ကရင်နီပြည်(ကယား) လွိုင်ကော်မြို့တွင် သုံးလတာ ကာလအတွင်း မြေမြှုပ်မိုင်းကြောင့် ထိခိုက်ဒဏ်ရာရရှိသူ (၁၀)ဉီးထိရှိပြီး ထိုထဲတွင် (၃)ဦးသေဆုံးခဲ့ကြောင်း ဒေသအတွင်း သတင်းရင်းမြစ်များက ပြောသည်။

လွိုင်ကော်မြို့တွင်း တိုက်ပွဲများငြိမ်သက်နေပြီး အခြားဒေသသို့ ထွက်ပြေးတိမ်းရှောင်သည့် စစ်ဘေးရှောင်များသည် နေရပ်သို့ ပြန်လာကြသည်။

ထိုသို့နေရပ်ပြန်လာချိန်တွင်လည်း လွိုင်ကော်မြို့အတွင်း မြေမြှုပ်မိုင်းများရှင်းလင်းမှုမရှိကာ ပြီးခဲ့သည့် စက်တင်ဘာလမှ နိုဝင်ဘာ (၃)လတာကာလအတွင်းမြေမြှုပ်မိုင်းထိခိုက်ဒဏ်ရာရရှိသူ (၇)ဦးနှင့် သေဆုံးသူ (၃)ဦးရှိပြီး အများစုသည် ဒေါခူရပ်ကွက်နှင့် နောင်ရား ရပ်ကွက်၌ ဖြစ်ပွားသည်။

ထိုသို့ မြေမြုပ်မိုင်း ပေါက်ကွဲပြီး ထိခိုက်ဒဏ်ရာသူ ၇ ဦးသည် ခြေထောက်ပြတ်သူ၊ မျက်လုံးထိခိုက်သူရှိပြီး ကျန်သုံးဦးသည် သေဆုံးခဲ့ကြောင်း လွိုင်ကော်မြို့ ရွှေညောင်ပင် လူမှုကူညီရေး အသင်း တာဝန်ခံတစ်ဉီးက သျှမ်းသံတော်ဆင့်ကို ပြောသည်။

“ဖြစ်နိုင်ရင် သေချာရှင်းလင်းပြီးမှ ပြည်သူတွေကို ပြန်နေစေချင်တယ်။ ဒီလို နေတာကျ အရမ်း အန္တရာယ်များတယ်လေ။ သုံးလအတွင်းမှာတောင် ၁၀ ဦးမိုင်းထိတာ ၊ ခြေပြတ် လက်ပြတ်တွေ ဖြစ်ကုန်တာ။ ၃ ဦးလောက်က သေတယ်။ ကျနော်တို့ပဲ လိုက်ကူညီပေးရတာ။” ဟု အဆိုပါ လူမှုကူညီရေး အသင်း တာဝန်ခံ တစ်ဦးက ပြောသည်။

ထိုသို့ သေဆုံး၊ ဒဏ်ရာရသူများသည် နေ့စားသမားများ ဖြစ်ကြပြီး စားဝတ်နေရေးအတွက် လယ်ဆင်းလုပ်ချိန် မြေမြုပ်မိုင်း နင်းမိသူနှင့် မကျည်းသီးကောက်ရာမှ မြေမြုပ်မိုင်းနင်းမိပြီး ခြေနှစ်ဖက်ဆုံးရှုံးသွားသူများ ရှိကြောင်း ၎င်းက ဆက်ပြောသည်။

ဆက်လက်ပြီး လွိုင်ကော်မြို့သို့ နေရပ်ပြန်လာသူများသည်လည်း မြေမြုပ်မိုင်းအန္တရာယ် စိုးရိမ်သောကြောင့် ခြံထူသော လမ်းများ၊ တောများသို့ မသွားရဲကြောင်း လွိုင်ကော်မြို့ခံ အမျိုးသမီးတစ်ဦးက ပြောသည်။

“မိုင်းနင်းမိမှာ အရမ်းကြောက်တယ်၊ ခြေပြတ် လက်ပြတ်ဖြစ်ပြီး ဒုက္ခိတ ဖြစ်မှာ အကြောက်ဆုံးပဲ။ လမ်းသွားရင် ခြုံထူတဲ့ ဘက်ကနေတောင် မသွားရဲဘူး။ လမ်းမဆို အလယ်တည့်တည့်ကပဲ သွားရဲတာ။ မြေမြုပ်မိုင်းတွေ မရှိဘူးလို့ မပြောနိုင်ဘူးလေ ၊ ဘယ်ဟာက မြေမြုပ်မိုင်းဆိုတာမှ မသိတာ။” ဟု အဆိုပါ အမျိုးသမီးတစ်ဦးက ပြောသည်။

ပြီးခဲ့သည့် ဇူလိုင်လကလည်း စစ်ကောင်စီက လွိုင်ကော်မြို့ ရပ်ကွက်များ၌ နေရပ်ပြန်လိုသည့် စစ်ရှောင်များကို ပြန်လည်နေထိုင်ခွင့်ပြုခဲ့ပြီး မိုင်းရှင်းပေးမည်ဟုဆိုကာ တစ်အိမ်လျှင် ငွေကျပ်တစ်သိန်း ကောက်ခံသွားခဲ့ကြောင်း၊ သို့သော် နေအိမ်ဝန်းအတွင်းကိုသာ မြေမြှုပ်မိုင်း ရှင်းပေးခဲ့ကြောင်း သိရသည်။

လွိုင်ကော်မြို့ပန်ကန်းရပ်ကွက်တွင် နေထိုသည့် အမျိုးသား နှစ်ဦးသည်လည်း ပြီးခဲ့သည့် ဒီဇင်ဘာလ ၃ ရက်နေ့က တောင်ယာမှ အပြန်လမ်းမှာ မိုင်းနင်းမိပြီး ဒဏ်ရာရရှိကာ ဆေးကုသမှုခံယူနေရကြောင်း သိရသည်။

ပြီးခဲ့သည့် အောက်တိုဘာလ နောက်ဆုံးပတ်က လွိုင်ကော်မြို့ မိုင်းလုံးရပ်ကွက်တွင် နေအိမ်ခြံဝင်း အတွင်း မြေမြှုပ်မိုင်း ပေါက်ကွဲမှုကြောင့် အသက် ၁၂ နှစ်အရွယ် ကလေးတစ်ဦး ထိခိုက်ဒဏ်ရာ ရရှိခဲ့ပြီး စစ်ကောင်စီက သတင်းဖုံးခိုင်းထားခဲ့သည်။