ထိုင်းနိုင်ငံအတွင်း ရောက်ရှိနေသည့် အထောက်အထားမဲ့ ရွှေ့ပြောင်းအလုပ်သမားများကို ထိုင်းအာဏာပိုင်များက တရားဝင် အလုပ်လုပ်ခွင့်လက်မှတ် ဝေါ့ခ်ပါမစ် (Work Permit) လုပ်ပေးနေသည်။

အဆိုပါအလုပ်လုပ်ခွင့်လက်မှတ် ဝေါ့ခ်ပါမစ် ပြုလုပ်ရန် ပထမအဆင့်ဖြစ်သော Name List ဟုခေါ်သည့် အမည်စာရင်း တင်သွင်းခြင်းကို ဒီဇင်ဘာလ ၁၂ ရက်မှ ၂၆ ရက်အထိ ၁၅ ရက်တာ ခွင့်ပြုထားသည်။

ထိုင်းနိုင်ငံအတွင်း တရားမဝင် နည်းလမ်းဖြင့် ဝင်ရောက်လာသည့် အထောက်အထားမဲ့ ရွှေ့ပြောင်းအလုပ်သမား များကို ဝာရားဝင်ဖြစ်စေရန် ရည်ရွယ်၍ ထိုင်းအစိုးရဘက်မှ အလုပ်လုပ်ခွင့် အသိအမှတ်ပြုလက်မှတ် (ခေါ်) ဝေါ့ခ်ပါမစ်ကို နှစ်စဉ်ထုတ်ပေးသည်။

ထိုလုပ်ငန်းစဉ်အား ဘတ်ရိုက်ခြင်း (သို့မဟုတ်) ပန်းရောင်ကတ် ပြုလုပ်သည်ဟုလည်း ခေါ်ကြသည်။

သို့သော် မြန်မာအပါအဝင် လာအိုနှင့် ဗီယက်နမ်နိုင်ငံများမှ ရွှေ့ပြောင်းအလုပ်သမားများကို တရားဝင် အလုပ်လုပ်ခွင့်လက်မှတ် လုပ်ပေးမည်ဟု သတင်းထွက်လာကတည်းက ဝန်ဆောင်မှုပေးသည့် ပွဲစားများကလည်း ကျသင့်မည့် ဈေးနှုန်းကို အမျိုးမျိုးသတ်မှတ်ကာ အပြိုင်အဆိုင် ကြော်ငြာထားကြသည်။

အချို့သော ပွဲစားများသည် VIP လမ်းကြောင်းဟုဆိုကာ ထိုင်းဘတ်ငွေ ၁၈,၀၀၀ (မြန်မာကျပ်ငွေ ကာလပေါက်ဈေး ၂၂ သိန်းကျော်) အထိ တောင်းယူကြောင်း ရွှေ့ပြောင်းအလုပ်သမားများက ပြောကြသည်။

ဘာကြောင့် ငွေလိမ်ခံရသလဲ

ထိုင်းနိုင်ငံတွင် တရားဝင် အလုပ်လုပ်ခွင့် ဝေါ့ခ်ပါမစ် လျှောက်ထားကြမည့် မြန်မာနိုင်ငံသား အနေဖြင့် ဝန်ဆောင်မှုယူမည့် ပွဲစားများကို သေချာစိစစ်ရွေးချယ်ခြင်း မပြုလုပ်ကြသဖြင့် လိမ်လည်မှုများ ကြုံတွေ့နေရကြောင်း ရွှေ့ပြောင်းအလုပ်သမားများ ဘတ်ရိုက်ရာတွင် ဝန်ဆောင်မှုပေးနေသူတစ်ဦးက ပြောသည်။

“တချို့တွေက ဘတ်ရိုက်မယ့် လုပ်ငန်းစဉ်အကြောင်းတွေ မသိဘူး။ ပြီးတော့ ဘတ်ရိုက်ပေးတဲ့ ပွဲစားတွေကိုလည်း သေချာ မစုံစမ်းဘူး။ တချို့ပွဲစားက ကုန်ကျစရိတ် နည်းနည်းနဲ့ လုပ်ပေးမယ်ဆိုပြီး မက်လုံးပေးရင် သူတို့ (ရွှေ့ပြောင်းအလုပ်သမား) က သွားလုပ်ကြတာ။ အဲ့ကြောင့် ငွေတွေလိမ်ခံရတော့တာပဲ” ဟု ၎င်းက ပြောသည်။

