သျှမ်းပြည်မြောက်ပိုင်း သီပေါ-လားရှိုး ဆက်သွယ်ထားသည့် သီပေါတံတားကြီးကို စစ်ကော်မရှင်တပ်နှင့် MNDAA တို့ တစ်လကျော်ကြာ ပိတ်ဆို့ထားသော်လည်း ကုန်ကားအချို့ထံ လာဘ်ငွေတောင်းယူပြီး ညအချိန် ဖြတ်သန်းခွင့်ပြုနေကြောင်း စုံစမ်းသိရသည်။

စစ်ကော်မရှင် ပြန်လည်ထိန်းချုပ်ထားသည့် သီပေါမြို့နှင့် လားရှိုးမြို့ကို ဆက်သွယ်ထားသည့် သီပေါတံတားကြီးကို စစ်ကော်မရှင်တပ်နှင့် ကိုးကန့်တပ် MNDAA တို့ စစ်ရေးတင်းမာမှုကြောင့် နိုဝင်ဘာလ ၁၄ ရက်မှ စတင်၍ နှစ်ဘက်အပြန်အလှန် ပိတ်ဆို့ထားခဲ့ပြီး ယနေ့ (ဒီဇင်ဘာလ ၁၆ ရက်) အထိ ဖြတ်သန်းခွင့် မပေးကြောင်း ဒေသခံများက ပြောသည်။

သို့သော် ယမန်နေ့ (ဒီဇင်ဘာလ ၁၅ ရက်) နံနက်အစောပိုင်း ၁ နာရီကျော်ခန့်တွင် သီပေါမြို့နယ်အတွင်း ကိုးကန့်တပ်ဖွဲ့ ထိန်းချုပ်ထားသည့် ပြည်ထောင်စုလမ်းမဘက်ခြမ်း အသင့်စောင့်ဆိုင်းနေသည့် ကုန်တင်ကားများကို စစ်ကော်မရှင်တပ်သားများက တံတားဖြတ်သန်းခွင့်ပြုခဲ့ကြောင်း ဖြစ်စဉ်သိရှိသူ အမျိုးသားတစ်ဦးက ပြောသည်။

“မနက်စောစော ၁ နာရီအချိန်မှာ ကားကြီးတွေ ကိုးကန့်ဘက်အခြမ်းကနေ သီပေါမြို့ဘက်ကို ဖြတ်သွားပါတယ်။ သီပေါတံတားကြီး ပိတ်ထားတယ်ဆိုပြီး လားရှိုးဘက်က လာတဲ့ ကုန်ကားတွေ သီပေါမြို့ဘက်ကို အများကြီးဖြတ်သွားပါတယ်။ ကိုးကန့်နဲ့စစ်တပ် အဆင်မပြေရင် ညကြီး ကားတွေ ဘာလို့ ပေးဖြတ်တာလဲလို့ ပြည်သူတွေက မေးနေကြပါပြီ” ဟု သီ​ပေါဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။

အဆိုပါ သီပေါတံတားကြီးတွင် စောင့်ဆိုင်းနေသည့် စစ်ကော်မရှင်တပ်သားများသည် တံတားထိပ်တွင် ဆီပေပါများဖြင့် ပိတ်ဆို့ထားပြီး လားရှိုးဆေးရုံသို့ ပို့ဆောင်ရမည့် အရေးပေါ်လူနာများကိုလည်း ဖြတ်သန်းခွင့်မပေးခြင်းကြောင့် အခက်အခဲ ကြုံနေရကြောင်း ဒေသခံများထံမှ သိရသည်။

“တဘက်ကမ်းက နာမကျန်းသူ၊ တောင်သူ ခြံရှိသူ စသဖြင့် သျှမ်းရွာသူရွာသားတွေ သီပေါမြို့ကို လာဖို့ ၂ သောင်းကျပ် အကုန်ခံပြီး လှေကူးရသလို အခက်အခဲများစွာ ဖြစ်ပေါ်နေပါတယ်။ အခုက ငွေပေးကူးနေတာ ခွင့်ပြုနေပြီး လှေနဲ့ဒုက္ခခံ ငွေကုန်ခံ ပြည်သူတွေ ကမ်းကူးနေရပါတယ်၊ ဘာလို့ ပြည်သူတွေကျတော့ ခက်ခဲအောင် လုပ်နေတာလဲ။ ကိုးကန့်လည်း လုပ်စားတယ် ဗမာတပ်လည်း လုပ်စားနေပါတယ်” ဟု သီပေါဒေသခံ ၎င်းအမျိုးသားက ဆက်ပြောသည်။

ပြီးခဲ့သည့် ရက်ပိုင်းအတွင်း သီပေါတံတားပေါ် လူနှင့် ဆိုင်ကယ် ဖြတ်သန်းခွင့်ပြုခဲ့ကြောင်း ဒေသခံများ ပြောဆိုသော်လည်း အချိန်အကန့်အသတ်နှင့်သာ ဖြစ်ပြီး အချိန်မရွေး ပြန်လည်ပိတ်ဆို့ထားခြင်းကြောင့် အပြောင်းအလဲမြန်ကြောင်း ဆိုသည်။

လက်ရှိတွင် သီပေါမြို့ တစ်ဖက်ကမ်းသို့ သွားရောက်လိုပါက ဒုဋ္ဌဝတီမြစ်ကမ်းဘေး ကူးတို့ဆိပ်ရှိ စက်လှေသမားများထံ ခရီးသည်တစ်ဦးလျှင် ကျပ် ၂ သောင်းမှ ၃ သောင်းအထိ ပေးဆောင်ရပြီး ထိုသို့ သယ်ယူပို့ဆောင်ပေးသည့် စက်လှေများ၊ ကားများထံမှ စစ်ကော်မရှင်တပ်နှင့် ကိုးကန့်တပ် နှစ်ဘက်စလုံးမှ ထပ်မံငွေကောက်ခံကြောင်း ဒေသခံများက ပြောသည်။

သီပေါတံတားကြီးကို ပိတ်ထားခြင်းကြောင့် လားရှိုးမြို့နှင့် မူဆယ်မြို့ဘက်သို့ သွားရောက်လိုသူများသည် ကျောက်မဲမြို့မှတစ်ဆင့် သီပေါမြို့ကို ရှောင်ကွင်း၍ တာလုံ-နားမခေါ် လမ်းပိုင်းမှ နမ္မတူမြစ်ကို ဇက်ရေယာဉ်ဖြင့် ဖြတ်ကူးကာ နမ့်လန်၊ မိုင်းရယ်မြို့ဘက်မှ တဆင့်သွားရပြီး လမ်းခရီး ကြန့်ကြာ၍ ငွေကြေးကုန်ကျမှုလည်း များလာကြောင်း ခရီးသွားများထံမှ သိရသည်။

သီပေါမြို့ကို TNLA တပ်ဖွဲ့ထံမှ စစ်ကောင်စီတပ် ပြန်လည်တိုက်ခိုက် သိမ်းယူခဲ့ပြီးနောက် ပြည်ထောင်စုလမ်းမကြီးပေါ်ရှိ သီပေါ-လားရှိုးလမ်းပိုင်းနှင့် လားရှိုး-မိုင်းရယ် လမ်းပိုင်းများမှ MNDAA တပ်ဆုတ်ခွာရန် နိုဝင်ဘာလဆန်းတွင် တောင်းဆိုခဲ့ရာ ဆွေးနွေးမှု အဆင်မပြေဘဲ နှစ်ဘက်စစ်ရေးတင်းမာကာ အပြန်အလှန် လမ်းပိတ်ထားခဲ့ခြင်း ဖြစ်သည်။