သျှမ်းပြည် ကျောက်မဲမြို့နယ်တွင် မပေါက်ကွဲသေးသည့် စစ်လက်နက် အကြွင်းအကျန်နှင့် မြေမြှုပ်မိုင်းများကို တောင်ယာထဲတွင် တွေ့ရှိရခြင်းကြောင့် တောင်ယာ သီးနှံရိတ်သိမ်းရန် ခက်ခဲနေကြောင်း စုံစမ်းသိရသည်။
ကျောက်မဲမြို့နယ်တွင် စစ်ကော်မရှင်တပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ကြား ဖြစ်ပွားခဲ့သည့် တိုက်ပွဲများအတွင်း မပေါက်ကွဲသေးသည့် စစ်ကျန်လက်နက်နှင့် မြေမြှုပ်မိုင်းများကို ဒီဇင်ဘာလဆန်းပိုင်းမှ စတင်ပြီး နောင်ပိန်တိုက်နယ် ကျေးရွာများရှိ ပြောင်းနှင့် ကြံခင်းများထဲတွင် တွေ့ရခြင်းကြောင့် တောင်သူများ သီးနှံရိတ်သိမ်းရန် အခက်အခဲ ကြုံတွေ့နေရကြောင်း ဒေသခံများက ပြောသည်။
“ပြောင်းဖူးသွားချိုးတာနဲ့ မိုင်းတွေ့တာပဲ။ ရှေ့ရက်က မြေမြှုပ်မိုင်း ထောင်ထားတာ တစ်လုံး တွေ့တယ်၊ မနေ့က မပေါက်ကွဲသေးတဲ့ ငှက်ပျောဖူး (လက်နက်ကြီးကျည်) ၂ လုံးတွေ့တယ်။ နှစ်နေရာလုံးက ၃ လံ (၁၅ ပေ) လောက်ပဲ ဝေးတယ်။ အခု အဲ့လိုတွေ့တော့ ခြံတောင် မသွားရဲတော့ဘူး။ ပြောင်းသွားချိုးဖို့ တခြားလူလည်း မခေါ်ရဲဘူး၊ တခုခု ဖြစ်သွားရင် တာဝန်ယူရမှာလည်း စိုးရိမ်တယ်”ဟု ကိုယ်တိုင်ကြုံတွေ့ခဲ့ရသည့် ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နယ် နောင်ပိန်တိုက်နယ်ရှိ နောင်ပြစ်ကျေးရွာသည် ယခင်က TNLA ပူးပေါင်းတပ်နှင့် စစ်ကော်မရှင်တပ်တို့အကြား မကြာခဏ ထိတွေ့တိုက်ပွဲ ဖြစ်ပွားခဲ့သည့် နေရာဖြစ်ပြီး ယခုတွေ့ရှိခဲ့သည့် စစ်ကျန်လက်နက်များကို သက်ဆိုင်ရာ တာဝန်ရှိသူများမှ လာရောက်ဖြုတ်ယူသွားခဲ့ကြောင်း သိရသည်။
ထိုသို့ တောင်ယာပြောင်းခင်းထဲတွင် မပေါက်ကွဲသေးသည့် စစ်လက်နက် အကြွင်းအကျန်များ မကြာခဏ တွေ့ရှိခြင်းကြောင့် နေ့စားအလုပ်သမား လိုက်မည့်သူများ မရှိတော့ဘဲ တောင်သူများမှာ ရာသီချိန်ရောက်သော်လည်း သီးနှံရိတ်သိမ်းရန် ခက်ခဲနေကြောင်း ဒေသခံများက ပြောသည်။
“ခြံသွားဖို့ လူခေါ်လို့လည်း အဆင်မပြေဘူး။ ကိုယ့်ဘာသာ ရသလောက်ပဲ ယူနေရတယ်။ ပြောင်းဖူးမချိုးရင်လည်း အပင်လှဲပြီး ခြစားလို့ အရင်းရှုံးမှာ။ တောင်သူဆိုတော့ ရာသီချိန်ရောက်ရင် ရိတ်သိမ်းရတာပဲလေ။ သတိထားပြီး သွားလာတာတောင်မှ ခနခန တွေ့တယ်။ ကိုယ်မသိလိုက်ဘဲ မိုင်းနင်းမိမှာလည်း ကြောက်တယ်၊ တိုက်ပွဲဖြစ်ခဲ့တဲ့ နေရာဆိုတော့ ဘယ်နားမှာ မိုင်းရှိမလဲ မသိဘူး” ဟု အဆိုပါ ဒေသခံ အမျိုးသမီးက ဆက်ပြောသည်။
ထို့ကြောင့် မြေမြှုပ်မိုင်းများ၊ မပေါက်ကွဲသေးသော စစ်ကျန်လက်နက်ပစ္စည်းများနှင့် ပေါက်ကွဲစေတတ်သော လက်လုပ်ပစ္စည်းများ သတိပြုရန် လိုအပ်ပြီး ၎င်းတို့ကို မထိမကိုင်ဘဲ ဝေးဝေးနေရန်၊ သံသယဖြစ်ဖွယ် အရာ၀တ္ထုပစ္စည်းများကို လုံး၀ ကောက်ယူခြင်း မပြုလုပ်ရန်၊ အခြားသူများကို သတိပေးခြင်း အပြင် ကိုယ်မသိကျွမ်းသို့ (သို့မဟုတ်) သံသယ ရှိသည့် နေရာများကို ဝင်ရောက်ခြင်းမပြုလုပ်ရန် အရေးကြီးသည်။
ပြီးခဲ့သည့် အောက်တိုဘာလ ၁၀ ရက်တွင် စစ်ကော်မရှင်တပ် ပြန်လည်ထိန်းချုပ်ထားသည့် ကျောက်မဲမြို့နယ်အတွင်းရှိ နောင်ပြစ်ကျေးရွာတွင် အသက် (၄၀) နှစ်အရွယ်ရှိ နန်းဟွမ်သည် မုံညင်းစိုက်ပျိုးရန် နေအိမ်ခြံဝင်းထဲ ပျိုးဘောင်ပြုလုပ်ထားသည့် နေရာတွင် မြေမြှုပ်မိုင်းနင်းမိကာ ခြေထောက်တစ်ဖက် ပြတ်သွားခဲ့သည်။
အလားတူ စက်တင်ဘာလ နောက်ဆုံးပတ်မှ စတင်ပြီး ကျောက်မဲမြို့နယ် နောင်ပိန်တိုက်နယ်တွင် စစ်ဘေးရှောင်များ နေရပ်ပြန်သွားသော်လည်း မိုင်းရှင်းလင်းရေး မလုပ်ဆောင်ရသေးခြင်းကြောင့် တစ်လအတွင်း မြေမြှုပ်မိုင်း နင်းမိ၍ သေဆုံးသူ (၄) ဦး၊ ထိခိုက်ဒဏ်ရာရရှိသူ အမျိုးသမီး အပါအဝင် (၄) ဦးထက်မနည်း ရှိခဲ့ကြောင်း ဒေသခံများက ပြောသည်။
Leave a Comments