ထိုကြောင့် လိမ်လည်မှုများ မကြုံရအောင် ဝန်ဆောင်မှုယူမည့် ပွဲစားများကို သေချာစိစစ် ရွေးချယ်ကြရန်လည်း ၎င်းက ဆက်ပြောသည်။

“ကုန်ကျစရိတ်တစ်ခုတည်းကို မကြည့်ဘဲ ပွဲစားတွေကို သေချာစုံစမ်းဖို့ လိုပါတယ်။ စိတ်ချရတဲ့ ပွဲစားတွေမှာ သွားလုပ်ကြပါ” ဟု ရွှေ့ပြောင်းအလုပ်သမားများ ဘတ်ရိုက်ရာတွင် ဝန်ဆောင်မှုပေးနေသူတစ်ဦးက တိုက်တွန်းထားသည်။

ထိုင်းအစိုးရဘက်မှ ယခုစတင်မည့် ဘတ်အမည်စာရင်း တင်သွင်းခြင်း လုပ်ငန်းစဉ်တွင် အစအဆုံး ပေးသွင်းရမည့် ကုန်ကျစရိတ်ကို ထိုင်းဘတ်ငွေ ၃,၈၇၀ (မြန်မာကျပ်ငွေ ကာလပေါက်ဈေး လေးသိန်းခွဲကျော်) ကျသင့်မည်ဟု တရားဝင် ကြေညာထားသည်။

အဆိုပါ ဘတ်စာရင်တင်သွင်းကြေးကိုလည်း ထိုင်းအလုပ်သမားဝန်ကြီးဌာန၏ ထုတ်ပြန်ချက်တွင် ဖော်ပြထားသော ဝက်ဘ်ဆိုဒ်စာမျက်နှာ လင့်ခ်မှတစ်ဆင့် ပေးသွင်းရမည်ဖြစ်သည်။

သို့သော် ပြင်ပအကျိုးဆောင် ပွဲစားများဖြင့် လုပ်ဆောင်မည်ဆိုပါက ထိုင်းဘတ်ငွေ ၈,၀၀၀ မှ ၁၀,၀၀၀ ကျော် (မြန်မာကျပ်ငွေ ကာလပေါက်ဈေး ၁၀ သိန်းမှ ၁၂ သိန်းကျော်) အထိ ပေါက်ဈေးရှိနေသည်ဟု ဘတ်စာရင်း အသစ်လျှောက်မည့်သူများက ပြောကြသည်။

ဘတ်ရိုက်ခြင်း လုပ်ငန်းစဉ်များ

ထိုင်းနိုင်ငံတွင် အလုပ်လုပ်ခွင့်လက်မှတ် ဝေါ့ခ်ပါမစ် ပြုလုပ်ရန် ပထမအဆင့်ဖြစ်သော အမည်စာရင်း တင်သွင်းခြင်း၊ ဒုတိယအဆင့်ဖြစ်သော သွေးစစ်၊ လက်ဗွေနှိပ်ခြင်းနှင့် ကျန်းမာရေးအာမခံ ဝယ်ခြင်း၊ တတိယအဆင့်ဖြစ်သော ဝေါ့ခ်ပါမစ် (Work Permit) လျှောက်ခြင်းနှင့် စတုတ္ထအဆင့်ဖြစ်သော Non LA Visa ထည့်ခြင်း (သို့မဟုတ်) ပန်းရောင်ကတ်လျှောက်ခြင်း ဟူ၍ အဆင့် ၄ ဆင့်ရှိသည်။

အလုပ်လုပ်ခွင့်လက်မှတ် ဝေါ့ခ်ပါမစ် ပြုလုပ်ရန် ပထမအဆင့်ဖြစ်သော အမည်စာရင်း Name List တင်သွင်းခြင်းကို ဒီဇင်ဘာလ ၁၂ ရက်မှ ၂၆ ရက်အထိ ၁၅ ရက်တာ ခွင့်ပြုထားကြောင်း ထိုင်းအလုပ်သမားဝန်ကြီးဌာနက ဒီဇင်ဘာလ ၉ ရက်တွင် ထုတ်ပြန်ထားပြီး ဖြစ်သည်။

