သျှမ်းပြည် ဖယ်ခုံ – ပင်လောင်းနယ်စပ်တကြောတွင် ၃ လကျော်ကြာ ထွက်ပြေးတိမ်းရှောင်နေသည့် စစ်ဘေးရှောင်များသည် အနွေးထည်နှင့် သောက်သုံးရေ အခက်အခဲများ ကြုံတွေ့နေကြောင်း သိရသည်။

စစ်ကော်မရှင်တပ်နှင့် ပအိုဝ်းပြည်သူ့စစ် (PNO) တို့ ပူးပေါင်း ထိုးစစ်ဆင်မှုကြောင့် ဖယ်ခုံ – ပင်လောင်းနယ်စပ် တကြောတွင် ပြီးခဲ့သည့် အောက်တိုဘာလ ပထမပတ်မှ စတင်ပြီး ထွက်ပြေး တိမ်းရှောင်ခဲ့ကြရသည့် စစ်ဘေးရှောင်လူဦးရေ စုစုပေါင်း ၆၀၀ ဦးဝန်းကျင်ရှိသည်။

ထိုစစ်ဘေးရှောင်များသည် သောက်သုံးရေ ရရှိရန် အခက်အခဲများ ကြုံတွေ့နေရသည့်အပြင် အနွေးထည်နှင့် စောင်များလည်း ဆက်လက်လိုအပ်နေကြောင်း စစ်ဘေးရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“လိုအပ်တာကတော့ အနွေးထည်တွေပေါ့၊ ခုထိ လိုအပ်နေတုန်းပဲ။ သုံးပြီးသား ရရင်တောင် အဆင်ပြေတယ်၊ အခု ဒီဘက်ကလည်း တော်တော်အေးတယ်။ သောက်သုံးရေတွေ အတွက်ကလည်း စပြီး ရှားလာတယ်။ ကားတွေနဲ့ သွားသယ်ရတော့ ဆီဖိုးကလည်း အဆင်မပြေကြပြန်ဘူး”ဟု စစ်ဘေးရှောင်ကူညီသူ အမျိုးသားတစ်ဦးက ပြောသည်။

လက်ရှိ ဒီဇင်ဘာလ တတိယပတ်အထိ ဘောရန်ကျေးရွာ အနီးတွင် စစ်ကော်မရှင်တပ်၊ ၎င်းလက်အောက်ခံ ပအိုဝ်းပြည်သူ့စစ် (PNO) နှင့် ကရင်နီတော်လှန်ရေးတပ်ပေါင်းစုတို့ကြား တိုက်ပွဲများ ဆက်လက်ဖြစ်ပွားနေကြောင်း ၎င်းအမျိုးသားက ဆက်ပြောသည်။

“တိုက်ပွဲကလည်း နေ့တိုင်းလိုလိုပါပဲ အနည်းငယ်တော့ ဖြစ်နေတာ။ တိုက်ပွဲပြင်းတယ် မပြင်းဘူး ဆိုတာပဲ ရှိတာ။ နေ့တိုင်း လက်နက်ကြီး၊ ဒရုန်းတွေနဲ့ တိုက်နေကြတာ အဲ့တာကတော့ ပုံမှန်ပဲ”ဟု မြေပြင်သတင်းရင်းမြစ်တစ်ဦးက ပြောသည်။

အဆို ဖယ်ခုံမြို့နယ် အနောက်ဘက်ခြမ်း တောင်စလုံးကျေးရွာ၊ မြောက်စလုံးကျေးရွာ တကြောတွင် တိုက်ပွဲများ ဆက်လက်ဖြစ်ပွားနေခြင်းကြောင့် ဒေသခံများ ယခုအချိန်ထိ နေရပ်မပြန်နိုင်ကြသလို တိုက်ပွဲများကြောင့် ထပ်မံပြောင်းရွှေ့ရမည်ကိုလည်း စိုးရိမ်နေကြကြောင်း စစ်ဘေးရှောင်ကူညီသူ အမျိုးသားတစ်ဦးက ပြောသည်။

“ထပ်ရွှေ့ဖို့ကလည်း သူတို့အနေနဲ့ အဆင်မပြေကြဘူး။ အိမ်ကိုလည်း ပြန်ချင်နေကြတယ်။ သူတို့ကို မေးရင်လည်း ဝမ်းနည်းပြီး ငိုချင်နေကြတာ။ စိုးရိမ်နေကြရတာပေါ့၊ တိုက်ပွဲဖြစ်နေတဲ့နေရာနဲ့ သူတို့ရှိတဲ့ နေရာတွေက မိုင် ၂၀ လောက်တောင် မဝေးဘူး”ဟု ၎င်းစစ်ရှောင်ကူညီသူ အမျိုးသားက ထပ်လောင်းပြောသည်။

ပြီးခဲ့သည့် စက်တင်ဘာလ ဒုတိယပတ်တွင် ဖယ်ခုံမြို့နယ် အနောက်ဘက်ခြမ်း ဘောရန်ကျေးရွာနှင့် အနီးတစ်ဝိုက်ရှိ ကျေးရွာများကို စစ်ကော်မရှင်တပ်နှင့် ပအိုဝ်းပြည်သူ့စစ် (PNO) ပူးပေါင်း စစ်ကြောင်း ထိုးမှုကြောင့် ကျေးရွာ (၁၀) ရွာမှ ဒေသခံ ၆၀၀၀ ဝန်းကျင် နီးစပ်ရာ ကျေးရွာနှင့် တောတောင်အတွင်းသို့ ထွက်ပြေးတိမ်းရှောင်ခဲ့ရသည်။

ထိုသို့ထွက်ပြေးနေရသည့် ကျေးရွာများမှာ ဘောရန်(အပေါ်)၊ ဘောရန်(အောက်)၊ ထီတမောင်း၊ ရေအေးကုန်း၊ လွယ်လုံ၊ ကသဲ၊ တောင်စလုံး၊ မြောက်စလုံးနှင့် ရေချမ်းကျေးရွာများ ဖြစ်ကြောင်း သိရသည်။