င်းက ဆက်ပြောသည်။

မူဆယ်မြို့ခံပြည်သူအပါအဝင် ဒေသအသီးသီးမှ လာရောက်ကြသော အလုပ်သမားတို့သည် နယ်စပ်တွင် စာအုပ်အနီနှင့် တစ်ပတ်ကဒ်တို့ဖြင့် သွားရောက်အလုပ်လုပ်ကိုင်ခြင်း၊ ကုန်စည်ကူးသန်းရောင်းဝယ်ခြင်းတို့ဖြင့် အသက်မွေးဝမ်းကြောင်း ပြုနေကြရကြောင်း ဒေသခံများက ပြောသည်။

ယခုရက်ပိုင်းတွင် နယ်စပ်ဖြတ်ကျော်စာအုပ်သွားလုပ်သည့်သူများကို မဲစာရင်းနံပါတ်စဉ်မေးကြောင်း၊ မိမိ မဲစာရင်းနံပါတ် မသိပါက စာအုပ်အနီ မလုပ်ပေးကြောင်း မူဆယ်မြို့ခံ အမျိုးသမီးတစ်ဦးကလည်း ပြောဆိုသည်။

“ခုရက်ပိုင်း နယ်စပ်ဖြတ်ကျော်စာအုပ် ဘိုကင်သွားလုပ်တဲ့သူတွေကို မဲစာရင်းနံပါတ် မေးတယ်။ မရှိ မသိရင် မလုပ်ပေးဘူး၊ ဒါကြောင့် မဲမထည့်ရင် စာအုပ်အနီ မလုပ်ပေးမှာ စိုးရိမ်နေကြတယ်။ စမတ်ကဒ်သွားမလုပ်ရင် စာအုပ်အနီ မလုပ်ပေးသလို အခုလဲ မဲမထည့်ရင် စာအုပ်အနီ မရမှာ စိုးရိမ်နေကြတယ်။ အားလုံးက တရုတ်ပြည်ထဲ ဝင်ထွက်သွားလာရှာဖွေစားသောက်နေကြရလို့လေ” ဟု အဆိုပါ ဒေသခံ အမျိုးသမီးက ပြောသည်။

တရုတ်နယ်စပ်အနီးရှိ ဒေသခံပြည်သူများကို သက်တမ်း ၁ နှစ်ရှိသော ယာယီနယ်စပ်ဖြတ်သန်းခွင့်လက်မှတ် (စာအုပ်အနီ) ထုတ်ပေးထားပြီး၊ ပြည်မဒေသမှ ပြည်သူများကို တရုတ်ပြည်သို့ တစ်ပတ်လည်ပတ်ခွင့် တစ်ပတ်ကဒ်များ ထုတ်ပေးလျက်ရှိနေသည်။

လက်ရှိ မူဆယ်မြို့နယ်တွင် ရှမ်းနှင့် တိုင်းရင်းသားများ ဒီမိုကရက်တစ်ပါတီ (ကျားဖြူပါတီ)၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) နှစ်ခုသာ စစ်အုပ်စု ဦးဆောင်ကျင်းပမည့် ရွေးကောက်ပွဲတွင် ဝင်ရောက်ယှဉ်ပြိုင်မည်ဟု သိရသည်။