ကရင်နီပြည် အမည်ရ ကယားပြည်နယ် လွိုင်ကော်မြို့နယ်အတွင်း မြေမြှုပ်မိုင်း နင်းမိ၍ ဒဏ်ရာ ရနေသူများကို စစ်ကောင်စီက သတင်းဖုံးကွယ်ထားသည်ဟု မြို့ခံများက ပြောသည်။
ပြီးခဲ့သည့် အောက်တိုဘာလ နောက်ဆုံးပတ်က လွိုင်ကော်မြို့ မိုင်းလုံးရပ်ကွက်တွင် နေအိမ်ခြံဝင်း အတွင်း မြေမြှုပ်မိုင်း ပေါက်ကွဲမှုကြောင့် အသက် ၁၂ နှစ်အရွယ် ကလေးတစ်ဦး ထိခိုက်ဒဏ်ရာ ရရှိခဲ့ပြီး စစ်ကောင်စီက သတင်းဖုံးခိုင်းထားကြောင်း မြို့ခံများက ပြောသည်။
“ကလေးက ခြံထဲမှာ ဆော့ကစားရင်း မိုင်းပေါက်ကွဲတာလို့ သိရတယ်။ ကလေးက ဆေးရုံမှာ ဆေးကု နေရတယ်။ အဲဒီတုန်းက သတင်းပေးမထွက်ဖို့ (မဖြန့်ဖို့) လုပ်ခဲ့တာ။ အဲဒါတောင် သူတို့ကို ပိုက်ဆံပေးပြီး မိုင်းရှင်းခိုင်းထားပြီးသား။ လက်ကျန်မိုင်းလို့တော့ ပြောတာပဲ။ နေရတာတောင် သိပ်မလုံခြုံဘူး၊ မိုင်းရှိမလား ဆိုပြီး စိုးရိမ်နေရတာ” – ဟု လွိုင်ကော်မြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇူလိုင်လကလည်း စစ်ကောင်စီက လွိုင်ကော်မြို့ ရပ်ကွက်များ၌ နေရပ်ပြန်လိုသည့် စစ်ရှောင်များကို ပြန်လည်နေထိုင်ခွင့်ပြုခဲ့ပြီး မိုင်းရှင်းပေးမည်ဟုဆိုကာ တစ်အိမ်လျှင် ငွေကျပ်တစ်သိန်း ကောက်ခံသွားခဲ့ကြောင်း၊ သို့သော် နေအိမ်ဝန်းအတွင်းကိုသာ မြေမြှုပ်မိုင်း ရှင်းပေးခဲ့ကြောင်း သိရသည်။
ထို့အပြင် လွိုင်ကော်မြို့တွင် အဝေးသင်တက္ကသိုလ် ပြန်လည်ဖွင့်လှစ်ခဲ့ပြီးနောက် တောင်ကြီးမြို့တွင် တက္ကသိုလ်တက်ရောက်နေသူများကို လွိုင်ကော်တက္ကသိုလ်တွင် စာမေးပွဲ ပြန်လည်ဖြေဆိုရန် စစ်ကောင်စီက အမိန့်ပေးထားကြောင်း သိရသည်။
“အခုက ရွေးကောက်ပွဲနီးပြီဆိုတော့ လွိုင်ကော် အေးချမ်းနေတယ်ဆိုတာ ပြချင်တာ ဖြစ်မယ်။ တက္ကသိုလ်ကျောင်းသားတွေ စာမေးပွဲ ပြန်ဖြေရမယ်ဆိုတော့ ပြန်ဖြေတဲ့သူက အနည်းငယ်ပဲ ရှိတယ်လို့ သိရတယ်။ သူတို့ခေတ်ဆိုတော့ သူတို့ပြောသမျှ လိုက်လုပ်ရမှာ၊ မဟုတ်ရင် ဖမ်းခံနေရမှာစိုးလို့” – ဟု လွိုင်ကော်မြို့ခံ အသက် ၃၀ ဝန်းကျင် အမျိုးသားတစ်ဦးက ပြောသည်။
လွိုင်ကော်မြို့တွင် ကုန်ဈေးနှုန်းများ မြင့်တက်နေပြီး ကြက်ဥတစ်လုံးလျှင် ၅၀၀ ကျပ်၊ ဆန်ကြမ်း တစ်အိတ်လျှင် ငွေကျပ် ၇ သောင်းမှ တစ်သိန်းအထိ ရှိနေသည်။ ယခင်က ဝမ်းတီးနို့ဆီ တစ်ထုပ်လျှင် ကျပ် ၅၀ သာ ရှိသော်လည်း ယခုအခါ ငွေကျပ် ၄၀၀ အထိ ရှိနေပြီဖြစ်ကြောင်း သိရသည်။
ပြီးခဲ့သည့် ၂၀၂၄ ခုနှစ် ဒီဇင်ဘာလ ၁၂ ရက်နေ့တွင်လည်း လွိုင်ကော်မြို့၊ ဒေါဥခူရပ်ကွက်၌ ပစ္စည်း ပြန်သယ်ယူသည့် အမျိုးသားတစ်ဦး မိုင်းနင်းမိပြီး သေဆုံးသွားခဲ့ရသည်။
လွိုင်ကော်မြို့ကို ပြီးခဲ့သည့် ၂၀၂၃ ခုနှစ် နိုဝင်ဘာလတွင် စစ်ကောင်စီတပ်နှင့် ကရင်နီအမျိုးသား ကာကွယ်ရေးတပ် (KNDF) တို့ “၁၁.၁၁” စစ်ဆင်ရေး ဆင်နွှဲခဲ့ကြပြီး ကရင်နီတော်လှန်ရေး တပ်များက လွိုင်ကော်မြို့ကို ထိန်းချုပ်နိုင်ခဲ့သည်။
သို့သော် ပြီးခဲ့သည့် ၂၀၂၄ ခုနှစ် ဇွန်လဆန်းပိုင်းတွင် စစ်ကောင်စီတပ်က လွိုင်ကော်မြို့ကို ပြန်လည်ထိန်းချုပ်ခဲ့ပြီး ယခုလက်ရှိ လွိုင်ကော်မြို့ပေါ် ရပ်ကွက်များတွင် စစ်ကောင်စီတပ်များက စစ်ဆေးရေးဂိတ်များ ချထားပြီး လုံခြုံရေး တင်းကြပ်ထားကြောင်း မြို့ခံများထံမှ သိရသည်။
Leave a Comments