ရှမ်းပြည်တိုးတက်ရေးပါတီ/ ရှမ်းပြည်တပ်မတော်(SSPP/SSA) ထိန်းချုပ်နယ်မြေအတွင်းရှိ ကေတီဗွီ KTV ဆိုင်များကို ဒီဇင်ဘာလဆန်းပိုင်းမှ စတင်ပြီး ပိတ်သိမ်းရန် အမိန့်စာ ထုတ်ပြန်ခဲ့သော်လည်း ဆက်လက်ဖွင့်လှစ်နေကြောင်း သတင်းရရှိသည်။

SSPP/SSA တပ်ဖွဲ့သည် ပြီးခဲ့သည့် နိုဝင်ဘာ (၂၆)ရက်တွင် ၎င်းတို့ထိန်းချုပ်သည့် နယ်မြေအတွင်း လူမှုစာရိတ္တပျက်ပြားခြင်း၊ မူးယစ်ဆေးဝါး သုံးစွဲခြင်း၊ အလုပ်အကိုင် ပျက်ခြင်း စသည့် ပြဿနာများ ဖြေရှင်းနိုင်ရန်အတွက် ကေတီဗွီ (KTV) ဆိုင်များကို ဒီဇင်ဘာလ ၁ ရက်မှစတင် ပိတ်သိမ်းရန် ညွန်ကြားစာထုတ်ပြန်ခဲ့သည်။

သို့သော်လည်း လက်ရှိအချိန်ထိ KTV ဆိုင်များ ပိတ်သိမ်းခြင်း မရှိသေးဘဲ ဆက်လက်ဖွင့်လှစ်နေဆဲဟု မိုင်းရှူးမြို့နယ်ဘက်မှ SSPP/SSA နှင့် နီးစပ်သည့် အမျိုးသားတစ်ဉီးက သျှမ်းသံတော်ဆင့်ကို ပြောသည်။

“အဓိကတော့ လူငယ်တွေ၊ မိန်းကလေးငယ်တွေကစ မူးယစ်ဆေးဝါးကြောင့် ပျက်စီးတာများလို့ သူတို့ ပိတ်ခိုင်းတာပါ။ SSPP/SSA လက်လမ်းမှီတဲ့ နေရာတွေကတော့ ဒီဇင်ဘာ ၁ ရက် တည်းက တချို့ပိတ်ထားပါ။ စစ်ကောင်စီတွေ ရှိတဲ့ မြို့တွေမှာကျတော့ ဆက်ဖွင့်နေနိုင်ပါတယ်”ဟု ၎င်းအမျိုးသားက ပြောဆိုသည်။

ပြီးခဲ့သည့် ဒီဇင်ဘာလ ၁ ရက်မှ စတင်ပြီး SSPP/SSA ထိန်းချုပ်နယ်မြေအတွင်းရှိ KTV ဆိုင်အချို့ ပိတ်သိမ်းကြသော်လည်း၊ မိုင်းရှူးမြို့ပေါ်ရှိ KTV ဆိုင်များမှာ ဆက်လက်ဖွင့်နေကြောင်း မိုင်းရှူးမြို့ ဒေသခံ ၎င်းအမျိုးသား ထပ်လောင်းပြောသည်။

“မြို့တွင်းမှာဆိုတော့ ဆိုင်တွေက အပိတ်ပြတာပေါ့။ အရှေ့မှာ ပိတ်ထားတယ်၊ ပြီးရင် အထဲမှာဖွင့်တယ်။ တချို့ဆိုင်တွေကလည်း ပိတ်ထားပါတယ်”ဟု မိုင်းရှူးမြို့နယ် ဒေသခံအမျိုးသားတစ်ဦးက ပြောသည်။

အဆိုပါ KTV ဆိုင်များကို ပိတ်သိမ်းရန် ညွှန်ကြားမှုနှင့် ပတ်သက်ပြီး ထိရောက်စွာ သေချာကိုင်တွယ်နိုင်လျှင် လူငယ်များအတွက် အမှန်တကယ် အကျိုးရှိနိုင်ကြောင်း SSPP/SSA တပ်ဖွဲ့ နှင့် နီးစပ်သူအမျိုးသားတစ်ဦးက ဆက်ပြောသည်။

“ဒီ KTV ဆိုင်တွေ တကယ် ပိတ်နိုင်ရင်တော့ ကောင်းပါတယ်။ ဆိုင်ဖွင့်ဖို့ စည်းကမ်းတွေလည်း ရှိတာပဲ။ အသက်မပြည့်ရင် အလုပ်မလုပ်ရဘူး၊ မဝင်ရဘူး ဆိုတာ ရှိပါတယ်။ ဒါပေမယ့်လည်း မစစ်ကြဘူးလေ။ အသက် ၁၇ နှစ် လူငယ်တွေကအစ မူးယစ်ဆေးဝါးတွေကြောင့် ပျက်စီးနေကြတာလေ”ဟု ၎င်းအမျိုးသားက ဆက်ပြောသည်။

SSPP/SSA ထိန်းချုပ်နယ်မြေအတွင်းရှိ KTV ဆိုင်များ ပိတ်သိမ်းရန် ညွှန်ကြားချက်ကို လိုက်နာမှုမရှိလျှင် ဆိုင်များကို အရေးယူ ချိပ်ပိတ်သွားမည်ဖြစ်ကြောင်း SSPP ထုတ်ပြန်ချက်တွင် ရေးသားဖော်ပြထားသည်။

ပြီးခဲ့သည့် ၂၀၂၁ ခုနှစ်မှ စတင်ပြီး သျှမ်းပြည်အတွင်းရှိ KTV ဆိုင်များနှင့် ဘား/ကလပ်တို့တွင် Happy Water ၊ ကက်တမင်း(Ketamine) – K ၊ အက်တက်စီ (Ecstasy) – E စသည့် မူးယစ်ဆေးများကို ဆိုင်အတွင်း အလွယ်တကူ ဝယ်ယူသုံးစွဲနိုင်သည်အထိ အခြေအနေ ဆိုးရွားနေသည်