ထို့အပြင် သွေးစစ်၊ လက်ဗွေနှိပ်ခြင်းနှင့် ကျန်းမာရေးအာမခံ ဝယ်ယူခြင်းကို ၂၀၂၆ ဖေဖော်ဝါရီလ ၂၄ ရက်အထိ လည်းကောင်း၊ ဝေါ့ခ်ပါမစ် (Work Permit) လျှောက်ခြင်းကို ၂၀၂၆ မတ်လ ၂၆ ရက်နေ့အထိ လည်းကောင်း၊ Non LA Visa ထည့်ခြင်း (သို့မဟုတ်) ပန်းရောင်ကတ်လျှောက်ခြင်းကို ၂၀၂၆ ဇွန်လ ၂၄ ရက်အထိ ပြုလုပ်ပေးမည်ဟု သိရသည်။

ယင်းနောက် အလုပ်လုပ်ခွင့်လက်မှတ် လျှောက်ထားမည့်သူများအနေဖြင့် နိုင်ငံကူးလက်မှတ် (သို့မဟုတ်) မည်သူမည်ဝါဖြစ်ကြောင်း သက်သေခံလက်မှတ် CI စာအုပ်ရှိထားလျှင် ဗီဇာထည့်ရမည် ဖြစ်သည်။

အကယ်၍ နိုင်ငံကူးလက်မှတ် စာအုပ်မရှိသူများက မည်သူမည်ဝါဖြစ်ကြောင်း CI စခန်းသို့ စာအုပ်သွားလုပ်ပြီး ဗီဇာထည့်ရမည် ဖြစ်သည်။

ယခုဘတ်ရိုက်ပေးမည့် လုပ်ငန်းစဉ်တွင် ဝေါ့ခ်ပါမစ် သက်တမ်းကုန်ဆုံးနေသူများ၊ နေထိုင်ခွင့်သက်တမ်း ကျော်လွန်နေသူများနှင့် ခွင့်ပြုချက်မရှိဘဲ အလုပ်လုပ်ကိုင်နေသူများလည်း အကျုံးဝင်ကြောင်း ပြီးခဲ့သည့် နိုဝင်ဘာလ ၂၅ ရက်က ထိုင်းအလုပ်သမားဝန်ကြီးဌာနကလည်း ထုတ်ပြန်ကြေညာထားသည်။

စစ်တပ်အာဏာသိမ်းပြီးနောက်ပိုင်း မြန်မာနိုင်ငံရှိ လူငယ်များသည် စစ်ရေး ပဋိက္ခများ၊ စီးပွားရေး ပြိုလဲမှုများနှင့် စစ်မှုထမ်း ကိစ္စရပ်များကြောင့် အိမ်နီးချင်း ထိုင်းနိုင်ငံထဲသို့ တရားမဝင် နည်းလမ်းဖြင့်လည်းကောင်း၊ တရားဝင် နည်းလမ်းဖြင့်လည်းကောင်း နည်းလမ်းမျိုးစုံဖြင့် ဝင်ရောက်လာကြသည်။

အချို့သော မြန်မာနိုင်ငံသားများသည် ဘတ်ရိုက်ခြင်း (သို့မဟုတ်) အလုပ်လုပ်ခွင့်လက်မှတ် ဝေါ့ခ်ပါမစ် ပြုလုပ်ရန်အတွက် ထိုင်းနိုင်ငံထဲသို့ တရားမဝင် လမ်းကြောင်းမှတစ်ဆင့် ဝင်ရောက်လာပြီး ခရီးစရိတ်အတွက် ၎င်းတို့သည် (နေရာဒေသအပေါ် မူတည်၍) ပွဲစားများကို တစ်ဦးလျှင် ဘတ် ၁၅,၀၀၀ (မြန်မာကာလပေါက်စျေး ကျပ် ၁၈သိန်းကျော်) မှ ၄၀,၀၀၀ (မြန်မာကာလပေါက်စျေး ကျပ်သိန်း ၅၀နီးပါး) ပေးရကြောင်း သိရသည်။