သျှမ်းပြည်တောင်ပိုင်း၊ တောင်ကြီးမြို့ အရှေ့မြို့ပတ်လမ်း ဗိုလ်ချုပ်အောင်ဆန်း ပန်းခြံအနီးရှိ အာကစားကွင်း ဘေးပတ်ပတ်လည်မှ ဆိုင်ခန်းများကို ဖယ်ရှားခိုင်းထားကြောင်း သတင်းရရှိသည်။

ပြီးခဲ့သည့် ဒီဇင်ဘာလ ၁ ရက်မှစပြီး ဆိုင်ခန်းများကို တိုက်ခန်းလစာငွေ ကောက်ခံခြင်းမပြုတော့ဘဲ ဆိုင်ခန်း၊တိုက်ခန်းနေရာတွင် နိုင်ငံတကာ အဆင့်မီ အားကစားကွင်း၊ အားကစားရုံ နှင့် ရေကူးကန်၊ လူငယ်ရေးရာ စင်တာများ တည်ဆောက်သွားမည်ဖြစ်ကြောင်း သျှမ်းပြည် အားကစားနှင့် ကာကွယ်ရေးဦးစီးဌာနက ထုတ်ပြန်ထားသည်။

တောင်ကြီးမြို့ ဘောလုံးကွင်းသည် သျှမ်းပြည် အားကစားနှင့် ကာယပညာဦးစီးဌာန ပိုင်မြေဖြစ်ပြီး ထိုဘော်လုံးကွင်း ပတ်ပတ်လည်ရှိ ဆိုင်ခန်းများကို အားကာထံမှ ငှားရမ်းဖွင့်လှစ်ထားကြောင်း သိရသည်။

“စာတော့ ထုတ်ထားပြီ ပြောင်းရွှေဖို့ပဲကျန်တော့တာ။ဒီလကုန် အပြီး ရွှေ့ရမယ် ပြောတာ။ တစ်ချို့ ကြတော့လည်း နေဖို့ နေရာ ရှာနေရပြီ။ အဲတိုက်ခန်းတွေ အကုန်ဖျက်ပြီး သူတို့ စီမံကိန်းအသစ်တွေ လုပ်မယ် လို့ကြားတယ်။”ဟု တောင်ကြီးဒေသခံ အမျိုးသားတစ်ဦးက ပြောသည်။

အဆိုပါ ဘောလုံးကွင်း ဘေးပတ်ပတ်လည်တွင် ဆိုင်ခန်း၊ တိုက်ခန်းပေါင်း ၂၀၀ ကျော်ပြီး အများစုမှာ ဆိုင်ကယ်အပိုပစ္စည်းဆိုင်နှင့် ပုံနှိပ်ဆိုင်များ ရှိကြောင်း ၎င်းက ဆက်ပြောသည်။
ထိုသို့ တိုက်ခန်းများ၊ဆိုင်ခန်းများကို တစ်လအတွင်း ဖယ်ရှားခိုင်းမှုကြောင့် တိုက်ခန်းတွင် ငှားရမ်းနေထိုင်သူများနှင့် တိုက်ခန်းဝယ်ယူထားသူများ အခက်ကြုံနေရပြီး နေရာသစ်ထပ်မံငှားရမ်းရန် ငွေကြေး အခက်ခဲ ဖြစ်နေကြောင်း သိရသည်။

“တိုက်ခန်းခက တစ်လမှ ၁သိန်းလောက်ပဲရှိတယ်၊ ဒါတောင် မိသားစုလိုက်နေလို့ရလို့ ဈေးသင့်တယ် ပြောရမယ်။ နေရာပြောင်းဖို့ ရှာနေတာ ဈေးက ၅သိန်းအောက် မရှိဘူး။ ကိုယ့်လစာဝင်ငွေနဲ့ နေထိုင်ဖို့တောင် မလောက်ဘူး။ ကုန်ဈေးနူန်းတွေကြောင့် ထင်တယ် အကုန်ဈေးတက်ကုန်တာ။ မဖြစ်မနေတော့ ပြောင်းရမှာပဲ။” ဟု တိုက်ခန်းငှားရမ်း နေထိုင်သူ အမျိုးသမီးတစ်ဦးက ပြောသည်။

ယခုလက်ရှိ တောင်ကြီးမြို့တွင် ကရင်နီပြည်၊ သျှမ်းမြောက်နှင့် ပင်လောင်း၊ ဖယ်ခုံဘက်မှ စစ်ဘေးရှောင်များအပြင် မြေပြန့်ဒေသက စစ်ဘေးရှောင်များသည် တောင်ကြီးမြို့တွင် လာရောက်ခိုလှုံနေပြီး အိမ်ငှားခ ဈေးနူန်းများလည်း မြင့်တက်နေကြောင်း သိရသည်။

ပြီးခဲ့သည့် ၂၀၂၃ ခုနှစ် မတ်လ အစောပိုင်းတွင် စစ်ခေါင်းဆောင် မင်းအောင်လှိုင် ကိုယ်တိုင် တောင်ကြီးမြို့ကို လာရောက်ပြီး ဘော့လုံးကွင်း အဆင့်မြှင့်တင် တည်ဆောက်မည့် ကိစ္စများကို ဆွေးနွေးခဲ့ကြောင်း သိရသည်။