သျှမ်းပြည်တောင်ပိုင်း၊ ရွာငံမြို့နယ်နှင့် ပင်းတယမြို့နယ် အတွင်းရှိ ကျေးရွာများတွင် စစ်ကော်မရှင်တပ်သားများ ဝင်ရောက်တပ်စွဲထားပြီး ဒေသခံများကို အလှည့်ကျ ကင်းစောင့်ခိုင်းထားကြောင်း သတင်းရရှိသည်။

ဒီဇင်ဘာလဆန်းပိုင်းမှ စတင်ပြီး ရွာငံမြို့နယ် လင်းဝေးကျေးရွာအုပ်စု၊ တပင်ပျော်ကျေးရွာအုပ်စု၊ ကျောက်ငှက်ကျေးရွာအုပ်စုနှင့် ကျန်တောကျေးရွာအုပ်စုတို့တွင် စစ်ကော်မရှင်တပ်က အင်အားအလုံးအရင်းဖြင့် ဝင်ရောက်တပ်စွဲထားပြီး ဒေသခံများကို ကင်းတဲ လိုက်လံဆောက်ခိုင်းသည့်အပြင် အလှည့်ကျ ကင်းစောင့်ခိုင်းနေကြောင်း ဒေသခံများက ပြောသည်။

“ရွာတိုင်းလိုလို ကင်းတဲ ဆောက်ခိုင်းတာ၊ ရွာပတ်ပတ်လည်မှာ ၄ ခု ၅ ခုလောက်ကို ဆောက်ပေးရတာ။ ထင်တာက သူတို့စောင့်မယ်ထင်တာ၊ ရွာသားတွေ စောင့်ဖို့ဖြစ်နေတာ။ အလှည့်ကျ သွားစောင့်ရတာ၊ ရွာထဲမှာလည်း စစ်သားတွေရှိတယ်။ သူတို့ကို ကြောက်နေရတယ်” ဟု ရွာငံဒေသခံ အမျိုးသားတစ်ဦးက ပြောသည်။

လာမည့် ဇန်နဝါရီလ ၁၁ ရက်တွင် စစ်ကော်မရှင်၏ အတုအယောင် ရွေးကောက်ပွဲ ဒုတိယပိုင်း၌ ရွာငံမြို့နယ်လည်း ပါဝင်နေသောကြောင့် စစ်ကော်မရှင်ဘက်က စစ်ဆေးမှုများ တင်းကြပ် ထားကြောင်း ၎င်းက ဆက်ပြောသည်။

အလားတူ လာမည့် ဒီဇင်ဘာလ ၂၈ ရက်တွင် ကျင်းပမည့် စစ်ကော်မရှင်၏ ရွေးကောက်ပွဲ ပထမပိုင်းတွင် ပင်းတယမြို့နယ် ပါဝင်ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) နှင့် ပြည်သူ့ရှေ့ဆောင်ပါတီ(PPP)ပါတီ အပါအဝင် ဓနုတိုင်းရင်းသားလူမျိုးများ ဒီမိုကရေစီပါတီ (DNDP) တို့က အပြိုင်အဆိုင် မဲဆွယ်နေကြောင်း သိရသည်။

ထို့အပြင် စစ်ကော်မရှင်တပ်ကလည်း မဲနယ်တောင်ဒေသ၊ တောင်ပေါ်ကြီးကျေးရွာအုပ်စု၊ မိုင်းလီကျေးရွာအုပ်စု တို့တွင် အင်အားအလုံးအရင်းနှင့် တပ်စွဲထားပြီး ဒေသခံများကို အလှည့်ကျ ကင်းစောင့်ခိုင်းနေကြောင်း ဒေသခံများထံမှ သိရသည်။

“မြို့နဲ့နီးတဲ့ ရွာတွေတော့ စစ်တပ်က တပ်မစွဲဘူး။ ဒီတောတောင်နဲ့ နီးတဲ့ ရွာတွေကို အဓိက တပ်စွဲတာ။ တော်လှန်ရေးတပ်တွေ ရှိနိုင်မယ့် တောတောင်က ရွာတွေ ပိုတပ်စွဲတယ်။ ညဆိုလည်း ကျနော်တို့ ရွာသားတွေ အလှည့်ကျ ကင်းစောင့်ရတယ်။ တချို့နေရာက စစ်သားတွေရော ရွာသားတွေကော ပါတယ်” ဟု ပင်းတယ ဒေသခံ အမျိုးသားတစ်ဦးက ပြောသည်။

စစ်ကော်မရှင်တပ်သည် ရွေးကောက်ပွဲ အကောင်အထည် ဖော်နိုင်ရေးအတွက် ပြည်သူများကို ဖိအားပေး ခြိမ်းခြောက်မှုများ မကြာခဏ ပြုလုပ်မှုရှိကြောင်း ၎င်းအမျိုးသားက ဆက်ပြောသည်။

ယခုလက်ရှိ ပင်းတယမြို့နယ်နှင့် ရွာငံမြို့နယ်တွင် စစ်ကော်မရှင်က အင်အားအလုံးအရင်းဖြင့် ကျေးရွာများတွင် ဝင်ရောက်တပ်စွဲထားပြီး စစ်ဆေးရေးဂိတ်များ တိုးချထားခြင်း၊ တောတောင်ဘက်သို့ မကြာခဏ စစ်ကြောင်းထိုးခြင်းများ ပြုလုပ်နေကြောင်း သိရသည်။

ထိုသို့ စစ်ကော်မရှင်တပ် အစစ်အဆေး တင်းကြပ်ထားသည့်ကြားမှ ပြီးခဲ့သည့် နိုဝင်ဘာလ ၂၉ ရက်နေ့တွင် ရွာငံမြို့နယ် မြင်းကျဒိုးကျေးရွာမှ စစ်ကော်မရှင် လက်အောက်ခံ ပျူစောထီးခေါင်းဆောင် ဦးဝင်းမြင့်နှင့် ၎င်း၏လက်အောက်ငယ်သား တစ်ဦးတို့ကို ဓနုပြည်နယ်အမျိုးသားလွတ်မြောက်ရေးတပ်ဖွဲ့ (DSNDA) က ပစ်ခတ်ခဲ့ရာ သေဆုံးသွားခဲ့သည်။