ကရင်ပြည်နယ်၊ ဘားအံမြို့ရှိ စစ်ကော်မရှင်တပ် စစ်ဆေးရေးဂိတ်များတွင် သျှမ်းပြည်မှတ်ပုံတင် ၁၃ မျဉ်းစောင်း ကိုင်ဆောင်ထားသူများကို ဖမ်းဆီးစစ်ဆေးမှုများ တင်းကြပ်နေကြောင်း စုံစမ်းသိရသည်။
မြဝတီမြို့တွင် အွန်လိုင်းကျားဖြန့် လုပ်ငန်းလုပ်ကိုင်သည့် နေရာများကို စစ်ကောင်မရှင်တပ်နှင့် နယ်ခြားစောင့်တပ် BGF များ ဝင်ရောက်စီးနင်းပြီးနောက် နိုဝင်ဘာလ တတိယပတ်မှ စတင်ပြီး စစ်ကော်မရှင် စစ်ဆေးရေးဂိတ်များတွင် မြဝတီမြို့ဘက်မှ ပြန်လာသူများကို ဖမ်းဆီးစစ်ဆေးမှု တင်းကြပ်ခဲ့သည်။
လက်ရှိတွင် မြဝတီ – ဘားအံ ပြည်ထောင်စုလမ်းမကြီး တကြောရှိ စစ်ကော်မရှင် စစ်ဆေးရေးဂိတ်များတွင် သျှမ်းပြည်မှတ်ပုံတင် ၁၃ မျဉ်းစောင်း ကိုင်ဆောင်ထားသူများကို ဖမ်းဆီး စစ်ဆေးမှု တင်းကြပ်နေကြောင်း မြဝတီမြို့ ကားသမားတစ်ဦးက သျှမ်းသံတော်ဆင့်ကို ပြောသည်။
“အခုက မှတ်ပုံတင် ၁၃ မျဉ်းစောင်း တွေကိုတော့ သွားဖို့ ကန့်သတ်ထားတယ်၊ သိပ်မကြာသေးဘူး။ မှတ်ပုံတင်က ၁၃ မျဉ်းစောင်း နဲ့ ၁၁ မျဉ်းစောင်းပေါ့။မြဝတီ – ဘားအံ လမ်းတလျှောက်ပဲ။ ခုက သွားချင်ရင်တောင် ငွေခင်းပြီး သွားရမှာ ပတ်လမ်းကနေ”ဟု မြဝတီ-ဘားအံ ခရီးစဉ်ပြေးဆွဲနေသည့် ကားသမားတစ်ဦးက ပြောသည်။
အကယ်၍ ဖြတ်သန်းခွင့် ရလိုပါက မြဝတီမှ တဆင့် ရန်ကုန်သို့ သွားရန်အတွက် ကားခ တစ်ဦးလျှင် ကျပ် ၈ သိန်းမှ ၁၅ သိန်းဝန်းကျင်အထိ ရှိနေကြောင်း မြဝတီမြို့ ကားသမားတစ်ဦးက ဆက်ပြောသည်။
စစ်ကော်မရှင် စစ်ဆေးရေးဂိတ်နှင့် ရထားဘူတာတို့တွင် သျှမ်းပြည် ၁၃ မျဉ်းစောင်း မှတ်ပုံတင် နှင့် ရခိုင်ပြည်နယ် ၁၁ မျဉ်းစောင်း မှတ်ပုံတင် ကိုင်ဆောင်ထားသူများကို ဖြတ်သန်းသွားလာခွင့် မပြုသကဲ့သို့ ဖမ်းဆီးထားခြင်းလည်း ရှိကြောင်း သိရသည်။
ပြီးခဲ့သည့် ၂၀၂၄ ခုနှစ်ကလည်း သျှမ်းပြည်အတွင်း ညီနောင်မဟာမိတ်တပ်များနှင့် စစ်ကော်မရှင်တပ်ကြား တိုက်ပွဲများကြောင့် သျှမ်းပြည် ၁၃ မျဉ်းစောင်း မှတ်ပုံတင် ကိုင်ဆောင်ထားသူ တအာင်း(ပလောင်)နှင့် ကိုးကန့်တရုတ် လူမျိုးများကို ကရင်ပြည်နယ် ဘားအံမြို့ရှိ စစ်ကော်မရှင်ဂိတ်များတွင် ဖြတ်သန်းသွားလာခွင့်မပြုခဲ့ကြောင်း သိရသည်။
Leave a Comments