နေ့စဉ်နှင့်အမျှ ကြီးထွားလာနေသည့် ကျားဖြန့်အွန်လိုင်း ငွေလိမ်လည်မှု ကိစ္စများကြောင့် မြန်မာနိုင်ငံအတွင်းရှိ ပုဂ္ဂလိကဘဏ် အသုံးပြုသူများ၏ အကောင့်လုံခြုံရေးအတွက် စိုးရိမ်နေရကြောင်း စုံစမ်းသိရသည်။

ယခု ၂၀၂၅ နှစ်လယ်ပိုင်းမှ စတင်ပြီး မြန်မာနိုင်ငံအတွင်းမှ ပြည်ပသို့ ငွေလဲလှယ်ခြင်း၊ ငွေလွှဲ လုပ်ငန်း လုပ်ကိုင်နေသူများသည် ကျားဖြန့် အွန်လိုင်း ငွေလိမ်လည်မှုကိစ္စများကြောင့် အလုပ်လုပ်ကိုင်နေသည့် ပုဂ္ဂလိက ဘဏ်အကောင့်များ ကန့်သတ်၊ ရပ်ဆိုင်းခြင်းမှုများ ကြုံတွေ့လာရကြောင်း မြန်မာ – ထိုင်း ငွေလွှဲလုပ်ကိုင်နေသူ အမျိုးသားတစ်ဦးက သျှမ်းသံတော်ဆင့်ကိုပြောသည်။

“ဘဏ်အကောင့် ပိတ်ထားတော့ အလုပ်ကို ထိခိုက်တယ်။ အလုပ်တွေ လုပ်ဖို့ ခက်သွားတာပေါ့။ ငွေလဲလှယ်တာတွေကလည်း သတိကိုထားရတယ်။ ကျားဖြန့်တွေနဲ့ ဆက်စပ်နေတာတွေကို ငွေလဲလှယ်တာ လုပ်မိလို့ ဘဏ်ပိတ်ခံရတာတွေ ကြုံရတယ်။ ဘဏ်အကောင့် ရပ်ဆိုင်းခံရတဲ့ ပြဿနာတွေ ဖြစ်သွားတာလေ”ဟု မြန်မာ – ထိုင်း ငွေလှဲ၊ ငွေလွှဲလုပ်ကိုင်နေသူ အမျိုးသားတစ်ဦးက ပြောသည်။

လက်ရှိတွင်လည်း မြန်မာနိုင်ငံအတွင်း ကျားဖြန့် အွန်လိုင်းလိမ်လည်မှုနှင့် ဆက်စပ်နေသည့် Sim Card ပေါင်း ၂၃၀၀ ကျော်နှင့် ဘဏ်အကောင့် ၁၄၉ ခုကို ပိတ်သိမ်းခဲ့ကြောင်း စစ်ကော်မရှင် လက်အောက်ခံ မြန်မာနိုင်ငံရဲတပ်ဖွဲ့ ပြောရေးဆိုခွင့်ရှိသူ ရဲမှူးချုပ်ကျော်လင်းက ပြောကြားခဲ့ကြောင်း သိရသည်။

“Sim Card ပေါင်း ၂၃၀၀ ကျော် ကျွန်တော်တို့ ပိတ်ထားတာ ရှိပါတယ်။ အဲ့ဒါနဲ့တစ်ဆက်တည်းပဲ ကျွန်တော်တို့က Pay အကောင့်တွေ ပိတ်သလိုပဲ ဒါတွေနဲ့ ဆက်စပ်နေတဲ့ ဘဏ်အကောင့်တွေလည်း စိစစ်ဖော်ထုတ် ရရှိတာတွေ ရှိပါတယ်။ အခုအချိန်အထိ ဘဏ်အကောင့်ပေါင်း ၁၄၉ ခု ပေါ့၊ အဲ့ဒီဘဏ်အကောင့်တွေကိုလည်း ကျွန်တော်တို့က ဗဟိုဘဏ်နဲ့ ဆက်သွယ်ပြီးတော့ ပိတ်သိမ်းခဲ့တာတွေ ရှိပါတယ်”ဟု ရဲမှူးချုပ်ကျော်လင်းက ပြောသည်။

ထိုအကောင့်ပိုင်ရှင် ပြည်သူများ၏ ကိုယ်ရေးအချက်အလက် အမှန်ရရန် အကောင့်များနှင့် ဆက်စပ်နေသော တယ်လီဖုန်းများကို ပိတ်သိမ်းနိုင်ရေးအတွက် ပို့ဆောင်ရေးနှင့် ဆက်သွယ်ရေးဝန်ကြီးဌာနတို့ ပူးပေါင်း ဆောင်ရွက်ခဲ့ကြောင်း သိရသည်။

ပြည်သူများအနေဖြင့် ယခုကဲ့သို့ ကျားဖြန့် အွန်လိုင်းငွေ လိမ်လည်မှုကိစ္စများကြောင့် အသုံးပြုနေသည့် ဘဏ်အကောင့်များ ကန့်သတ်၊ ရပ်ဆိုင်းမှုများ မကြုံတွေ့စေရန် ငွေလဲလှယ်ခြင်း၊ ငွေလွှဲခြင်းတို့တွင်လည်း သတိထားရန်လိုအပ်ကြောင်း မြန်မာ – ထိုင်း ငွေလွှဲလုပ်ကိုင်နေသူ အမျိုးသားတစ်ဦးက ပြောသည်။

“ဘဏ်အကောင့်တွေရဲ့ လုံခြုံရေးအတွက်ကလည်း တကယ်ကို သတိထားရမယ်။ အဓိက ကလည်း မသိတဲ့လူတွေနဲ့ ငွေလှဲတာတွေ ငွေလွှဲလုပ်တာမျိုးကိုတော့ သတိထားကြရမှာပေါ့။ တကယ်ကို စိုးရိမ်ရပါတယ်၊ ဖြစ်နိုင်ရင်လည်း ဘဏ်ထဲမှာ ငွေတွေ အများကြီး မထားစေချင်ပါဘူး”ဟု ငွေလွှဲလုပ်ကိုင်သူ ၎င်းအမျိုးသားက ပြောသည်။

အွန်လိုင်းကျားဖြန့် လိမ်လည်မှုများနှင့် ပတ်သက်ပြီး ပြစ်မှုကျူးလွန်ခြင်းခံရလျှင် သက်ဆိုင်ရာ ရဲစခန်းတွင် အမှုဖွင့်တိုင်ကြားရန် လိုအပ်ကြောင်း စစ်ကော်မရှင် လက်အောက်ခံ မြန်မာနိုင်ငံရဲတပ်ဖွဲ့ ပြောရေးဆိုခွင့်ရှိသူ ရဲမှူးချုပ်ကျော်လင်း က ပြောကြားသည်။

လက်ရှိအခြေအနေအရ အွန်လိုင်းကျားဖြန့် ငွေဂိုဏ်းများကို မြန်မာနိုင်ငံအတွင်း လုံးဝ အခြေမပြုနိုင်ရေးအတွက် စစ်ကော်မရှင်နှင့် သက်ဆိုင်ရာ ဝန်ကြီးဌာနများအပြင် အိမ်နီးချင်းနိုင်ငံ အစိုးရများနှင့် ‌ပေါင်းစပ်ညှိနှိုင်း၍ ဆောင်ရွက်လျက်ရှိကြောင်း သိရသည်။